人均百呎擠迫戶

真係陰功豬咯！７００呎住７個人，點睇都係擠逼戶，邊樹有quality of life呀？

樓盤傳真 2016/06/04 第四節 2016/06/03 17:39

環宇海灣逾七百呎之家既有五星級酒店睡房，也有日式太空倉睡床，滿足一家五口、兩傭工的空間需求。

港豬的問題就係明明係限米煮限飯，但就偏偏要懶係 grand 扮哂 decent。所謂嘅儲物間其實就係工人房，得１２呎，屋主仲要有兩個工人姐姐起孖，話好注重工人房（因為工人房在廳中心），然後又話對生活享受好有要求，想間屋有酒店感覺夠哂 relax。真是帶着矛盾去裝潢：你注重工人房，要「工人姐姐訓得舒服」，就唔係俾１２呎人訓，仲要訓兩個人喇！注重享受，in the first place 點解又唔買間大啲嘅屋呢？７００呎住咁多人，轉個身都難喇！

１２呎要訓兩個人，設計師其實都搞唔掂。唯有裝假狗硬生生加個鞋櫃，擴充空間都１８呎（左上、右上），然後砌碌架床，在趟門上加用幅畫做裝飾遮住，將「棺材房」講成係「日式太空倉」，「讓工人姐訓得舒服」（左中上、右中上）。不過點睇都係訓下格床的姐姐「舒服」啲：起碼掌握了開窗的權柄，床頭仲有空間放私人物品（左中下、右中下）；而訓上格床的姐姐就陰功啲，要兜路到另一邊先有樓梯上到上格床（右上），而所謂的「樓梯」，竟然係「直上直落」，無斜度的，真係輕功差少少都上唔到去（左下、右下）：

三間房，除了戶主兩公婆，仲有大女與兩個仔。金叵籮一人要一個工人姐姐照顧的兩個仔就仲細，可以 share 同一間房；而唔知大過兩個細佬幾多歲的女兒將會出國讀書，所以間房可以改細啲，呈Ｌ字形（左上、右上），門向外掩，窗台放書檯仔，人就訓上格床，下格做櫃（左下、右下），又係「開放式棺材設計」，盡顯屋主重男輕女的心態：

個窗就懶有型用電動窗簾（左上），燈槽懶有情調用紫色燈，仲可以變色，咁就叫做有酒店風格，不過好似唔係「非常之離Ｘ譜」的漸變色，只係兩隻色二揀一，睇落有啲 cheap（右上、左下）。不過，更 cheap 的是連走廊都整埋入牆櫃，坐起度開門就阻住成條路（右下），屋主（或設計師）的生活品味真係有少少怪：

生活品味唔單只淨係燈光效果，仲要有玫瑰金色餐椅（左上），話係由「外國」訂來，至於係咪經馬老大的真貨平台「掏」返嚟都無人知。窗台造埋櫃放餐具，一揭開個蓋竟然會墥窗簾（同埋後面的玻璃窗），認真牙煙（右上）。嫌餐檯太細招呼唔到朋友？結果又要兩個人一齊擔擔抬抬以「多用途茶几」開開合合轉轉轉啲機關整張檯出嚟（左中、右中、左下、右下），咁都叫高雅格調真係講都無人信：

窗台上整個Ｃ嬸字掛電視連滲燈效果，又係背哂光唔落簾就睇唔到電視（左上）。主人房個窗唔係置中，唯有一邊用窗簾遮住（右上），另一面整個木門又遮住（左下），咁樣床頭就變成「feature wall」了（右下）：

阿仔一個訓窗台，一個訓上格床，周圍用傢俱包圍，又係「開放式棺材設計」（左上）。牆上以 Lego 為主題，夠哂刮手刮腳（右上、左下）。房間的另一邊牆以不規則的方格做裝飾，床上攬枕有個「Ｂｌａｓｔ」字，唔知係咪阿仔個英文名，即係「贏在射精時」咁解呢？

＊＊＊
伸延閱讀：
Philips Hue