2017年11月19日 星期日

魔術師的恐懼鬥室

夜半一點半,剛在廳中看完德甲精華錄映,正想去廚房掉垃圾,一轉身剛起步便腳下一滑。
在滑倒的一刻,整個人感覺好像老夫子漫畫踩蕉皮一樣,整個人凌空了半秒鐘,然後重重地摔在地上。
魔術師好歹都學過急救(見舊文《急救魔術師》),當時已心知不妙。
果然,休息了一會,想站起來的時候,左腿已是不聽使喚。
魔術師也不勉強,目前首要要做的,便是拿到手機。
魔術師有一個習慣,一回到家便會將手機放到書å房,力求每分每刻都有足夠電力。
這就是為什麼魔術師甚少將手機用來打機睇片的原因。
於是,魔術師便咬起牙根,忍着疼痛,化身變成一條蚯蚓,躝下躝下咁爬回去書房。
幸屋企沒有那些勞什子的地台設計,否則真係玩死。
到了書房,好在魔術師坐的是有轆嘅大班椅,於是發起全力只用右腳將自己「un」上張椅,權充輪椅使用。
但這刻已是氣喘如牛,又要休息一會。
既然有「輪椅」,那就易辦,取了銀包、手機、尿袋、手提電腦(為尿袋叉電)、少量衣物(提防急症室冷氣太勁)等隨身物品,使打999叫白車。
幸好,魔術師大門用的是電子鎖(見舊文《鎖殺陳仔》),只消給救護員密碼便可以開門,毋需破門。呢樣嘢真係獨居人士必備的恩物。
救護員來了,給魔術師以三角巾包紮回定,疼痛果然減少了,更確定了魔術師有關斷腿的疑慮。
***
註:現時手術已做完,魔術師也回到病房中休息,故有空打了這一篇文章,從頭說起。
***
伸延閱讀:
急救魔術師
鎖殺陳仔
做手術

57 則留言:

  1. 手術完應該好好把握麻醉藥未散去休息,因為一旦感覺回來,一痛,無法入睡,但又好攰。巧攞命!
    平安就好了。只怕你一人,大小二便下下要護士幫忙,公立醫院可能會麻煩啲。
    我果次用真.尿袋。因為術前放咗便便,手術要打氣入肚,個胃畀啲氣頂住食唔到嘢,所以冇便便。
    不過微創對健康嘅人好快好。不過我聽你講事發經過,我自己都覺得好痛呀!哎呀!

    回覆刪除
    回覆
    1. 男人小便就容易啲,開大就不分男女都係要人幫忙。

      事發時係骨痛加肌肉痛。

      刪除
  2. 望師兄早日康復。
    建議師兄落啲心思將上文提到的靚女主診私有化,加快康復進程,以後亦有個照應。

    回覆刪除
    回覆
    1. 同意。

      下次佢再問你有無屋企人既時候,問下佢,“妳願唔願意做我屋企人?”

      刪除
    2. Mike兄太強了,簡單而到位,直接中見含蓄。
      師兄若還是開不了口,叫佢睇下呢篇blog文,實冇衰。

      刪除
    3. 發到文就即係熬過第一關了,恭喜~

      我反而想問: 個靚女主診有無監視你俾護士姐姐們剃X毛? XD

      刪除
    4. 哈,可能會因禍結良緣呢.但個靚女主診結左婚未?
      又,其實係踩到乜呢?定係身體突然失平衡?

      刪除
    5. Mike、池:查實⋯⋯屯門醫院都有唔少美眉醫生護士⋯
      摩摩:靚女醫生今日唔見人⋯同埋我動手術的位置是在大腿外側,唔使剃毛的。
      無想:講到好似 AV 病棟咁⋯又,純粹係跣腳,無踩到啲乜。

      刪除
    6. 不如整番個 禁斷介護 照顧出院後起居沖涼咁

      刪除
  3. 要休息幾耐? 你份新工點?

    回覆刪除
    回覆
    1. 未知要休幾耐,不過我可以拎 no paid leave,而且也可以work from home,應該可以同我上司再傾的。

      刪除
  4. 我前年跌斷手做手術, 一做完手術己經偷偷地每日食雲南白藥粉, 加上勁食黃豆類制品, 好快生好骨, 你可以試下

    回覆刪除
    回覆
    1. 雲南白藥我未食過,唔敢試。黃豆類或者可以一試, thanks for the info.

      刪除
    2. "食營養劑加速康復"這個方法不建議, D骨生得太快會有機會生骨刺出來,手尾就更長。你年紀唔大,慢慢休養等佢生返會更好

      刪除
  5. 嘩冇上嚟幾日就發生咁嘅事,祝早日康復先!

    //少量衣物(提防急症室冷氣太勁)等隨身物品

    我平時都執咗一袋萬一要去醫院嘅用品,緊急時一吓就可以拎走(或朋友帶去都方便啲)。

    //只消給救護員密碼便可以開門,毋需破門

    呢點我真喺諗唔到,要搞下嗰密碼鎖先得。

    回覆刪除
    回覆
    1. 謝謝祝福。

      //要搞下嗰密碼鎖先得

      三叔電子鎖係我唯一覺得有用的泡菜國產品,當時我花幾千蚊(又俾蛇quare二舅父話嘥錢)買都係為同類事件作個準備。

      看來我的「理性消費」系列都幾對 ex 你胃口 XD

      刪除
  6. // 靚女主診

    嘩! 咁唔使打止痛針啦. 古有關雲長刮體療毒,今有魔術師接骨尋芳.....

    回覆刪除
    回覆
    1. D,我仲諗緊個題目:「古有關雲長刮骨療毒,今有魔術師XXXX」⋯

      刪除
  7. 祝魔術師兄早日康復,多多保重

    回覆刪除
  8. 祝福魔術師兄早日康復, 希望休養期間唔會太痛!

    回覆刪除
  9. 祝魔兄早日康復
    獨居總有這種風險, 以後考慮下手機跟身

    回覆刪除
    回覆
    1. 多謝意見。手機跟身我無呢個習慣,在家中好易隨手放低唔記得擺係邊。

      刪除
  10. 康復後記住係廚厠地板鋪防滑膠氈...!

    回覆刪除
    回覆
    1. 企缸是用防滑地磚的,我是在客廳中跣倒呢。

      刪除
    2. 但點解轉個身會成個飛起?

      刪除
    3. //客廳中跣倒呢//

      著左襪?

      刪除
    4. 嘩,魔術兄客廳地磚咁滑既?睇嚟要鋪下地氈先得!

      刪除
    5. 係囉!下次要搵個設計師搞搞佢至得!XD

      刪除
  11. 跌一跌咁大件事,康復後要多做伸展運動,保持骨骼健康。睇來魔兄與我一樣,已到了要養生的年紀。
    祝早日康復!

    回覆刪除
    回覆
    1. 依家已經做緊伸展運動,要練返啲力。

      刪除
  12. 最重要是盡早落牀開始恢復正常活動功能,一般而言越早開始進行康復治療練番d肌肉可以恢復番大部分功能

    雖然我唔太知個情況,但以魔術師個年紀算係比較年輕,醫生應該想盡可能preserve個關節所以選擇唔做置換手術(當然前提係AVN可能性低啦),祝早日康復!

    回覆刪除
    回覆
    1. 係呀,初步可以落床以助行架行咗一陣,依家已經練緊肉。

      刪除
    2. 係呀,千祈唔好懶或者怕痛,一定要練。食補品無用㗎,營養均衡就得。

      刪除
    3. 我都認為鍛練最重要。不過咪操之過急。

      刪除
    4. 最弊係我啲親戚,係咁買生果,病床櫃都塞滿了。話唔使又唔係。

      刪除
    5. 直接提出要求

      刪除
    6. 生果就無咩所謂啦,食多啲營養都均衡啲,尤其啲病人餐其實都幾寡下。

      刪除
    7. 咁又係,生果也可防便秘。

      刪除
  13. 嘩!乜咁大劑!一個人住真係要小心d呀!尤其雖然未到老年,但始終不再年青,身體係會差d。跌一跌真係會好大鑊。

    祝魔兄早日康復,勁過 莫史廸!!

    回覆刪除
    回覆
    1. 謝祝福。係呀,有時啲嘢真係唔好逞強。

      刪除
  14. 魔兄保重,祝早日康復!

    回覆刪除
  15. 魔兄呢個weekend出院?

    而家要plan定work from home個安排了,因為正苦啲物理治療會安排在working day日間做的。

    回覆刪除
    回覆
    1. 應該未有咁快出院,但已由急症病房轉到了復康大樓。

      我會請住幾日 no paid 先,有時間搞 work from home 的。

      刪除