解車公靈籤（２０１７丁酉雞年）

劉業強於車公廟為香港求得上簽 更新：2017/01/29 12:00

大年初二車公誕，鄉議局主席劉業強為香港求得一支上簽，他指簽文代表今年任何一位當選特首，香港都會有新景象；解簽師傅就指香港轉運時來，局勢會向好發展。
來到大年初二，善信最期待的一刻，六十一簽是上簽，簽文是「傳來信息果無差，轉運時來自興家，篤志雲程須著力，何天今日賜榮華」，解曰「凡事吉利」，劉業強稱簽文是今屆特首選舉的啟示，而善信都希望香港今年如簽文所述，凡事吉利。香港今年與去年一樣，求得一支上簽，但有解簽師傅指今年簽內藏暗機。
而沙田鄉事委員會亦為沙田求得一支上簽，簽文是「真金不怕火來煆，性堅何懼小人言，只管秉心行正道，舉頭三尺有清天」，解曰「萬事大吉」。
接替父親劉皇發求簽的劉業強，連續第二年為香港求得上簽；而在一九九五年，香港亦曾經求得同一支六十一簽。

睇嚟車公都知傷民的文化修養愈來愈低落，太艱澀隱晦的簽文只會落得由解籤師父亂吹的下場（一陣就連巷蜀都可以話自己時來運到，白手興家），是故呢幾年簽文多是淺顯易明，起碼表面上無爭議囉！

第六十一簽．上簽
傳來信息果無差，轉運時來自興家；
篤志雲程須著力，何天今日賜榮華。
自身：篤志為佳　財運：可得豐利　訴訟：可有和解之機會
行人：將至　　　生育：可得男孩　出行：合宜
事業：順利　　　姻緣：努力可成　家宅：大吉
搬遷：合宜　　　疾病：可痊癒

先睇解釋，財運（股市樓市？）可得豐利，出行搬遷（一帶一路？）合宜，事業順利、疾病痊癒、家宅大吉等等，似乎社會撕裂可以癒合，甚至乎訴訟都有和解機會，合哂戴當家提議，要得販民300幾票支持就要放過姚梁劉羅四壯士（甚至乎糧油都有得分一杯羹），唔通車公係曾糟財粉絲？
睇返籤文，第一句「傳來信息果無差」，究竟「信息」來自何方，不言而喻；「果無差」者，即係「果然無錯」，潛台詞就係件事本來係令人帶疑慮的，唔知會唔會同原來個 plan 有無「差錯」，到最後發現都係 stick to the plan；亦同２０１０庚寅虎年籤文所說「昨宵一夢真端的，今日人傳信不訛。」前後呼應，夢中見到「聖喻」，然後人地講下就信到十足了。
第二句「轉運時來自興家」。「自」者，「自然」也，順其自然，有心栽花花不發，無心插柳柳成陰；所以「轉運時來」就係「等運到」，反正傷民都係無票可投也。
第三句「篤志雲程須著力」。篤志，忠誠專一的志向，最緊要愛國愛港，得樁秧信任；「雲程」者，青雲路，前程也。所以「篤志雲程須著力」即係要做好自己，盡力專注自己的志向，自然就會前程似錦。
第四句「何天今日賜榮華」，重點係「何天」兩字：

大畜，利貞，不家食吉，利涉大川。初九，有厲，利已。九二，輿說輹。九三，良馬逐，利艱貞。曰閑輿衛，利有攸往。六四，童牛之牿，元吉。六五，豶豕之牙，吉。上九，何天之衢，亨。
—《周易・大畜掛》

所謂「上九，何天之衢，亨。」，何作荷，即負荷，有擔當；《象傳》：「何天之衢，道大行也。」，走到康莊大道，亨通。直接通達天衢。積畜到極點，一飛沖天，能擔當國家的大事，飛黃騰達。借用在籤文，正是能擔當國家大事者就能選上特首也。
整後籤文其實係先睇後兩句，再睇前兩句：要贏選戰就係要做好自己，專心一致為「當今聖上」分憂，擔當起國家大事，「皇上」自會賜你榮華富貴，到時再打點信息，時機到時一眾選痿自然識得點樣投票...
至於林鄭、曾糟財、孽瘤、定胡塗法官先係能夠「何天」之人呢？就真係木宰羊。

另外要留意的是，坊間常以年初一當成係猴年與雞年的 switch over，但正式來說應該是在立春之後，亦即是２０１７年２月３日２３：３３分之後才算是丁酉雞年。

＊＊＊
參考資料：
福山堂　車公靈簽
漢典：篤志
易學網：26. 大畜卦 (山天大畜)
百度百科：象傳
＊＊＊
伸延閱讀：
解車公靈籤（２０１０庚寅虎年）