網傳被控暴動罪少女稱已流亡台灣 2017/08/27 17:15
去年旺角騷亂被控暴動罪的 18 歲女被告李倩怡，一段錄音在網上流傳，稱自己已「流亡台灣」，獲台獨組織幫助。據了解，警方已把她列入監察名單，一入境就會被捕。
李倩怡原定今年一月中提訊，她棄保潛逃，法庭已經發出通緝令。網上流傳一段聲稱是李倩怡於八月二十二日錄製的聲帶，說自己不信香港有法治，又形容當局起訴她是「政治檢控」，她選擇流亡台灣、逃避審訊，「尋找新自由的可能」，又指接受了台灣獨派組織幫助。據了解，警方已將她放入監察名單，若她再入境會隨即拘捕。
香港與台灣沒有簽訂移交逃犯協議，警方暫時未有計劃要求當地部門協助。
１. 嗱，呢位李小妹就真係「真．巷蜀份子」嘞！夠膽死棄保潛逃，不惜被黑警通緝，走去同呆蜀連線，點睇都比糧油琦天梁黃台瓜痴瘋仔等等勇武，更絕對唔係好似某些自稱「魚蛋革命時走去保護兄弟」的柒青咁（見《新聞雜評（一百六十一）》），人掟磚你又掟磚的無知少女。咩「時代革命」咩笨土派，幫李小妹挽鞋都唔配！
2017年8月22日，旺角警民衝突流亡者李倩怡聲明。
「香港嘅媒體朋友，大家好！我係一位參與2016年年初一『魚蛋革命』被起訴嘅李倩怡，我喺審判開庭之前選擇咗流亡。
面對呢幾年我土生土長嘅家園 － 香港，從熟悉變到陌生，原本應該係最冷漠、活喺自己世界嘅香港年輕人，都投身喺保衛香港本土嘅運動入面。
然後心寒有好多嘅同路人，都試住去將過往我哋喺街頭累積返嚟嘅能量，轉入去議會裏面延續，但最後本土派嘅人，一係就被選舉事務處取消參選權，一係就選入立法會都畀政府咁樣強行褫奪議員資格。連社會中相較溫和嘅人都陸陸續續被押入監倉。終於，體制內嘅選舉途徑被截斷，連法律原本所允許嘅公民示威同抗議嘅參與者，都成為咗政治犯。
係，你哋可以話我怯懦，逃避香港司法嘅審判。但其實係喺我內心，我早就已經唔再相信香港有法治。審判，從檢控到起訴，徹頭徹尾就係一種以司法制度為手段，對香港社會運動嘅鎮壓。至嗰陣大家都無發覺到，政府對『魚蛋革命』嘅起訴，根本就係一場政治檢控。
香港人就係太容易令自己同外國人都相信，香港即使無民主，依舊都可以有法治嘅可能，所以當出賣香港利益嘅港共政權，利用法治工具去進行政治審判嘅時候，我哋重以為呢個係獨立嘅司法程序。無錯，同臺灣嘅朋友同我講嘅一樣，『旺角大審』根本就係一場港版嘅『美麗島大審』，至嗰陣香港無人認知到咩嘢叫政治審判。香港而家係補緊課，補一種過去臺灣喺中國國民黨威權統治之下係點嘅一堂。
呢份聲明，係要同香港社會講，我哋曾經驕傲咁誤以為喺香港嘅法治底下，唔可能有政治犯嘅存在。而家，我哋嘅司法機關唔止會製造政治犯，其實香港都已經有我呢種政治流亡者。如果無辦法維持到中港有效嘅區隔，咁隨住香港加速被中國化嘅過程中，無論年輕人有無選擇移民離開，最終三十年內所謂嘅『兩制』都會蕩然無存，祇剩低中國廣東省香港市。
就喺我哋呢代香港青年踏入中年之際，我哋就要面臨一種就地離散嘅狀態，生活喺一個唔再係香港人嘅香港。對唔住我選擇咗流亡，因為與其要喺我中年嗰陣成為中國香港嘅異鄉人，咁不如我先選擇流亡，搵一個新自由嘅可能。
最後，媒體曾經報道過我流亡臺灣嘅事，報道同事實有好大嘅落差。幫忙我嘅臺灣朋友，從來都唔係時代力量同臺灣人權組織。我的確有拜訪過佢哋，但佢哋祇係好客氣咁打發我走。後來好好彩有個臺灣獨派願意仗義相助。
記得臺灣嘅朋友畀我睇咗臺灣魏德聖導演嘅《賽德克．巴萊》，當中有一句臺辭話，『真正嘅人可以輸掉身體，但一定要贏得靈魂』。
多謝咁多位保衛香港本土嘅朋友，今日係2017年8月22日，我係李倩怡。」
