有青三氣魔術師

過咗中秋，打埋個風，天氣開始涼快；又係大家樂（00341.HK）推出時令單人火鍋斬人一筆吃過貴價晚飯的時候。魔術師身為股東，當然唔會錯過：


這天魔術師去到新裝潢完成的屯門錦薈坊二樓大檸樂晚饍。這所大檸樂頗為神奇，本來生意不差，但約半年前租約期滿便結業不再續租；但過了幾個月，大檸樂卻又在原址重用，只是削了約一半鋪面；而餘下的一半鋪面，卻給商場租給了美帝銀行。美帝銀行佔地下及二樓兩層，而二樓的銀行門口竟然要穿過大檸樂才能到達，都不知是那個天才想出來的走道。
晚飯時間，例牌人地，而且大檸樂的鋪而縮小了，人流就更加擠逼。魔術師要了海鮮火鍋，買完票後便馬上去找座位，只見全院滿座。剛巧收銀員身後有個二人座，其中一個背對住大部分顧客的座位坐了一名戴鴨舌帽的青年，正在低頭「玩電話」，對面的座位則放了一個背囊，桌面上杯盤狼藉，似是早已完事。
果然，有個樓面阿姐走來，問一問那青年，青年點點頭，阿姐便將杯算碗碟收去。
魔術師行上前去，指一指那背囊「坐」着的位子，好聲好氣問：「請問呢個位有無人架？」
青年頭也不抬，只在喉頭咕噥了一聲：「無人。」兩手繼續在「玩電話」，也不知道是不是在打機。
「原來是件有青。」魔術師心想。
其實，夜晚黑在室內，戴住頂鴨舌帽咁突出的造型，唔使問都知，九成係有青喇！
有青繼續忙着「玩電話」，絲毫沒有理會魔術師。
「請問呢個背嚢係咪你架？」魔術師耐着性子，希望有青「識做」；因為無論是以前美顏組的第三世界廠仔定係前僱傭兵的電車男，都係唔講到明唔 specific 唔做的。
「係。」有青回復水平視線，但依然唔望向魔術師。
魔術師開始有點生氣，但依然保持禮貌，劃公仔劃到出腸：「請問你可唔可以拎起個袋呢？」
「我唔想拎起個袋喎。」有青終於望向魔術師。
果然又係雙目無神，三尖八角的笨土相。
睇怕都係如果抱住個背囊，「玩電話」會無咁方便。
「但係呢度 full 哂喎。」魔術師怒火再升，但仍按捺住不發作，再說之以理。
有青回頭望一望，見魔術師所言非虛，卻兀自死撐：「坐多陣都唔得呀？」
魔術師即時升上一般對住佢「拍片」的衝動（對有青來說，被拍片放上網是大殺傷力武器），好不容易深呼吸幾下，才給這般衝動壓下來。
魔術師見有青如此不可理喻，便索性把只裝着一份人言報的斜孭袋放在枱上「霸位」，打算如果叫到魔術師的號碼，便叫阿姐把火鍋端來，自己就坐到有青的背囊上。
「你咪擺囉。」有青冷冷的說，然後又低頭玩電話。
魔術師站了一會，有個阿姐走來，叫魔術師：「嗰邊有個位呀，你過去坐喇！」
「係咩？」魔術師激鬼氣，以諷刺的語氣說出。
這時遠處座位有人離去，阿姐將魔術師帶來，一面快手執枱，一面跟魔術師說：「好多客都係咁架！」
即係咁，魔術師無論是光顧舊居小店，抑或是在連鎖店如大檸樂，都係食完就快走，唔會坐係度發呆撩牙玩手機，用杯奶茶來養金魚；如果見人多有人等位，魔術師更會加快速度，儘快食完，一來唔好阻住人做生意，二來也予人方便。
當然，魔術師無論在小店抑或是在連鎖店，都見過唔少食完嘢仲要霸住個位吹人撩牙捽腳趾的無聊人；後生有，維園阿伯都有，有時明明見到人地一家三口，坐得阿爸阿媽，個仔（青少年）在則邊罰站，無聊人依然係無動於衷，成尊佛咁坐係到唔知做乜。
面皮之厚，家教之缺乏，真在令人覺得比那些「蝗蟲」更差，真係唔好怪魔術師時常嘲諷有青。
呢個無公德，無家教的問題，似乎比「批鬥關愛座」更大問題。
＊＊＊
伸延閱讀：
最後的出前一丁