魔術師也 Me Too？

陶藝才子尋晚（２０１７年１２月５日）在傷台節目肛門頂澄清，話佢細時被老師搣面珠登「性侵」，係用嚟彰顯唔使報警，只需「一篇 Facebook 貼文、一張 selfie」便可以挑起網絡公審、人肉起底，隨時可以搞到「疑犯」身敗名裂，無法辯解的「歪風」；如果呢種「歪風」好似「冰桶挑戰」一樣變成「潮流」被「濫用」的話，又有甚麼方法可以制衡呢？
嘩，咁都可以俾佢兜到，果然係１９才子呀吓！
又諗返，陶藝才子被搣面珠登真係好小事，魔術師小一時唔記得帶功課簿，竟然被肥婆班主任用康樂棋 cue 棍篤眼肚（唔知點解當時每間班房黑板底部放粉筆的地方都會有一枝 cue 棍），感覺就有如眼珠要被挖出來一樣，當場真係嚇到唔識得喊，直到返到屋企先敢同老父講。父親雖然去學校交涉，但當年沒有怪獸嘉獎的勢頭，此事便不了了之。
那位老師叫黃幼娟，退休後好似移民走了，不知現在是否還健在。

講到 Me Too 呢啲尷尬位置，自不然就想起早前左髖骨受傷住院期間，在未做手術前與剛做手術之後，前後兩天，魔術師左腿都無力郁動，遑論大解。雖然醫院阿姐有 offer 成人紙尿片，但以魔術師年紀，實在難以接受坦蕩蕩地被助護「照顧」：要知道做這些事的除了「阿姐」又外，仲有唔少係年青男助護都有！
唯有死忍兩天，直天第三天可以屈到膝，即係可以坐得低，才要求以便椅（即係一張中間座位開洞的輪椅）解決。

以上只係醫院大樓主病房的情況，去到康復大樓就更加 free，唔好以為妹妹仔助護只會去女病房幫手，男病人一樣照「搞」：想不到二十來歲的妹妹仔助護會幫男病人收小便尿壺吧？而且收小便的頻率不低，平均兩三句鐘就收一次，就算平夜三更都會照來。
由於魔術師實在是臉嫰怕羞，在床上小解時既要用被單包實，又要對準俗稱「鴨仔」的尿壺，去時更要撐高自己條腰以預留足夠空間放置鴨仔，唔好倒瀉...

最要命的就是人來人往，一聽見人聲，即刻就唔敢去，搞到心理壓力好大，所以成日都去唔到...
就算去到嘞，又唔知助護幾時來收小便：如果剛收完小便就去，那壺小便便要掛在床側一段時間，徒然影響到自己；如果掌握到時間，則去完助護便來收就梗係好，但如果來的是個妹妹仔，只見她手中拿着仍帶有魔術師體溫的小便，感覺總是怪怪的。
天呀，做乜依家仲諗住呢啲嘢？

＊＊＊
伸延閱讀：
年輕刁民