一、二、N人飯局（2024年4至6月）

 1. 屯市 Food Maze 厚興瑜記手撕雞

早前網友介紹屯市 Food Maze 新開咗間厚興瑜記手撕雞，魔術師新X坑當然就走去試吓，果然見到花籃都仲喺度：

睇菜牌就同卓爾居分店相當類似，不過就開得比較夜，9:30pm 才關門：

魔術師就叫咗個麻辣手撕雞撈麵，送例湯。點知叫凍撈結果嚟咗熱撈，有啲激氣（店員仲問魔術師介唔介意）。算，就當係佢哋試業期間未搞定吧！

魔術師餐單：麻辣手撕雞撈麵（凍變熱），送例湯，埋單＄58。

＊＊＊

2. 焼肉ジャンボ

早前想帶靚姐姐去食中環盛記，等佢第日招呼班手足同事，點知竟然排哂大隊。最後轉去呢間位於萬宜大廈的日本餐廳食燒肉：

（圖片來源：Openrice > 餐廳 > 香港 > 中環 > 焼肉ジャンボ, captured on 20 Jun 2024)

世界真細小，在餐廳中竟然見到靚姐姐公司的客仔共聚家庭樂，證明呢間日本嘢都係「中環精英」的飯堂之一。魔術師跟靚姐姐各叫一個A5黑毛和牛套餐和海鮮套餐，再追加一人一隻和牛海膽刺身，就連前菜、飯和湯都相當美味。

係美中不足的就係個經理粗聲粗氣咗些少，不過可能魔術師接受程度較高，唔多覺去到 Openrice 評語話「態度惡劣」的程度。可能「中環精英」真係唔能夠接受佬聲佬氣的服務吧！

魔術師加靚姐姐餐單：A5黑毛和牛套餐、海鮮套餐、和牛海膽刺身x2、加一服務費，埋單＄1,733.6。

＊＊＊

3. 半島酒店大堂茶座

這天靚姐姐去完半島做 SPA 順便約魔術師在 Lobby 吃個晚餐：

（圖片來源：Openrice > 餐廳 > 香港 > 尖沙咀 > 半島酒店大堂茶座, captured on 20 Jun 2024)

魔術師餐單：烤咖喱椰菜花湯、烤澳洲牛柳、是日雪榚

靚姐姐餐單：烤咖喱椰菜花湯、慢煮法國黃油雞胸、是日雪榚

至於幾錢？每位558，加埋一，靚姐姐請。

＊＊＊

4. 海天花園酒家

以上都係魔術師入院前發生嘅事。至於魔術師出咗院，自不然就同靚姐姐一家人慶祝父親節，去三聖邨食海鮮

（圖片來源：Openrice > 餐廳 > 香港 > 屯門 > 海天花園酒家, captured on 20 Jun 2024)

海鮮由靚姐姐大哥做買手，帶來加工；另外叫咗隻燒雞。魔術師出院不久，只能酌量就住食，不過呢個梅子蒸蟹真係好得：

埋單本來係靚姐姐俾錢，點知張卡過咗期碌唔到，魔術師自然好識做，唔會你眼望我眼。

估唔到最貴係隻燒雞，要＄520；其餘加工費都係$1,000左右。埋單連加一＄1,738。下次試吓容龍睇吓性價比會唔會高啲？