紅隊出沒注意？

相比起身負日夜「唱好傷巷故事」重任的比卡超及其團隊，陳自私呢個疑似跟正苦打對台的專訪反而更貼地更啱聽。唔知咁又算唔算是「紅隊」作為呢？

陳智思專訪｜北上潮影響大過金融風暴　吸客拒鬥平　最緊要有呢樣

香港01 撰文：劉凱欣 出版：2024-09-09 08:01更新：2024-09-10 17:58

北上潮持續，市道淡靜，排山倒海而來的執笠潮，商界肯定最先有感覺。團結香港基金主席、行政會議前召集人陳智思接受《香港01》專訪直言，北上潮的確「好大鑊」，甚至比過去的金融風暴或金融海嘯所影響規模更大。

對於坊間建議減租、減稅救市，他就指，今日危機「殺到埋身」，欠缺競爭力的行業已經「救唔返」，不是說港府願意提供資助，所有結構性問題便迎刃而解，而是要重新檢視自身競爭力，思考如何包裝自己，做到即使人有我有，便可發揮出特色，絕處逢生。他樂觀笑言，「當大家知道死到臨頭，就會開始識得走位，咁多年嚟香港都係咁安然走過，我唔擔心！」

飲食業問題非純減租可解決

但他指，實質上，其實有部分行業如航運等其實不受影響，仍有很大發展空間。不過，亦有部分行業影響卻是致命性，令他亦不禁叫一句「慘喇！」其又以飲食業作為例子，指「其實最高檔嗰啲餐廳無咩問題，因為有賣點，最低檔嗰啲都有好多人幫襯。反而係中間嗰啲，你去到一個價位，既唔係特別好又無咩特色。相比之下，啲人覺得，如果用呢啲錢可能北上性價比仲高，咁佢嘅衝擊就會超大。」

其續稱，這並不是單靠減租便能輕易解決的問題。以餐飲來說，主要有三大支出，食材約佔三成，租金亦佔三成，人工則約四成。「就算租金跌咁啲，人工唔會跌得到，食物成本唔會少好多，所以大家一定無可能鬥平，講平，你點同內地爭？」價錢難以抗衝或對撼，比拼的便是與別不同的特色。

以三地故宮做例子　談吸客之道

陳智思指，人無我有固然最好，但人有我有，就要做到與別不同。當中如何變出新花樣，找出新角度，便是最考功夫的地方。他說，論價格高昂，倫敦和紐約消費比香港更高，但仍有獨特性，無可取代的優點，可以吸引到全球投資者匯聚。香港要走自己的路，自然亦要發揮特殊性，才能吸引別人心甘情願來到。

他又以香港故宮文化博物館為例，在前有北京故宮博物院及台灣國立故宮博物院的夾擊下，如何能打響名堂，吸引遊客，是當時首任董事局主席的他，要思考的問題。「你諗下，北京同台北故宮，佢哋啲藏品數量多到不得了，香港嘅藏品只係得零頭，仲要係借返嚟嘅。三者一比較，好自然會畀人覺得香港最無料，當時我要諗嘅係，人哋點解要嚟香港睇？」

他自問自答，幽自己一默，「唔通我又去整個紫禁城出嚟咩？我哋就算整咗出嚟，都變咗做世界之窗喇。其實我哋最正係有乜？咪維港囉，最終我哋決定用維港做背景，可以望出海，連接中外，用西方手法重新演繹中國元素，特別展藏有中有西，就變咗我哋策展特點，變咗唔係純粹推銷硬件（藏品）數量。」

而經其手筆所開拓的香港故宮文化博物館營運收入，的確「見得下人」。在最新公布2022至2023財政年度報告中，不計利息和投資收入，管理局營運收益按年增長超過4倍，達到5.53億元；香港故宮文化博物館成本收回率達44%，做到與世界不少知名博物館相若。

陳智思指，發展自身特色吸客，並不是代表要與誰競爭，「我有我特點，佢有佢特色，各有體驗可以感受，唔代表嚟咗我度，就代表我贏佢輸。有啲嘢我做到佢做唔到，有啲嘢又調返轉，最緊要有特點吸引到人嚟啫，呢個唔係零和遊戲。但無特點，人家一定會超越你。」

有危才有機檢視競爭力　信港人能絕處逢生

一如現時坊間熱議的熊貓經濟，他亦指，要經營得宜，就要發展出不同特色。「熊貓好多地方都有，點解我唔去四川睇？人哋環境仲自然。海洋公園要做嘅，係要以自己風格，以一樣內容，演繹唔同感覺嘅策展方式。而唔係話，嗱，有六隻熊貓呀，自己睇喇。咁樣點會自動吸引到人，為園方帶嚟新商機？」

陳智思謂，聽到坊間不少人懷念過去經濟發展模式，指希望能回到過去，經濟出事，便一味叫政府打救。他表示，其實不是說港府願意減稅或是提供資助，便能解決實際存在的結構性問題，「政府出手幫一個行業，啲人就會問點解唔幫埋佢。其實有啲行業有得救，有啲未必可以。要重新開始過，係好痛苦，但我哋要重新檢視，自己有咩競爭力，睇下點可以生存落去，而唔係純粹靠人幫。」

不過，他一派樂觀指，今日危機「殺到埋身」，有信心以港人靈活變通的精神，一定能夠絕處逢生，「當大家知道死到臨頭，就會開始識得走位，咁多年嚟香港都係咁安然走過，我唔擔心。」或者，其實絕處求生，才是悠長人生裡，無盡的那場特訓。

1. （陳智思）他就指，今日危機「殺到埋身」，欠缺競爭力的行業已經「救唔返」，不是說港府願意提供資助，所有結構性問題便迎刃而解，而是要重新檢視自身競爭力，思考如何包裝自己，做到即使人有我有，便可發揮出特色，絕處逢生。他樂觀笑言，「當大家知道死到臨頭，就會開始識得走位，咁多年嚟香港都係咁安然走過，我唔擔心！」

哈哈，陳自私的語言偽術真係勁，可以將一句「唔見棺材唔流眼淚」用咁婉轉嘅方法表達出嚟，呢啲先係「職場競爭力」呢！

2. 「其實最高檔嗰啲餐廳無咩問題，因為有賣點，最低檔嗰啲都有好多人幫襯。反而係中間嗰啲，你去到一個價位，既唔係特別好又無咩特色。相比之下，啲人覺得，如果用呢啲錢可能北上性價比仲高，咁佢嘅衝擊就會超大。」

呢個又真。魔術師同靚姐姐去食貴嘢，都見到唔少「高端傷民」幫襯，魔術師一人飯局食快餐（幾十蚊消費）亦座無虛席，反而元氣、千兩、牛角等等百幾至幾百的中價餐廳就少咗人。鬼咩，搭車北上要時間要車費，同食個美心大XX系列的快餐比自然無優勢，但同食幾百蚊比就唔同講法了。

3. 以餐飲來說，主要有三大支出，食材約佔三成，租金亦佔三成，人工則約四成。「就算租金跌咁啲，人工唔會跌得到，食物成本唔會少好多，所以大家一定無可能鬥平，講平，你點同內地爭？」價錢難以抗衝或對撼，比拼的便是與別不同的特色。

咁傷民又係唔爭氣，以前成日講話「大陸地溝油、黑心食材」，到依家就因為服務態度、食品種類、性價比...等等原因而將「至高無上」的食物安全考慮拋諸腦後（反而內地遊客食咗傷巷嘢搞到食物中毒，見伸延閱讀），真係吹脹。

4. 「你諗下，北京同台北故宮，佢哋啲藏品數量多到不得了，香港嘅藏品只係得零頭，仲要係借返嚟嘅。...人哋點解要嚟香港睇？...唔通我又去整個紫禁城出嚟咩？我哋就算整咗出嚟，都變咗做世界之窗喇。其實我哋最正係有乜？咪維港囉，...用西方手法重新演繹中國元素，特別展藏有中有西，就變咗我哋策展特點...」

要推「無處不旅遊」唔係唔得，不過我城最能吸引中外遊客的就是唔收費（催谷唔到消費）的各行山徑和郊野景點，獨私的自然環境唔會同外地景點一樣，旅客自然會有唔同的體驗；反而我城人工打造的「景點」通常都係家家酒形式，就好似陳自私的例子如故宮博物館、海馬公園等等...有「人無我有」的，卻是忠誠派最唔啱聽的與米帝酣民歷史有關的歷史建築物，不過又係即使要收門票、賣紀念品（正字不正確）都唔會賺到幾多錢也。

5. 一如現時坊間熱議的熊貓經濟...「熊貓好多地方都有，點解我唔去四川睇？人哋環境仲自然。海洋公園要做嘅，係要以自己風格，以一樣內容，演繹唔同感覺嘅策展方式。而唔係話，嗱，有六隻熊貓呀，自己睇喇。咁樣點會自動吸引到人，為園方帶嚟新商機？」

自從「熊貓生啤」以來，除妄民酸言酸語軟對抗之外，所有公開的聲音都係善頌善禱，從來無人質疑過「熊貓經濟」是怎樣的一回事。今次陳自私竟敢冒大不違話傷巷有熊貓睇其實都無乜特別，要「鬥」一定「鬥」唔過四訪，要演繹出特別風格才能吸引到遊客。魔術師當然同意傷巷的熊貓真係無乜特別（仲要係 Grandpa 贈送，熊貓寶寶係「雙非BB」），至於「賣點」就持相反意見，新X坑當然可以吸引到遊客，但持續性就成疑，尤其是飲食業仲係停留喺「熊貓餐廳」的層次，甚至海馬公園都只係玩吓派薑醋（猶如「新傷巷人」添丁，見伸延閱讀），可謂無乜新橋 - 唔知嚟緊嘅哈囉喂又有冇熊貓元素呢？

6. 「政府出手幫一個行業，啲人就會問點解唔幫埋佢。其實有啲行業有得救，有啲未必可以。要重新開始過，係好痛苦，但我哋要重新檢視，自己有咩競爭力，睇下點可以生存落去，而唔係純粹靠人幫。」

一字記之曰「不患寡而患不均」，正如中古利是餅廣告：「請得你食，咪要請哂所有人食？」；但更重要是第二點，傷民通常只會磨爛蓆而唔會狠心止蝕，死道友不死貧道，誰人會有自知之明「安樂死」，甚至叫阿仔孭上山，來個「猶山節考」呀？

＊＊＊

伸延閱讀：

信報 2024年9月11日

獨眼

熊貓BB滿月 海洋公園派薑醋

大熊貓盈盈一對龍鳳胎「眨吓眼」已經滿月，海洋公園慶祝添丁，向市民派豬腳薑醋。昨於社交平台預告滿月前夕、即本周五（13日）中午12時舉辦「大熊貓BB滿月有獎活動」，送出815張薑醋卡【圖】，卡上還會印有家姐、細佬的熟睡照片。

名額815個 先到先得

參加方法是要追蹤海洋公園和香港大熊貓兩個官方Instagram帳號，並在指定表格填寫給大熊貓BB的祝福語，最快的815名就可獲贈薑醋卡，得獎者會在9月20日或之前收到電郵通知。不少網民對活動相當興奮，紛紛在帖文留言說期待，有人更提議海洋公園考慮為一對大熊貓BB舉辦百日宴。

海洋公園早前公布大熊貓家姐和細佬分別是在8月15日凌晨2時05分及3時27分出世，園方採用30日的計算方法，決定滿月日子為9月14日。

內地團疑食物中毒　食環署到餐廳採樣化驗　旅監局：追查其他團沒人不適 有線新聞 2024年09月10日

【有線新聞】有訪港內地團懷疑集體食物中毒，11人送院。衞生防護中心及食安中心到團餐餐廳採樣化驗，不排除是食物過早預製或者無徹底翻熱等導致。

有不適的旅客蹲在路邊就地嘔吐，部分人頭暈，亦有人躺在長椅上休息，旅遊巴上有人拿着嘔吐袋。旅客：「（哪裡不舒服？） 全身不舒服。」內地旅行團團長鄒從軍：「晚上他們就肚瀉，開始是兩三個人肚瀉，到今天上午就一個一個倒下，一個一個肚瀉，不舒服。昨天（周一）晚上跟我同床睡一起的凌晨四時就蹲在廁所，蹲到六點多鐘。」11名不適的旅客陸續登上救護車，送到伊利沙伯醫院治理，有人要坐輪椅，頸上掛着膠袋，亦有人帶同行李箱。

旅監局指懷疑爆發食物中毒的兩個旅行團共有63名團友，由同一個旅行代理商組織，星期一抵港，先後在土瓜灣嘉樂軒及金港薈用膳，亦有進食自備食物。食環署派人到兩間涉事餐廳調查，職員落閘，預訂了團餐的旅行團摸門釘，食環署人員晚上帶走兩個保溫箱。旅監局追查發現周一分別有43及26個內地團到過這兩間餐廳用膳，聯絡旅行代理商後，確認無其他人不適或出現病徵。

文化體育及旅遊局局長楊潤雄及旅遊事務署都十分關注事件，已指示旅監局配合食安中心調查。