開心大發現（插播排頭位）：
1. Amazon Prime：《北斗の拳（FIST OF THE NORTH STAR)》
熟口熟面的情節、角色、配合新派 2D＋3D 畫功、完全係回憶殺。唔夠半小時一集，疑似一個星期一集，睇 MV 第一季似乎去到拳四郎三個師兄出現背影為止，等到連載完起碼第一季先至一次性煲，真係唔知等到幾時：
＊＊＊
睇完：
1. Netflix：《哈利警探（Jo Nesbø's Harry Hole）》
傷巷以前叫「警匪片」，但自從多了「黑警」這類角色之後，便跟外電叫「犯罪片」。本片為人言報推介，果然唔錯。劇情緊湊明快，但主角哈利成個不修邊幅的中佬模樣，感情失意會走去酒吧撩交打仲要俾人打鑊金，到後期變到心細如塵，下下將壞人算計，似乎唔太講得通。兩個兇手的殺人動機似乎有點夾硬來，只係查案過程緊湊，暴力畫面亦交足貨（例如將基佬切賓周），同埋結局大決戰一幕，算係上乘之作。最後結尾暗示有第二季。
魔術師評分：85分（100分滿分）
2. Disney+：《特工 Carter（Marvel's Agent Carter）》第二季
Netflix 版的舊 Marvel 在 Disney+ 播，給 Marvel 粉絲作為補足係唔錯嘅。第一季 8 集劇情緊湊幾好睇，魔術師俾到 75 分；但去到第二季 Peggy Carter 竟然四周圍溝仔，連 BLM 黑色腸仔都曖昧一番，跟尾國隊長在 Endgame 穿越返去同佢定情一幕好似唔夾。而且同樣地人物動機有點奇怪和不明不白，無第一季咁好。
魔術師評分：60分（100分滿分）
3. Apple TV+：《君主計畫：神祕組織與怪獸之謎（Monarch: Legacy of Monsters)》第二季
第一季還可以，但第二季開始有啲拖戲，雖然主線任務係做社工要將泰坦巨獸X引返屋企，以對抗邪惡企業，但支線任務主角群走來走去懶緊張唔知為乜，家庭紛爭目標亦唔明確，女主角澤井杏奈角色非常煩厭（對比《幕府將軍》真係差好遠），係本劇扣分位；不過本劇待效出色，劇集做到相當有電影感，挽回少許分數。
魔術師評分：65分（100分滿分）
＊＊＊
將睇未睇：
1. Disney+：《夜魔俠：重生（Daredevil: Born Again）》第二季
睇完第一季之後，第二季就上畫了！第一季明顯只係鋪排新故事線，睇怕第二季都唔會完到，唔知等到連載完第二季之後睇好唔好呢？第三季（估有）上畫時會唔會唔記得哂呢劇情呢？
2. Netflix：《栗子人殺手（Chestnut Man)》第一至二季
第一季已在年前初初訂閱 Netflix 時睇咗，劇情到現在記憶模糊，相信評分不高。本來以為一季完，但最近竟然出了第二季，睇嚟要翻叮才有較公平分數 - 幸好每季都是各六集，要睇完唔係難事。
3. Netflix：《紙房子：柏林（Berlin）》第二季《柏林：抱银貂的女子（Berlin and the Lady with an Ermine）》
又係《紙房子（Money Heist）》的死唔斷去衡生劇。上一季由「犯罪片」演變為精裝追女仔，但劇情尚算緊湊，有能力叫魔術師每日一集追看到尾無中途休息。唔知今次柏林濫交完會唔會惹到性病呢？又，衍生劇咁拍落去，會唔會 crossover「怪獸宇宙」拍返套《東京與哥斯拉》呢？
4. Netflix：《武士生死鬥（Last Samurai Standing）》第一季
浪客劍心時代的古裝刀劍版「鄉下魷魚遊戲」（定係《甲賀忍法帖》？）總之演員陣容頗為豪華，睇得過。可惜第一季只有六集，睇影評好似只講到原著《戰神（God of War）》的第一、二冊，還有第三、四冊未拍，希望唔使等太耐，兩季完到時一次性睇哂。
5. Netflix：《盜墓者羅拉：不朽傳奇（Tomb Raider: The Legend of Lara Croft)》第一至二季
動畫版盜墓者，以 Netflix 的左膠味應該唔會將羅拉畫成大X妹咁政治唔正確？
6. Netflix：《W - 兩個世界（W）》
唔使講，都係睇妄民稱「顏值最顛峰時期」的韓孝周(同《Moving 超異能族》個樣都幾唔同，魔術師睇預告就覺得 Moving 時的韓孝周仲靚啲)。
7. Apple TV+：《末日地堡（Silo）》第一至二季
Apple TV 其實都有好多劇睇，本劇有 Rebecca Ferguson 助陣，共四季暫時只出了兩季，唔使講入咗 list 先講。
8. Amazon Prime：《恐怖民間傳說（Lore)》第一至二季
單元劇式講古唔好駁鬼古，用來攝時間真係唔錯。
9. Netflix：《FUBAR》第一至二季
阿諾主演嘅串流平台劇，《幼稚園特警》式的劇情竟然都可以有兩季（好在第三季被 cancel）。不過，魔術師作為阿諾影迷，睇一齣少一齣，點都會用嚟攝時間嘅。
10. Disney＋：《天龍八部》
CCTVB 搞咗兩對「中年好聲音」出嚟唱主題曲，又可以湊吓熱鬧睇吓完全無刪剪版係點嘅一回事。
其他：《黑鏡（Black Mirror）》：因單元故事，表現飄忽，魔術師暫不評分。
仲有大量動畫、舊劇、紀錄片，包括《陰屍路（The Walking Dead）》、《迷（Lost）》、《GANTZ 殺戮都市》、《二戰大事記彩色版（Greatest Events of WWII in Color）》、哈蘭·科本（Harlan Coben）系列等...未能盡錄。
＊＊＊
期待中
1. Netflix：《武士生死鬥（Last Samurai Standing）》第二季
第一季只有六集，好快睇完就無；等到第二季就會唔記得哂啲劇情又要翻煲，不如等出哂至講。
2. Netflix：《終末的女武神（Record of Ragnarok）》第一至N季
熱血格鬥動畫，但劇情愈來愈似《足球小將》，不斷回憶不斷拖戲，究竟會唔會有大結局寶屬未知之數。
＊＊＊
無乜期待中
1. Netflix：《殭屍校園（All of Us are Dead）》第一至二季
未入坑。如果兩季完魔術師都可以有時間就睇：
＊＊＊
最後貼上魔術師的 all time favoruites 影集/動畫/單元劇/紀錄片頭十名（僅限現時在 Netflix、Disney+、及 Amazon Prime 的非電影類片種)，排名分先後：
1. Netflix:《闇（Dark）》
三季完燒腦穿越神劇，無 bug。
魔術師評分：100分（100分滿分）
1. Netflix:《魔剎（Monster）》
漫畫改編之暗黑系動畫，分鏡出色。魔術師由錄影CCTVB直至買碟二刷，同先父一齊欣賞之動畫之二（另一套就係《銀河英雄傳說》）。
魔術師評分：100分（100分滿分）
3. Netflix:《今際之國的有栖（Alice in Borderland）》第一至三季
遊戲求生劇，漫畫改編。淨係睇囡囡已能完勝，本來兩季好地地可以有 100 分，但第三季實在太無謂，亦無吸睛囡囡（連第二季行行企企的跛妹女弓箭手的水準都無），逼住要扣分：
魔術師評分：95分（100分滿分）
3. Netflix：《狂賭之淵（賭ケグルイ，Kakegurui – Compulsive Gambler）》真人版 第一、二季
睇多啲濱邊美波就要睇呢套劇！顧名思義本片為漫畫真人化劇集，一眾動漫造型的「鄉下妹」上半身給你一式一樣的校服誘惑、下半身就有各式短裙仔裸足或黑絲化身賭神賭聖賭俠任君選擇，當然還少不了每次美波賭身家時的高潮樣（仲要係從不出千），與及一眾「旁白」配角的誇張對白和表情、賭局中主人翁內心戲的場景切換只會令魔術師愈看愈興奮（！），看完只能說句「鄉下妹」顏值真係無得輸，怪唔之得泡菜妹要以整型才可挽回一局。
魔術師評分：95分（100分滿分）
3. Netflix：《混沌少年時（Adolescence）》
演員演技精湛，場景安排出色。尤其是男女警察、心理學家，甚至那些不起眼的角色例如第一集的律師（自嘲現實與及戲內時間過了25分鐘就能到來）、護士、搜身警員、以致第二集的老師和學生、第三集的拘留所看護等。一鏡直落鏡頭穿插走位技巧高超（第二集尾段鏡頭由地下上空中再降落）更添觀賞價值；但成件案嘅邏輯似乎有啲講唔通，要扣分。
術師評分：90分（基本）- 5分（案件細節）＋10分（演員、拍攝技巧）＝95分（100分滿分）
3. Max:《新神探智擒職業殺手（The Day of the Jackal）》第一季
文青造形的職業殺手男主角遠遠討好過 DEI 黑婆「神探」，仲有《紙房子（Money Heist)》的「東京」Úrsula Corberó 做男主角老婆。尤其是第一季雖然都有少許 LGBT 情節，但最緊要係個結局大快人心。
術師評分：90（基本）+ 5（第一季結局反DEI）＝95分（100分滿分）
7. 《紙房子（Money Heist）》
知名西班牙「神劇」，五季完。雖然講到教授幾咁算無遺策，但其中靠不可預測的巧合及符碌的情況亦唔少，真係「好運好過好波」；要睇不如睇女督察（後稱里斯本(Lisbon)）的英姿、奈洛比（Nairobi）的「人事管理技巧」；及東京（Toyko）的西口西面。
魔術師評分：90分（100分滿分）
7. 《新世紀福爾摩斯（Sherlock）》
魔術師最鍾意 attention to details！
|
| （圖片來源：BBC iPlayer: Sherlock, captured on 26 Aug 2023） |
魔術師評分：90分（100分滿分）
7. Amazon Prime Video：《刺客旅館：捍衛任務世界（The Continental: From the World of John Wick）》
《殺神（John Wick）》衍生前傳劇集，講大陸飯店經理 Winston（Colin Woodell 飾）的前半生。酒店接待沙隆（Charon）讚以青年身份出現。有 John Wick 式打鬥，係幾爽幾好睇。本片仲有 Mel Gibson 參加演出。
魔術師評分：90分（100分滿分）
7. Disney+ :《Moving 超異能族》
韓孝周在本片的知性型後生至中女形象（副眼鏡幫咗大忙，做了眼鏡娘直程唔同咗樣），實在太正！
魔術師評分： 90分（100分滿分）
11. Netflix：《The 8 Show》
大橋類似《饑餓鬥室(El hoyo/ The Platform）》的貧富懸殊、社會階層欺壓、為金錢出賣人性、直至最底層的人發出絕望的怒吼（同時也暗示了網紅靠出位嘩眾取寵表演（飲酒飲到死？）賺打賞的畸形制度）。本片好睇過《魷魚（The Squid Game）》。 看來泡菜人民真係好壓抑，才經常有呢類的劇集、網漫流行起來。
另外，本片配樂用心（包括曾在《銀英傳》中採用過的配樂、華格納 Wagner《Ride of the Valkyries（女武神的飛行）》），值得加分。
魔術師評分：85分（基本）＋5分（配樂）＝90分（100分滿分）
11. Netflix：《冥王（Pluto）》
浦澤直樹又一力作，喜歡《魔剎（Monster）》的觀眾不容錯過。劇情改編自手塚治虫的《小飛俠》篇章《地上最強的機械人》，所以有不少手塚治虫的「童真」feel，跟浦澤直樹的暗黑風有少許錯配，而且結局解畫有啲牽強，個人覺的得稍不及《魔剎》和《二十世紀少年》。故事起源於一個似曾相識的背景：中亞國家波斯王國被某自稱世界警察的國家指控藏有大殺傷力機械人，聯合國調查團發現本無此事，但戰爭經已開打，引伸出不少愛恨復仇，人類和機械人（人工智能）的包容與矛盾的故事。
魔術師評分：85分（100分滿分）
11. Disney+：《夜魔俠（Marvel's Daredevil）》第一至三季
本來係 Netflix 版，但因版權問題搬到去 Disney+。魔術師因為「強迫症」關係，睇續集《夜魔俠：重生（Daredevil: Born Again）》前必先睇埋之前嘅故事。第一及第二季幾好睇，尤其是 Venessa （Ayelet Zurer 飾）同埋 Elektra（Élodie Yung 飾）勁靚，蓋過了夜魔俠婆媽：第三季劇情稍微跌 watt。因為隔咗《捍衛者聯盟》，即係又要睇返哂之前幾套 Marvel 劇才能夠「連戲」。
魔術師評分：85分（100分滿分）
11. Netflix:《星期三（Wednesday）》
一次過睇哂兩季共16集，死唔斷氣仲有第三季。添．布頓（Tim Burton）以「愛登士家庭（Addams Family）」的女兒 Wednesday 衍生出來的劇集(添．布頓導演的集數係特別好睇嘅)，劇情以查案加上 Wednesday 的校園生活為主。矮妹 Jenna Ortega 做女主角出色，撲克臉毒言毒語在第一季相當驚艷，第二季雖然能保持水準但就無咗新鮮感。一眾青年演員的表現都相當省鏡，不過兩季之間拍攝時間相隔有啲耐，有演員快高長大個樣會唔連戲。另外做阿媽的 Catherine Zeta Jones 都算係美魔女，同當年《機場客運站（The Terminal）》比有另一種風味。全片被不知所謂的灣灣字幕扣分，例如相對有超能力的「異類（outcasts）」，灣灣直接音譯無超能力的「正常人（Normies）」為「糯米」，不是太低智了嗎？
魔術師評分：85分（100分滿分）
15. Disney+:《美國恐佈故事（American Horry Story）》第一至十三季
季度單元故事，共用相同或類似的世界觀，追看無難度。本來係幾好睇的劇集（魔術師個人喜歡 Season 2《Asylum》、Season 1《Murder House》＋Season 3《Coven》＝Season 8《Apocalypse》），但愈拍愈頹，由第10季開始覺得有啲無厘頭，故事亦開始唔吸引，無乜新意和追看性，加上元祖演員全數退場，無哂癮，追看下去也只是情意結而已。
魔術師評分：（第1至13季平均)80分（100分滿分）
15. Netflix: 《少年法庭（Juvenile Justice）》
呢套係少有可以叫魔術師有心機追落去的韓片，有時仲深宵播放一晚追睇兩集：是關女主角的價值觀啱哂魔術師：年輕唔係大晒，對於窮兇極惡的少年犯，一定要嚴懲，否則佢地只會嘲笑法律的無能。不過，本片結局有啲不太合理，太過正能量：以結局案件的有青之殘忍性格，無可能只在女主手臂上刺一刀，而唔係割喉棄屍；肥婆部長亦不可能在庭上為其慣性草率結案而影響的受害人公開道歉吧！
魔術師評分：80分（100分滿分）
15. Disney+: 《解碼追兇（Signal）》
金憓秀實在太迷人，估唔到當時48歲的女主在過去時間線做20歲出頭的新紮師妹毫無違和感。本劇在逆轉時間線的劇本尚算講得通，但本來應該是正義化身的「電波刑警」卻有不少徇私、鶳之舉，加上個結局為了鋪下一季（結果唔成事）而寫爛咗個尾，美中不足。
魔術師評分：80分（100分滿分）
15. Netflix：《Happiness》
雖然話係喪屍劇，但係沒有一般喪屍片的壓迫感，似乎係影射新冠時泡菜政府對疫情的處理多啲。描寫人性醜惡就寫得幾「透徹」，反派角色又奸又蠢。劇情有些許 bugs，美中不足。好在有韓孝周支撐場面。
魔術師評分： 80分（100分滿分）
15. Amazon Prime Video：《死期將至（Death's Game）》
泡菜仔大學畢業後 7 年都搵唔到嘢做，投資被人呃錢，無錢交租被逼走，又自卑感作祟受靚靚女朋友（又係《超異能族 Moving》的金允貞飾演）接濟食軟飯，要自殺不特止（泡菜國的自殺率滿高的），還要將死亡看成是「低等手段」，結果便要被死神罰死完又死...當中當然又穿插了主角「間接被逼自殺」的前因後果、愛情線和親情線等。最弊就係復仇線有 bug，即使主角具有多個人世的記憶都不等於有能力去做哂呢啲人做到的事也。
魔術師評分： 80分（100分滿分）
15. Netflix：《黑鴿（Black Doves）》
呢個間諜劇劇情緊湊，文武戲處理出色，但牽涉的案件寶在太無厘頭，而且牽涉中英兩國關係，中方無可能咁好相與。女主角 Keira Christina Knightley 勁靚，衰在又要整到個男主角係 gay（夾硬搞到男女主角無感情線？），仲有女殺手二人組似係 Les，呢 part 魔術師最唔鍾意。
魔術師評分： 80分（100分滿分）
15. Disney+:《照明商店（Light Shop）》
《Moving 超異能族》作者又一力作，幾好睇；不過有啲角色唔夠突出，存在感可有可無，但又好似講到好重要咁，人物同故事有點不平衡，較《Moving 超異能族》差。
魔術師評分：80分（100分滿分）
15. Disney+：《異形：地球（Alien: Earth）
異形殺入地球呢個題材本來好吸引，點知本劇無乜殺戳血腥鏡頭（唔啱米老鼠童話文化價值？），卻變成帶有 Woke 文化的左膠劇（例如身份認同之類，甚至乎去到「人人都可以變『處女生仔』」），實在太驚嚇。本劇值得「讀賞」之處係講出「當小屁孩成為世界核心」時係幾咁大鑊，闖禍不負責任，殺人不眨眼，分分鐘恐怖過異形（也全靠成年人演員演活小屁孩的神情與小動作）：
魔術師評分：80分（100分滿分）
＊＊＊
伸延閱讀：
信報 2026年4月14日
許志宏 電視講座
北歐神探智破兇殘奇案 犯罪小說天王親自編劇
第一次接觸挪威史上最暢銷作家、「北歐犯罪小說天王」尤奈斯博（Jo Nesbø）的作品，是改編自他小說《雪人》的2017年電影《雪中罪》。當年入戲院前滿心期待，可惜看後如大眾評價一樣，感到失望。
失望的不只是觀眾，奈斯博本人也表示電影跟原著出入很大，「並非我的故事」。這次在Netflix上架不久、同樣改編自他小說的劇集《哈利警探》（Jo Nesbø's Detective Hole），奈斯博親自操刀擔任編劇與負責人（Showrunner），備受好評，本月上旬位列IMDb最受歡迎劇集第四名。
此劇雙線敍事，一邊是連環殺手奇案，另一邊是腐敗的警察，構成一套黑上加黑的懸疑劇。
《哈利警探》以奈斯博筆下最著名的哈利霍勒（Harry Hole）警探系列命名，該系列原著小說多達13冊。
這一共9集的劇集，改編自2003年出版《魔鬼的法則》（The Devil's Star），同時糅合另外兩本系列作《知更鳥的賭注》與《復仇女神的懲罰》部分情節。
哈利是一個非常聰明卻在酒精中不能自拔的警探。故事圍繞一宗發生於挪威奧斯陸的連環兇殺奇案——兇手於殺人後留下星形紅鑽及「五角星」圖案（因此英文原著小說名為The Devil's Star）；更令人心寒的是，他會切下受害人一隻手指，每名受害人都不同，A被割下食指、B是中指……讓奧斯陸的警察極為頭痛。
節奏明快巧思多
另一邊廂，哈利身邊的高級警探湯姆的黑暗程度絕不比連環殺手弱。這位「正義的執法者」，表面型英帥靚正，名車豪宅通通不缺，但人心隔肚皮，他會以兇殘手段殺人、走私武器、插贓嫁禍，全部視若等閒，一直為背後的神秘組織辦事以換取豐厚收入。
哈利就在這兩邊的折磨下艱苦地調查真相。
劇集節奏頗明快且在結構上甚有巧思，例如第一集開始已提及一宗殘忍的銀行搶劫兇殺懸案，想知道真相？不好意思，雖然這只是一條小支線，基本上與連環殺手案無關，但仍要在最後一集才揭曉真相。
第二集起，「五角星」命案登場，自此該奇案與黑警湯姆兩條緊張懸疑的主線一起推進劇情。
要稱讚奈斯博，他除了擅長寫小說，撰寫劇本也甚有心得。《哈利警探》故事內容豐富、節奏佳之餘，每一集結尾都收得好，有時是一些「爆點」，有時則是意味深長的情節，加上好的偵探故事本已讓觀眾渴望知道真相，令人欲罷不能地追看下去。
主角性格兩極化
不同於某些典型帥氣完美的名偵探主角，哈利孤僻、酗酒、有心理創傷及感情煩惱，是個非常貼地、自身問題一籮籮的警探。觀眾不會見到他優雅地穿着西裝，坐在舒適的辦公室，只聽別人講述案發經過，三扒兩撥就能推理出整個犯罪過程與真兇身份。他穿T恤牛仔褲，臉上永遠有鬍渣加skinhead，比起警察，倒更像古惑仔。
反觀暗黑警察湯姆，西裝骨骨，髮型永遠set得一絲不苟，加上俊朗健碩的外形，從外表看來，他更像典型的名偵探及主角。這也是奈斯博高明的地方，猶如《天龍八部》中的慕容復，書中形容他面如冠玉、武功深不可測，世人眼中是人中龍鳳，卻原來心胸狹隘且陰險。其實湯姆心理也不正常，冷血之餘亦非常自戀。
充滿缺憾但正義感強的哈利，與道貌岸然的湯姆形成極強烈對比。跟一些成功故事一樣，劇集以深入的方法，帶出內心黑暗的人，不一定面目猙獰，有些會帶着虛偽甚至相當漂亮的面具去待人接物。
夜景調色不自然
至於連環殺手案，「五角星」的宗教意味令案件增添大量神秘色彩。「五角星」正立時（頂點向上）通常代表神聖，倒立（頂點向下）則與魔鬼崇拜有關。加上兇手會留下他以變聲器讀出《聖經》經文的錄音帶，各死者間又似乎毫無關聯，令兇案更撲朔迷離。去到尾二那集，哈利推理出真兇身份，而當中憑藉的決定性證據很黑色幽默，貫徹這套從頭黑到尾的Nordic Noir（直譯為「北歐黑色」，即北歐犯罪小說與影視作品）。
與其他Nordic Noir作品一樣，本劇攝影風格冷峻，經常拍攝夜色中的城市景觀且運用低光源，展現了灰灰冷冷的挪威。然而，奧斯陸風景雖美，有時劇中夜景的調色用力過猛，導致有點不自然。這方面，黑暗大師大衞芬查（David Fincher）在畫面美感上的處理顯然高明不少，而提到他並非沒有緣由，因為他曾執導改編自經典北歐犯罪小說《龍紋身的女孩》電影版。
另外，劇中某些情節也有不合邏輯之處。例如首集女警碰見湯姆做壞事，她的處理手法被許多網民評為「智商不在線」，以致下場悲慘。總括而言，《哈利警探》是一套讓人看得滿足的懸疑劇，其獨特的背景及設定都令人眼前一亮。
沒有留言:
張貼留言