奇異博士Ｋ

早前有讀者問魔術師點解無乜寫博士Ｋ，原因好簡單：就係因為最近呢幾個月個舊同事 Whatsapp group 都「比較靜」，唔係話無 junk messages，而係成日都有 junk messages，不過內容都係都市閒情式猜謎語、整下嘢食、賞下花咁，成班舊同事返工好似等退休咁；再唔係就係怪獸家長式幫港孩問功課，十足去咗ＢＢ王國討論區咁，真係 quote 來都嫌廢事。
之但係，銅油酲始終都係裝銅油嘅，博士Ｋ姣婆又點會守得住寡呢？話口未完又有奇異行為大放送：

魔術師自己就未請過外傭；堂家姐就請過一個，負責照顧年邁又郎嚟嘅伯娘（直至終老，見舊文《難為堂家姐》），魔術師去過堂家姐家幾次，個印傭都幾親切有禮，又會講我城方言，係個幾好的老實人。
魔術師可能係生活圈子問題，其他親戚朋友唔多請外傭，所以聽見唔好嘅外傭的例子唔多，應該係話，所有唔好嘅例子都係由博士Ｋ度嚟（見舊文《博士Ｋ警訊》），其他偽中產舊同事都無乜點講過類似的事件。
所以唔通真係有咁嘅主人，就請到咁樣嘅傭人？點解博士Ｋ請親外傭都好似無次好嘅咁？
聽博士Ｋ口氣，佢似乎唔係好相信菲傭會死老豆老母，而係認為「衰母」係個菲傭嘅藉口，想呃多幾日假？究竟呢個係菲傭延長假期的 common excuse，抑或係博士Ｋ只係在以己度人？話說當年仲興 root iphone 的時候，博士Ｋ就最鍾意用 cracked iphone app 可以慳返一蚊半蚊來在一眾同事面前認叻；前幾個月又興在７仔門前打書釘 photo shoot iMoney 再 whatsapp 俾各位同事／舊同事並沾沾自喜架喎。
又，根據勞工處，外傭好似無 compassionate leave 呢一樣嘢，咁就算要 extend 都只會扣 annual leave，外傭唔會着數咗架喎？

另外，博士Ｋ佢又好似唔係幾鍾意個菲傭用 whatsapp 同佢請假。魔術師真係孤陋寡聞，唔知外傭請假通當有乜手續？要填 form？定要寫 email？
炒佢，你阿博士Ｋ都只係補返一個月人工（四千幾蚊）同埋假期 encash（咁個外傭 extend 咗假期仲好喇，俾少幾日錢），斷估呢位外傭做得唔耐唔會有遣散費／長期服務金；俾盡你５,０００蚊送走瘟神，以博士Ｋ收入／身家應只是九牛一毛吧？
唔炒佢，佢放多幾日假先返嚟，「整蠱到個主人，叫佢失哂預算，又請唔到其他人」，呢招「高招」又對個外傭自己有乜益處？

而最令魔術師唔明嘅係，博士Ｋ send 呢段嘢出嚟究竟想點？嗱，既然博士Ｋ認為呢位外傭咁唔老實，「用人不疑，疑人勿用」，假如個菲傭放完 extended annual leave 返嚟，咁你阿博士Ｋ仲俾唔俾個家佢去 operate，煮飯湊細路？
要佢俾幾千蚊炒人又唔捨得；要人地留低幫佢做嘢，但一有突發通知就倒瀉籮蟹，無 backup plan 好似無咗個菲傭屋企就 operate 唔到，只會識得係度鬧，似乎博士Ｋ個 Project Management Profession（PMP）都幾沽名釣譽下。
＊＊＊
圖片來源：
以上勞工法例截圖來自勞工處：聘用外籍家庭傭工　僱主須知
＊＊＊
伸延閱讀：
PMP快速攻略
博士Ｋ警訊
難為堂家姐