回頭草（2nd edition）

自從魔術師祼辭之後，兩個月以來都有 hea 住搵下工，而最令人感到困惑的就是當魔術師一 update 自己份ＣＶ上去網上求職平台，就即時會有大量 HR recruiters 打嚟問長問短，仲要問來問去都係三幅被，例如你做過啲咩嘢 projects 呀，有無得逐個 job title 詳細講清楚呀，舊公司的 organisation struture 呀，點解辭工呀，期望新工作可以俾到啲乜嘢你呀... 之類之類。大佬，你只係 agency 幫人駁腳鋪橋搭路，使唔使查家宅咁查啊？有時呢啲 agency 就連 job description 都無添，就係咁問問問，問到人極度煩厭。況且答完你，你會唔會幫魔術師 send 份 CV 出去都無人知，真心唔明呢班 recruiters 係搞乜鬼嘅。佢地都係靠介紹員工問僱主收佣，不成功不收費（佣金應該係以員工薪金為單位計算），成日打嚟白墥唔浪費自己時間嘅咩？
咁耐以嚟，最離奇嘅就係有三間 agencies：
１. 有港女 agency 求其見到魔術師做開 website 同 mobile app projects，就介紹去見所謂的 digital jobs...結果，人地係要做 digital projects for business workflow transformation，完全都唔啱瓦。
２. 有件疑似賓妹 agency 在 LinkedIn 同魔術師傾得好好地，仲約魔術師上去 office 面談；魔術師見呢間 HR 公司都係大嘢，應該唔會呃人，便上去望望。點知上到去，佢啲同事話佢放咗工...頂，放人飛機都得？
３. 又有件海龜唐仔在 LinkedIn 同魔術師傾得好好地，仲約魔術師上去 office 面談。魔術師見間公司亦都係大嘢，便上去傾一陣。初頭都覺得 okay，海龜仔仲好細心咁問魔術師肯唔肯接 contract job，怕唔怕唔穩定俾屋企老虎詐型。魔術師不虞有詐就話自己單身...點知，海龜仔的話題就開始失控，話自己一個人住，都係單身，無聊時會打ＪＪ，方便快捷又唔使沖涼，好過去ＬＫＦ溝港女ＯＮＳ云云...魔術師見此君基味甚濃，頓覺「誤墮求職陷阱」，其時已過該公司辦公時間，眾人已放工，會議室中孤男寡男，為免被扑，魔術師便馬上打圓場閃人算了。
＊＊＊
魔術師都有強烈考慮緊好唔好轉行做投資顧問，就連證券試都考埋（魔術師手握 CFA Level 3 exam passed，足夠豁免其他好多份卷便能領有牌照，所以只需要考 HKSI paper 1），不過以魔術師性格，絕對唔接受銷售以保險包裝的任何類型投資或儲蓄計劃（但事實上魔術師的確又有好些平日都唔見佢地講投資的舊同事轉行做呢類「偽 Financial Planner」，唔通呢類產品在我城真係咁好 sell？）；如果只係做 investment firm 或 broker 的 Relationship Manager 又會受「個人投資持倉披露限制」，又或者逼住用返自己的經紀行（魔術師的大貓、美帝、同埋最緊要的ＩＢ戶口呀！），呢幾樣嘢係未深入暸解之前，魔術師都唔想轉住，以免恨錯難返。
＊＊＊
好在，就在魔術師考完證券試無耐，一間來自李加坡的 agency 就話舊公司的另一個部門請人，仲要係要搵個知頭知路，清楚明白公司、部門制度及文化的人；坡仔 agency 話市面上無魔術師呢類（2nd edition：係舊公司）做咗十幾年而又游手好閒的人，呢份工非魔術師莫屬云云，最緊要就係魔術師唔好嫌回頭草唔好食咁話。其實食回頭草又有乜所謂呢？呢份工雖然又係 contract term，仲要係 agency contract（即係真正出糧俾魔術師的僱主其實係間 agency），福利當然無咁好，但人工仲比舊公司分手時多幾千蚊（當然更加比前僱傭兵公司多）。Don't take it personal，舊公司當年話要分手，依家又要用更高人工請返魔術師（仲要俾佣 agency），只係顯得舊公司自己傻仔而已。
返去舊公司見完工，一拍即合，舊公司的 HR 就要開始 background check，魔術師亦樂於將證券試張 cert 放埋一邊備用。魔術師見今年合約雖然只係到年底，但個 project 一搞起碼搞兩年，反正都係合約工，到時再續約再叫高啲價都未遲；而且依家返工合則來不合則去，contract 同 permanent 分別其實不大，少啲福利多咗現金隨時仲要着數啲。

而且，做 project 嘅嘢，專心一致個一個 project，質素點都會好啲，工作滿足感都會高啲，依家舊公司呢份新工作應該可以做到呢一點；唔會好似前僱傭兵公司咁，接埋啲 jobs 又散又亂，銀行、保險、公用事業、甚至乎和理非非大唱Ｋ、同埋英超球會都有，明明專心做緊一個 project，當另一個客打嚟又馬上要轉 channel 去管另一啲範疇嘅嘢。魔術師唔係唔能夠 multitasking，但不停咁轉話題的確係會令到自己心散同埋容易出錯。
＊＊＊
唔好唔記得，自己強積金自己管，好在前僱傭兵公司同舊公司新部門（經坡仔 agency 出糧）都係用大貓，要轉戶口都好容易：

強制性公積金管理局 > 僱員 > 在轉換工作時該怎麼辦當你離職時，你的舊僱主會以書面通知受託人你已離職。在收到通知後，受託人會發信給你，要求你指示怎樣處理上一份工作的累算權益。你可以選擇:
把累算權益轉移至新僱主為你開立的供款帳戶；或
如你在其他強積金計劃下已持有個人帳戶，可把累算權益轉移至該帳戶。

而返新工時，員工仲有免供款期：

強制性公積金管理局 > 強積金制度 > 強積金制度的特點 > 供款免供款期
就一般僱員而言，僱主須從僱用期首日開始作出僱主部分的強制性供款，但僱員則享有免供款期，無須為僱用期首30日作出僱員部分的強制性供款，亦無須：
(i) 為在緊接該30日免供款期後的首個不完整工資期作出供款（如僱員的工資期是一個月或短於一個月）；或
(ii) 為受僱第30日所在的公曆月作出供款（如僱員的工資期長於一個月）。

最後，原來舊公司計離職時的「日薪」係用２２日去除，而前僱傭兵公司張約就無寫，魔術師離職時便詐詐帝帝用３０日去除，乘機俾少啲（唔知 no paid leave 係咪又係用 ３０日去除呢？得閒要問返班不惜買假都要去旅行去到盡的小妹先！）。呢啲都係大公司同細公司的分別，魔術師依家轉做 agency contractor，呢一方面亦都要 pay attention to details 先得。
＊＊＊
伸延閱讀：
強制性公積金管理局