逆工管思維（二十六）之當我係羅拔

 上文《逆工管思維（二十五）之劣幣驅逐良幣》講到魔術師話要走，搞到看守領隊同人治部阿姐Ｄ大驚，猛咁話要留魔術師。事實上，魔術師已經好好人，上星期收到 offer 並 accept 了之後便口頭上通知看守領隊，話一星期後會簽約。看守領隊馬上安撫魔術師，話魔術師係 key team member，好想魔術師留低，於是便馬上叫人治部阿姐Ｄ來給魔術師「訪談」。

阿姐Ｄ問魔術師明明做得好好地，眾管理層和各部門同事都對魔術師有好評，魔術師當然數說了光頭Ｍ一輪，一係就偷賴唔做嘢，踢一腳郁一郁，叫嗰樣做嗰樣，連帶嘅配套工夫就唔理、或者做最 minimum，再唔係就做埋啲毫無價值狗屁不通的「同事間考核」。總之光頭Ｍ日日扮工有糧支，話就話請佢返嚟幫輕魔術師，但結果就要魔術師成日望吓佢睇唔睇得住條細 team，完全係負資產表現。魔術師細心、寫文、溝通清晰、有交帶、自動自覺預視到要做的工作並提早完成，想別人所想，唔使人問已經可以準備好答案...咁多功能是 set 高了公司條 bar 的，魔術師走咗，公司條 bar 咪又降返低好似以前咁囉 — 最基本的例如電車部寫嘢俾 Marketing 睇，淨係識講「this release」、「next release」，唔知頭唔知路的人真係唔會明白，係魔術師調教返班電車人，要佢地寫清楚係「release version 2.01，20 May 2022 出」之類。公司就係連呢啲咁細微嘅嘢都要 tune，魔術師肯挺身而出做個 role model 改變個 culture，即使由小事做起都好，各部門當然歡迎喇。都係嗰句，如果光頭Ｍ係合格的話，魔術師的 role model 又算是甚麼？公司可以俾光頭Ｍ過到試用期，即係話佢表現合格，又叫魔術師情何以堪？

仲有就係魔術師本來係呢間公司在２０２１年經艇仔聘用的僱傭兵，在２０２２年以後公司政策轉變，變返直接經人治部請人，光頭Ｍ就係咁搵返嚟。雖則最近看守領隊話魔術師係 key team member，想轉魔術師做「親生仔」，但人治部卻遲遲未有行動。魔術師搵新工由面試到出 offer 都過完都過完都未見呢間公司的人治部有任何聲氣，彷彿唔提就唔存在，而光頭Ｍ竟然可以「親」過魔術師，亦令魔術師呢位「key team member」頗為介懷 — 雖然唔知光頭Ｍ人工幾多，但福利假期等一定好過魔術師呢位僱傭兵囉！

人治部阿姐Ｄ聽完魔術師數說光頭M一輪之後，竟然提「如果調走光頭M，咁魔術師能否留低」？

今次到魔術師大吃一驚，阿姐Ｄ咁都講得出，因為要挽留員工，可以話調就調，即是光頭Ｍ在公司是甚麼地位？如果光頭Ｍ係「可以被犧牲」的話，咁當初點解又留低佢？僅僅係因為「請唔到人」，所以「多個人多雙筷」，「多個人幫手都係好事」，於是就唔理佢帶來是正影響還是負影響，甚至財務上光頭M的表現值唔值佢呢個人工？雖然魔術師唔知光頭M收幾多，但以在「楓葉國」讀書（咁似舊同事Ｓ嘅？），有超過２０年相關經驗，又有乜Ｑ１９ cert，上工前仲要在勾豬滑雪度假...點睇光頭Ｍ都唔會收得平也。

由於魔術師話已經 accept 咗 offer，唔會留低，看守領隊同阿姐Ｄ點扭都無結果，只能退而求其次因為「搵唔到人」接替，要魔術師跟新公司講可唔可以再 extend 多一個月，但又係慢咗一步：一來佢地提出呢個要求的時候，都已經過咗幾日，新公司已經準備好合約叫魔術師簽，無理由再改；二來魔術師係頂唔順光頭Ｍ至走，無理由要答應再篤眼篤鼻多一個月吧？

其實為咗愈早走愈好，魔術師強烈要求以餘下的５天有薪假期（份僱傭兵合約只有一年１２天有薪假，刻薄到爆）抵銷一個星期的通知期，人治部竟然未能即時答應，又要同看守領隊扭一輪，話想魔術師留到最後一天，寧願俾錢buy out 啲年假咁話。魔術師頓感自己變了「羅拔」：３４歲的羅拔・利雲度夫斯基（Robert Lewandowski）乃拜仁慕尼黑（FC Bayern Munich）的世界級射手，由於拜仁高層想搵明日之星代替開始年老的利雲，所以拖住佢份合約唔傾唔續，結果利雲公開在傳霉講話自己想轉會去巴塞但拜仁唔俾，唱到拜仁有咁衰得咁衰，拜仁作為德國班霸、世界前列強隊之一，當然不容有員工玩嘢，要利雲準時歸隊操練，直至完成合約；事情鬧咗一輪，直至拜仁搵到新兵代替才放羅拔仔走人（見伸延閱讀）。魔術師即場想發作但諗住仲有份 reference check 要人治部阿姐Ｄ填，只好忍咗呢口氣話魔術師已經計好哂做嘢的進度，在最少影響的狀態下離職，希望大家都大家好嚟好去喇。

今日的最新清息係話看守領隊話在隔離 team 搵到後生仔Ｒ來頂魔術師個位，直至請到新人為止，於是魔術師「以假抵銷」的計劃也成功達成。Ｒ仔個樣都算醒目，話頭醒尾的，應該可以信賴。

又，魔術師最憎就係 reference check，基本上係逼住你同舊公司打好關係才可以走；諗諗吓，好似利雲咁實力是世界公認咁勁，當然唔怕有衰老闆寫衰份 reference letter，但一般工資奴就做唔到，結果就要揸頸就命。

不過又再諗，點解依家啲有青辭職都好瀟灑，又好似唔怕有任何 reference check 咁，究竟佢地個轉工遊戲又係點玩法嘅呢？

＊＊＊

伸延閱讀：

逆工管思維（二十五）之劣幣驅逐良幣

信報 2022年6月8日

咖哩略 體盡中西

「仁」心已死 決裂必至

《一代宗師》的梁朝偉講過「只有眼前路，沒有身後身」，誠如波蘭球星羅拔利雲度夫斯基（Lewandowski）的當下處境。這名拜仁慕尼黑中鋒畫公仔畫出腸，講到明寧願反面，也要離隊他投，自斷後路。既然如此，拜仁又何必苦苦糾纏，放過別人，也就是放過自己。

「忠誠和尊重較生意更重要。」今季歐洲金靴獎得主利雲度夫斯基接受祖國傳媒Onet sport訪問時單刀直入，開門見山表示：「現在我只想離開拜仁，最好的方式是一齊解決問題。」

「過往多年我一直鞠躬盡瘁，全力以赴，惟那團火已經熄了，我想離隊為生命尋找更多的激情。」這名波蘭中鋒去意已決，繼上周與高層隔空駁火後，再次公開要求拜仁放行，並強調非「君」不嫁，「除了巴塞隆拿，不會考慮其他報價，我已在西班牙買樓，也能說一點西班牙文。」

勉強無幸福，利雲度夫斯基暗嘲球會「反轉豬肚」，又直言拖下去對雙方也沒好處，「假如其他球員見到今日發生在我身上的事情，還敢加盟拜仁嗎？我在這裏度過了8年美好時光，就算有傷在身，有需要的話也會上陣殺敵，只希望結局是好來好去。」

或買斷合約

哪怕人家身在曹營心在漢，拜仁主席希拿（Hainer）毫不退讓，實行強硬應對，「他有合約在身，合約就是合約，他不該對外表態，至少我不會這樣做。」然而，「羅拔佬」表明心跡後，有傳拒絕參加季前集訓，最壞的打算是自掏腰包，斥資2400萬歐羅買斷最後一年合同，果然有錢就是霸氣。

「我不擔心他會離開，也相信下季他仍會効力拜仁。」希拿斬釘截鐵排除轉會的可能性，「一來球隊會挽留最好的球員，二來球隊不需要為錢賣人。」球場如商場，說不定拜仁這招只是拖字訣，事關斟介利物浦前鋒沙迪奧文尼（Mane）被嫌出手低，又向巴塞企硬要求4500萬歐羅轉會費，再加上本土翼鋒基拿比（Gnabry）亦受國外豪門青睞，此刻「三」頭不到岸，當然不敢貿貿然大開方便之門。

平心而論，即使利雲度夫斯基自2013年以來只曾倦勤24場比賽，但8月就滿34歲，已經步入黃昏之年，拜仁趁機改朝換代未嘗不是好事。再說，「羅拔佬」於2018年2月聘用著名經理人薩哈維後，幾乎每年夏天均與豪門眉來眼去，亦曾差點過檔皇家馬德里，分手不是預期之內嗎？

人情與道理

所謂無功都有勞，這名波蘭國腳由多蒙特成「仁」後，幾乎每場射入一球，橫掃8屆德甲、歐聯、世冠盃和德國盃等錦標，絕對是延續王朝的核心支柱，反正「唔係等錢使」，做個順水人情，豈非更能贏得人心？當然，人情還人情，數目要分明，作為全德國財力最雄厚的球會，只要願意推開談判大門，聽取所有買家的報價，哪怕「羅拔佬」之後仍堅持非巴塞不投，民意亦會自然逆轉，免得兩敗俱傷。

由處理前帥費歷克（Flick）、中堅謝路美保定（Boateng），到當紅炸子雞艾寧夏蘭特（Haaland）等連串敗筆，連日來需由上頭開腔還擊「羅拔佬」，突顯拜仁體育總監沙歷咸美斯（Salihamidzic）無能失責，力有不逮，導致局面覆水難收。不過，緣份已盡，努力也徒然，世事往往是錯有錯着，揮別錯的人，才能和對的人相逢，不是嗎？

信報 2022年7月20日

球千仞 場內場外

巴塞算點先？ 買人唔使本！

西甲豪門巴塞隆拿疫情下爆發債務危機，近18個月一邊欠債一邊簽人，至今羅致11名球星之多（見表二），連皇家馬德里、曼城恐也無如此「財力」、「魄力」！巴塞會長拉樸達（Laporta）周一在美國豪言：「接下來買後衞，將球隊變成球壇典範！」

球千仞早在十多年前已發現怪象，有電視財仔廣告：男主角帶女友旅行，臨上機發現銀両不夠，於是在對方慫恿下打電話借錢搞掂，最終換來一個香吻。當時不禁心想：豈有如此使錢觀念？萬一回程落機分手，儍仔豈不獨力還錢？

拖1.2億轉會尾數

後生仔情到濃時都算，想不到堂堂巴塞隆拿更離譜。英國《太陽報》引述《馬卡報》去年初財務報告，原來巴塞拖欠轉會費達1.26億歐羅，影響球會多達19間。最大筆「拖數」是2018年以過億歐羅買利物浦的菲臘比古天奴（Coutinho），卻有2900多萬尾數未找（見表一）。

巴塞隆拿的財技已漸漸露出水面，靠球會歷史作招徠，令一些仰慕之輩上門，今夏自由身加盟的車路士中堅安達斯基斯坦臣（Christensen）就是例子，他在小學作文《我的志願》寫道：我希望將來成為職業足球員，夢想為巴塞隆拿披甲。難怪，他上季一直堅拒續約，等到夏天一圓兒時夢想。

豪門勁旅最歡喜有夢想的新星，那意味着可以調低薪水和轉會費。11名近18個月羅致的球星中，大多數都不是為錢而來，像巴夫韋迪本身是富豪，只為一嘗為巴塞出戰滋味；回巢的老將丹尼爾艾維斯，一方面為爭取參加卡塔爾世界盃，另一方面也為支持老友教練沙維（Xavi）。

拉樸達在不斷按計數機，他最愛簽已滿約的球星，一旦加盟後有表現，就能出售賺回一筆。荷蘭國腳迪比（Depay）、艾歷加西亞、奧巴美揚都是例子，就連名氣欠奉的巴夫韋迪，近日也得到荷甲阿積士看中，多多少少帶來幾百萬歐羅收益。

巴塞隆拿可以一路叫窮，一路周圍買人簽人，今夏羅致拉芬拿比洛尼、羅拔利雲度夫斯基（Lewandowski），合共燒掉1億多歐羅！令陣中多達7名前鋒之多，如此「豪華」的攻擊線，連皇家馬德里、曼城都自嘆不如，只有巴黎聖日耳門和利物浦能比擬。

「我們要有不同類型的前鋒，利雲度夫斯基就是入球機器，我們還有安素法迪（Fati）、費倫托利斯（Torres）、奧士文尼迪比利等其他選擇。」拉樸達接受訪問時不禁自豪地說，他還預告買人行動陸續有來，「我們會買人增強後防，讓教練沙維建立足以成為球壇典範的球隊！」

球千仞以為巴塞已忘記安素法迪等青訓好手，這些新人們還有機會正選登場嗎？巴塞今夏更將列基佩治（Puig）、奧斯卡文古沙（Mingueza）等一手培養的球員們放棄，讓各人獨自操練尋找新東家，這樣對待自家產品，實在令人不寒而慄，以青訓聞名於世的巴塞，未來發展令人十分擔憂。

前任巴塞會長巴杜美令球會債務告急，拉樸達儼然救世主般出現，起初使人期待有新財技，慢慢改善赤字情況，如今看來是在耗盡球隊的傳統和未來。這一批懷着赤子之心加盟的球星，包括最近續約的迪比利，他們很快會發現上當，拉樸達並非要重用他們，而是最終要轉售圖利。

7前鋒人滿為患

就拿人滿為患的鋒線為例，利雲度夫斯基和奧巴美揚都是打中鋒，根本是一山不能藏二虎，還不算迪比、費倫托利斯兩位後備之選。側擊方面，迪比利、安素法迪、拉芬夏比洛尼都是好手，教練沙維如何分配好比賽時間？難怪，會方一直在施壓要迪比、法蘭基迪莊接受離隊現實。

巴塞轉會特別麻煩，利雲度夫斯基的加盟手續周一未完成，會方稱是文件出了問題。其實，歸根究柢是一些球星未能離隊下，薪酬空間不足以註冊新球員。一邊請人，一邊趕人，巴塞不久恐被列入「賴皮」豪門名單！