魔術師的伊謝爾倫日記: 積壓如山煲劇單（2023年6月）

繼《積壓如山煲劇單（2023年4月）》之後過咗兩個月，終於完成了 pending list 中的幾部劇，真係辛苦哂：

睇完

1. Netflix：《獵魔士：血源（The Witcher: Blood Origin）》

基本上係個全新前傳故事，由吟遊詩人 Jaskier 聽神秘女子講故事倒敍講起第一個獵魔士的來源。又係左膠大愛包容要由黑妹飾演革命軍頭領，反抗邪惡的白人公主的故事，中間再搵化咗個廢老妝的楊紫瓊做天下第一劍，夠哂平權。故事平淡無驚喜，可看可不看。

魔術師評分：60分（100分滿分）

2. Netflix：《拉契特：黯衣天使（Ratched）》第一季

廣告話係《飛越瘋人院（One Flew Over the Cuckoo's Nest）》的惡惡護士的前傳，搞到魔術師都花咗兩粒鐘去補返《飛》片。《飛》真係唔錯，但本片只係用個相同角色名，故事線完全獨立，唔睇《飛》補習都睇得明，而且本片仲衰左膠到無端端講到女主角係女同志。其實唔跟角色名，變奏成為《美國恐佈故事（American Horry Story）》另外一季都可以，反正啲導演同某幾位演員都係「來來去去」那幾人。

魔術師評分：60分（100分滿分）

3. Disney+:《心冤（Stained）》

本巷劇係以一條主軸串起幾單由現實案件改編的故事而成，類似的講故事手法並不罕見，魔術師不久前才完成的《解碼追凶（Signal)》便是一例；但本片相對起來劇本甚為粗糙，主線劇情要到最後一集才有進展，其餘集數的單元故事對主線劇情推進毫無幫助，角色背景性格、人物關係鋪排亦見混亂不一致，popo 架構太兒戲，話停職就停職，話復職就復職，隨意到完全無理由可講。演員尤其是配角亦見違和感，尤其是第一單案年，故事講述小女孩幾歲被綁架，十年後再被綁架，但演員竟然變成廿到尾的巷女，實在叫人難以信服！雖然本片結局明顯未完，但會否有第二季實在成疑。

魔術師評分：25分（100分滿分）

未睇待睇

1. Netflix:《黑鏡（Black Mirror）》：第六季

第一至四季相當之神，第五季稍有跌 watt，第六季會繼續追落去。雖然是單元劇，唔排除會返煲二刷之選。

2. Netflix:《末世列車（Snowpiercer）》：第一至三季

第三季已上畫好耐，依然未見第四季，唔知會唔會爛尾。有時間可完成之。

3. Netflix:《Fubar》

久違了的大隻佬再現《幼稚園特警》式的動作喜劇，用來攝時間唔錯。

4. Netflix:《阿諾舒華辛力加：人生三部曲（Arnold）》

好多人鍾意史泰龍，貪其對 Rocky 和 Rambo 不離不棄，但魔術師就鍾意大隻佬多啲，雖然佢無乜演技但木口木面就係演技，而且無 set 死角色（Terminator 除外）戲路亦較史泰龍多變（起碼以史講嘢一舊舊咁，就好難做到喜劇效果）：

5. 《暗夜情報員（The Night Agent）》

較為正經的特務片，男主角幾靚仔：

6. Disney+:《秘密入侵（Secret Invasion）》

又係等咗比較耐的 Marvel 劇，一個星期先出一集不如等佢出哂再追。

7. Netflix:《星期三（Wednesday）》

魔術師第一季都未入坑，卻連第二季預告都出理，都係等埋Season 2再一次過煲

仲有大量 Disney+ 舊劇，包括 Marvel 劇、《陰屍路（The Walking Dead）》、《迷（Lost）》等...

期待中

1. Netflix：《三體（3 Body Problem）》

原著久仰大名，究竟拍成劇集又係點呢？

2. Netflix：《Pluto》

浦澤直樹動畫，喜愛《魔剎（Monster）》的魔術師一定不會錯過

3. Netflix：《獵魔士（The Witcher）》第三季

追咗第一、第二季同埋動畫加外傳，無理由唔追埋落去（sunk cost?）：

頂佢，睇完 trailer 先知第三季原來又分 Volume 1、2 兩部，唔知係咪因為 Henry Cavill 辭演主角所以想草草埋尾...

無乜期待中

1. Netflix：《魷魚遊戲（Squid Game）》第二季

第一季已經係過譽，如果兩季完魔術師都可以俾個機會佢完埋佢好頭好尾。

2. Netflix：《Sweet Home》第二、三季

同上。第一季已經係麻麻哋，如果三季完魔術師都可以俾個機會佢完埋佢好頭好尾。

3. Netflix：《殭屍校園（All of Us are Dead）》第一、二季

未入坑。如果兩季完魔術師都可以有時間就睇：

4. Disney＋：《洛基（Loki）》第二季

第一季講到時間線分歧點同平行宇宙的關係有啲亂，亦唔知鱷魚洛基可以喺乜嘢嘅平行宇宙中走出嚟。又係睇咗第一季就不妨追埋落去。

＊＊＊

最後貼上魔術師的 all time favoruites 影集/動畫/單元劇/紀錄片（僅限現時在 Netflix 及 Disney+ 的非電影類片種)，排名分先後：

1. Netflix:《闇（Dark）》

三季完燒腦穿越神劇，無 bug。

魔術師評分：100分（100分滿分）

1. Netflix:《魔剎（Monster）》

漫畫改編之暗黑系動畫，分鏡出色。魔術師由錄影CCTVB直至買碟二刷，同先父一齊欣賞之動畫之二（另一套就係《銀河英雄傳說》）。

魔術師評分：100分（100分滿分）

1. Netflix:《今際之國的有栖（Alice in Borderland）》

兩季完求生劇，漫畫改編。淨係睇囡囡已能完勝。

魔術師評分：100分（100分滿分）

4. Disney+:《美國恐佈故事（American Horry Story）》第一至十一季

季度單元故事，共用相同或類似的世界觀，追看無難度。本來係幾好睇的劇集（魔術師個人喜歡 Season 2《Asylum》、Season 1《Murder House》＋Season 3《Coven》＝Season 8《Apocalypse》），但愈拍愈頹，由第10季開始覺得有啲無厘頭，故事亦開始唔吸引，無乜新意和追看性，加上元祖演員全數退場，無哂癮，追看下去也只是情意結而已。

魔術師評分：（第1至11季平均)90分（100分滿分）

4. 《紙房子（Money Heist）》

知名西班牙「神劇」，五季完。雖然講到教授幾咁算無遺策，但其中靠不可預測的巧合及符碌的情況亦唔少，真係「好運好過好波」；要睇不如睇女督察（後稱里斯本(Lisbon)）的英姿、奈洛比（Nairobi）的「人事管理技巧」；及東京（Toyko）的西口西面。

魔術師評分：90分（100分滿分）

6. Netflix: 《少年法庭（Juvenile Justice）》

呢套係少有可以叫魔術師有心機追落去的韓片，有時仲深宵播放一晚追睇兩集：是關女主角的價值觀啱哂魔術師：年輕唔係大晒，對於窮兇極惡的少年犯，一定要嚴懲，否則佢地只會嘲笑法律的無能。不過，本片結局有啲不太合理，太過正能量：以結局案件的有青之殘忍性格，無可能只在女主手臂上刺一刀，而唔係割喉棄屍；肥婆部長亦不可能在庭上為其慣性草率結案而影響的受害人公開道歉吧！

魔術師評分：80分（100分滿分）