摩摩電影節之《大事件（Breaking News）》：守城第0集

近日有多宗持械搶劫、精神失常或暴躁人士持刀傷人，甚至發生「傷巷電鋸殺人狂」事件，搞到我城被妄民「軟對抗」譏諷我城由「亞洲最安全城市」變成「國際大刀會」，又不禁令魔術師想起近年 popo 「軟宣傳」的「守城系列」（見伸延閱讀）。其實「守城系列」的精神早在杜琪峯執齡導的本片呈現在傷民眼前，即使當年互聯網科技還未如今日發達，考慮到 popo 應該無咁夠薑妄想直播，跟返本片咁以最短時間剪攝發放俾傷民睇吓一眾 popo 的剿匪英姿，定能嚇得那些視國安法如無物的黃黑鼻哥窿無肉。

＊＊＊

本片開場就係7分鐘教材級的長鏡頭一鏡直落：賊頭元哥（任賢齊飾）帶同四名同黨準備打劫，但重案組督察張志恒（張家輝飾）、隊員阿海（許紹雄飾）、及若干 popo 已在樓下守候多時。正當元哥等人要出發之時，剛巧遇着兩名軍裝巡警查問，元哥一方被逼提早出手轟斃兩名軍裝，再與張 sir 小隊展開激烈槍戰。元哥眾人大搖大擺在街中央無遮無掩只有一名匪徒受傷，其餘子彈都打不中他們，元哥眾人仲可以劫去衝鋒車逃走。只是後期有同伴係咁易中槍要被逼殺死滅口；最後元哥以槍指嚇一名軍裝，嚇得該 popo 跪地求饒，元哥二話不說搶過救護車逃去。而 popo 向大賊求投降的醜態就被霉體拍下，大肆宣傳。

當時仲係五光十色的垃圾會就「popo 求饒事件」質詢警隊，搞到警隊二哥（任達華飾）馬上都 call 齊馬開大會應對。一眾老油條只係官腔應對，只有「官職最細、洋名叫 Rebecca 的方潔霞警司（陳慧琳）才敢以「新思維」迎戰：就係將緝兇變成一場 show，大打霉體戰。在茶水間，看到二哥雖是跟方爸爸同輩，但跟「世姪女」Madam Fong 是有些能情上的曖昧，卻被楊總警司（張兆輝飾）無意間墥破了：

Rebecca 為了確保案件走向要「依劇本」，便下令張 sir 不可再插手。眾匪拜祭過死去的同伴，便準備動手做案。張 sir 和 Rebecca 都得知眾匪所在情報，二哥下令楊 sir 全力支持 Rebecca 做 show，而 Rebecca 則安排眾 popo 一邊帶住隨身拍鏡頭，一邊表演「衝前去」一齊出發剿匪的畫面。

張 sir 雖然宣稱不會擅自行動，但調查期間巧遇元哥手下，雙方又再駁火，實際上都無得話唔再插手呢單案。張 sir 將眾匪圍困在大廈之內，元哥等則在大廈中分作二人一組分頭逃竄。張 sir 去到元哥早前藏身之單位，卻見到只淨下手榴單陷阱，引發大爆炸，看得剛到來的 Rebecca 眼都突，幸好 Popo 沒有傷亡。爆炸也警醒了住在大廈裡由春哥（尤勇飾）帶領的殺手二人組。咁大場面，電視台自然湧來報導。Rebecca 猜到眾匪以對講機溝通，便叫情報科監聽無線電通訊。

幹練的公共關係科周督察 Grace（邵美琪飾）來到，只需十分鐘便可幫 Rebecca 寫好講稿，又搵咗電影導演剪宣傳片加配樂，的確是個不可多得的人才。Rebecca 比「四點鐘許 sir」更激，要做「半粒鐘 Madam Fong」，以見傳霉為己任。張 sir 在九樓疏散住客，而元哥二人組則在八樓E窒脅持了肥佬阿葉（林雪飾）及其仔女，躲到屋內。先行疏散的居民接受傳霉探訪，大讚 Popo 表現優秀。張 sir 又遇上元哥的「別動隊」並發生槍戰，但張 sir 的「擅自行動」則是違背了 Rebecca 命令。Rebecca 一氣之下拒絕派 Popo 增援。

元哥通知分開的手下，不要再用對講機，以手機通訊。春哥的殺手二人組想扮住客撒離，但形跡太可疑被 popo 截查，又再展開一輪槍戰。春哥二人且戰且走，元哥以為是同伴，拋出石油氣罐再將之射爆，炸到班 popo 一仆一碌，將春哥二人救回室內。即使 popo 被眾匪逼退，但 Grace 卻將對 popo 不利的畫面剪走，反而播出 popo 將眾匪逼人一個單位裡面，再發放予公眾。

元哥雖然發覺救錯人，但馬上便可以跟春哥姑盟共抗 popo。Rebecca 發放 popo 威猛的片段給新聞界，再出來跟接受採訪講到好威咁；但「咁啱」（竟然？）春哥有連續相片影低炸到 popo 裙甩褲甩的相片，於是元哥便索性將之擺上網，踢爆 Rebecca 的謊言。Grace 鎮定地搵了幾個友好傳霉（喉舌報？）去幫手，又搵咗咸蟲大哥來聲援轉移視線。另一方面，Popo 就 hack 咗入肥佬家中電腦，Rebecca 跟元哥接上線，Rebecca 見唔到元哥但元哥見到 Rebecca，二人鬥了一輪嘴，元哥當然不會投降，反而學殷素素（《倚天屠龍記》）咁話「愈美的女人愈愛說謊」。

春哥的手下小王情緒激動亂發脾氣，肥佬又唔識煮飯，結果就由元哥和春哥二人一起煮飯。元哥將跟肥佬一家吃飯、樂也融融的片段放出，Rebecca 也決定放飯，仲請埋記者食，打返場「愚論戰」。Rebecca 播出殉職 popo 家屬及受傷同僚的訪問，仲有那為了家庭不作無謂犧牲而向匪徒投降的警員的訪問，以感性爭取市民支持，加倍妖魔化匪幫。

Rebecca 出動飛虎隊準備突擊，但被元哥的別動隊發現，隨即通風報訊。剛巧肥佬想趁機爬窗逃走半天吊，元哥便威脅 Rebecca 要撒去飛虎隊，否則就着鏡頭殺死肥佬。Rebecca 無奈之下唯有答應，讓元哥將肥佬救回來。元哥心生一計，叫別動隊逼令竟然仲未撒走的一眾八樓住客綁住手榴彈笠住床單齊齊走出走廊。張 sir 見飛虎隊都忙着護隊居民，便去八樓查看，果然遇到已經和別動隊合流的元哥眾人突圍，雙方在窄巷中槍戰。元哥叫手下不要關手機，保持聯絡，但轉眼間四名嘍囉已被 popo 擊斃。元哥逃走時拾獲春哥要刺殺的目標所在，然後便和春哥循電梯槽逃脫。眾居民同時落到樓下作鳥獸散，發現手榴彈都不會爆。

元哥跟春哥準準偏在電梯槽中逃走，談話中識英雄重英雄，交換了造案的情報。張 sir 追到電梯槽內，春哥掩護元哥裝炸彈，三人一面鬥嘴一面槍戰。Popo 將匪徒屍體搬落樓領功，Rebecca 叫在場最高級的楊 sir 見記者，但要照稿讀。元哥引爆炸彈逃去，Rebecca 從死去的匪徒中取得未關的手機，依環境雜音找到元哥所在，又以 Popo 對講機貼住手機，令聲音在元哥身上傳出，眾途人竟然醒目地知道有事發生迅速離去。一輪追逐之後，Rebecca 失手被擒，被元哥當成人質帶上小巴，張 sir 則窮追不捨，雙方又發生槍戰（張 sir 好想流彈誤殺 Rebecca？）。

一輪槍戰飛車追逐之後，元哥以手銬將 Rebecca 和自己銬在一起，走去刺殺春哥的目標人物，可惜失敗告終。元哥冚已被 popo 包圍，又不願與 Rebecca 攬炒，最後向天開槍，被張 sir 和眾警亂槍打死。Rebecca 與 張 sir 成為今次案件的英雄；特首就讚揚 popo，話我城依然是安全的。翌日，春哥以元哥的手法打劫解款車失敗被殺。

＊＊＊

魔術師看畢本片，覺得似乎捉到鹿脫唔到角：

1. 如果講警匪雙方如何運用傳霉力量幫助自己，似乎又到喉唔到肺唔，只係講緊有好多傳霉來報導，Popo 如何當本案是 show，經剪輯後用來欺騙市民片段係點樣都無講；

2. 如果講元哥和春哥萍水相逢但又惺惺相惜，人物刻劃唔係咁夠，主要係由一齊炒菜同埋互相幫對方完成任務帶出，比較突兀；

3. 如果係講 Popo 中的權力鬥爭，二哥同 Rebecca 的曖昧只輕輕帶過，Rebecca 對楊 sir 的「下剋上」又輕輕帶過，楊 sir 受制於二哥話「要全力支持 Rebecca」而被逼對 Rebecca 忍氣吞聲，每每只能酸溜溜地也只是輕輕帶過

4. 如果係講人質點樣在匪徒槍下委曲求存，則肥佬就好似典型傷民咁「世界仔」，反而阿仔正義感滿瀉，更非常信任 popo:「警察不會用槍對着市民的頭」，又話自己係少年警訊，唔會同賊乾杯之類（強局長應該幾欣賞呢位優秀的細路仔），不過又係幾場戲之後就無以為繼

結果就係條條線都蜻蜓點水之後就無跟進，最後都係變返傳統巷慘警匪片、無限子彈槍戰片...

演員方面，任賢齊同佢個長頭髮手下真係幾有型，張家輝更非常落力（「我就唔信拉唔到呢班PK」），張兆輝、郡美琪、任達華配合演出都恰如其份，衰就衰在陳慧琳只係識得反白眼：

另外，本片優點就係長鏡頭的運用，開頭同結尾都十分精彩；但 Bugs 亦偏多，尤其是開場槍戰匪幫可以無遮無掩企喺街上同 popo 駁火都無事完全不合理（事實上全片開槍甚多但命中率極低）；八樓眾住客竟然未撒走，別動隊又可以在短時間內逼使各單位的住戶齊齊綁住手榴彈笠住床單走出走廊，落到樓下（飛虎隊卻是帶人質行樓梯上樓上），咁齊整更是無乜可能完成的操作；元哥用來反駁 popo 播出射爆石油氣罐一段，點解春哥會有閒情影相？

最後，現實 popo 都可以學吓本片，起碼要有啲喉舌報以外友好傳霉幫口講吓好說話，小罵大幫忙；加上如果能在二號橋之戰及保理大之戰時好似本片咁現場剪片發放咁傳霉，呈現 popo 威猛一面（2019撤出垃圾會就免了），就一定好過

事後拍《守城》囉（笑）！

魔術師評分：75分（100分滿分）

＊＊＊

伸延閱讀：