摩摩電影節之《黑社會（Election）》：愛巷蜀定愛黃金？

黑社會源自洪門，佢都本來都係反清復明的義士嚟架！至於點解反清復明，咪就係因為康熙火燒少林寺，逼到啲逃脫的僧人要革命造反囉！


今屆和聯勝的話事人選舉，一共有兩名候選人入閘，分別係佐敦區的阿樂（任達華飾）和荃灣區大Ｄ（梁家輝飾）。幫會中小圈子選委班叔父便在討論應該支持邊個：阿樂為人夠義氣，人緣較好，好似奶媽一樣經常照顧各方兄弟，出錢又出力；但大Ｄ卻是勢力雄厚，手下多是新一袋有為青年，膽正命平，就算是坐監一樣無畏無懼：

黑警警司四點鐘許 sir（姜大衛飾）與督察阿滔（吳廷燁飾）講起黑幫都有小圈子選舉，仲搞到江湖立立亂，不如學「新加坡記」，父傳子無咁嬲：

在和聯勝小圈子選委會會議中鄧伯（王天林飾）指出由叔父輩選出話事人，係因為佢地有輩份，講嘅嘢有公信力，不可能用錢 bid 返嚟。結果鄧伯一錘定音，阿樂當選：

大Ｄ選舉失利大怒，遷怒於曾俾錢收買的Logan龍根叔與手下頭目森哥，並將二人裝入木箱，運到山崖上玩「木箱碌豬」，而唔係打書釘咁小事。森哥手下 Jimmy 仔（古天樂飾）在疑似藍大修經濟學課堂，接到消息後馬上跟新話事人阿樂商量，但阿樂卻只是穩住他。大Ｄ唔去西貢，選擇在鬧市中拋下龍根叔，要他傳話：

原來和聯勝跟《射雕》和《神雕》中的丐幫都一樣，要做話事人就要有龍頭棍。大Ｄ要求現任話事人吹雞別將龍頭棍交出來，不知何解吹雞好似完全無勢力咁，怕哂大Ｄ，竟然同鄧伯講話唔會將龍頭棍交俾阿樂。鄧伯同其他叔父商議，決定《基本法》不可亂改，搞事者要自行承擔責任；否則只要有人唔服氣便要重選，件事只會沒完沒了：

吹雞將龍頭棍收在廣州，可惜當時膠鐵未開通，亦未有一地兩檢，上去拎棍要經過８小時性生活圈：

黑警見和聯勝成日開大會，便將一眾叔父頭領拘捕。眾叔父想勸大Ｄ唔好搞事，卻給大Ｄ窒返轉頭，仲話想要另起爐灶，搞個「新和聯勝」出來：

大Ｄ向鄧伯表明自己出來選話事人，並唔係為私利，而係為咗阿公，可惜眾人都唔服，只好各有各做，希望鄧伯能暸解自己搞獨立背後的原因。不過鄧伯一口拒絕，話搞分裂組織，「所有兄弟都唔會放過大Ｄ」，差在未講「凡搞獨立者，雖遠必誅」：

本來大Ｄ收買各方人物去廣州搶奪龍頭棍，但由於自己衰多口話要搞獨立，結果再無人聽佢枝笛，紛紛投靠阿樂。最後龍頭棍經由師爺蘇（張兆輝飾）、大頭（林雪飾）、東莞仔（林家棟飾）等接力由廣州傳送到我城，由飛機（張家輝飾）接手，一人力戰大Ｄ眾手下，膊頭孭住把刀仍能力保不失，由 Jimmy 仔救走，送往醫院。龍頭棍最後落在 Jimmy 仔手中，跟阿樂談判。阿樂施展絕佳的談判技巧，由錢、講到義氣、又利誘又威嚇、最後又講返生意經，終於說服了 Jimmy 仔交出龍頭棍：

阿樂論功行賞，收了護棍有功的師爺蘇、大頭、東莞仔、飛機、和 Jimmy 仔做契仔（以大頭同師爺蘇年紀叫阿樂做「契爺」實在有點搞笑）。其中東莞仔在運棍途中墥死了黑警，決定去自首，無畏無懼，刑滿出獄之後，又是一條好漢：

為了擺平大Ｄ，阿樂又使出了絕佳的口技。先由利益出發，承諾自己不會多取大Ｄ分毫，又宣稱自己唔會連任，會全力支持大Ｄ做下屆話事人；如果大Ｄ一意孤行都搞獨立，便就算乜都唔做唔搵食都傾盡全力攻擊大Ｄ，可謂「寧要面子，不要褲子」。大Ｄ計過無謂搏落去，唯有硬着頭皮投降，還跟阿樂歃血為盟，彼此交心，竟然對阿樂帶佢「走出荃灣」，感恩大德。

本來二人還相安無事，阿樂更同兒子 Danny 仔和大Ｄ兩公婆去城門水塘釣魚；但在大Ｄ嫂（邵美琪飾）故意帶走 Danny 仔讓大Ｄ跟阿樂傾「公事」的片刻，愚蠢的大Ｄ竟然提出「雙辦事人制」，話又可以係 contigency plan，又可以擴展生意云云。看阿樂以《天水圍》的手法拔掉魚鈎，便知已動殺機。阿樂先不動聲色，以言語穩住大Ｄ，再趁其不備，從後以石頭擊殺。就在此時，大Ｄ嫂與 Danny 仔回來，看見了阿樂的殺人舉動。阿樂先將車匙拋給被父親的舉動嚇呆的兒子，叫他返回車上，自己再追殺大Ｄ嫂，成功將其滅口。最後阿樂挖了個坑將大Ｄ夫婦埋了，又將魚具棄置，洗淨雙手，返回車上，帶着依然嚇到呆咗的兒子返家：

臨尾仲有一段係 Jimmy 仔探望給大Ｄ弄傷的龍根叔。龍根叔一面懺悔，一面同 Jimmy 仔講，話要在黑社會混，就要做最大嗰個，成為續集伏線。

＊＊＊
本片劇情算是緊湊，阿樂的談判技巧是非常的「教材式」，大學用嚟做 project 都仲得；同埋放返落今時今日，唔知我城班笨土有青會係「愛巷蜀定愛黃金」呢？
又，如果係都要講 bug，本片的確唔多，但要改善的地方都唔少：
１. 本片唔少有名有姓的演員參演，絕對唔係 nobody，一眾角色應該在續集中有所發揮，無理由只是跑龍套。同時，就係因為各角色唔係由 noboy 飾演，觀眾慣常都會記下重要的人物關係，點知影片開場時十幾分鐘的角色交代非常凌亂，又多又雜，呢吓真係唔要得。
２. 大Ｄ有乜本事入閘去選話事人？睇勻全片，又唔覺佢勢力大，反而只係ＥＱ甚低的老粗一名（所以先會屈係荃灣？），下下都要同人爆大鑊。最尾嗰段更是自己找死，伴君如伴虎，一睇就知阿樂係曹操嗰類梟雄，「夢中殺人」都在所不惜；大Ｄ竟然膽敢向其提及「分權」呢個咁敏感的話題，足證其又貪又蠢的性格。呢種人自己無本事，又要得罪人多稱呼人少，俾着魔術師都唔會選佢做領導喇！
３. 在護送龍頭棍途中，飛機被大Ｄ手下斬至重傷，由 Jimmy 仔 call 來白車送院；但飛機事後竟然不被黑警拘留，只係稍作包紮便可恢復過來，呢下真係接受唔到。
４. 另外，片中常有黑社會燒黃紙唸詩歃血為盟的情節，仲要無厘頭穿越古今，意義不明，唔知做乜；魔術師寧願導演多些着墨講師爺蘇和大頭呢啲「老一輩」的幫會會員，經常唸詩以顯示老一袋真心膠地相信「義氣」的價值；到東莞仔只求目的（得到龍頭棍）地木無表情、以至 Jimmy 仔在藍大聽書，教授以英文授課的「細袋衝擊」。
同埋，有個延後笑點，就係在拘留室中，當叔父串爆（譚炳文飾）去勸大Ｄ話「下一屆俾你做話事人」，大Ｄ的回應卻是「我俾個警務署長你做」...對應返梁家輝在《寒戰》的角色，呢句真係笑咗！

幾乎漏咗，當阿樂知道當選話事人後，呢副得戚樣，係咪似曾相識，同貪曾吹口哨差唔多呢？

最後，片尾曲相當好聽：

對天歌
曲：羅大佑
詞：林夕
唱：高少華
惺惺相惜相見
手足執手相勉
道義兩字對地對天
高歌舉杯交錯
壯志寫我諾言
講交生死都不變遷
現在春花開遍
日後秋風不免
舊日故事世代上演
戀戀不捨不棄
與你勾手指尾
一生相依不改變
有滅有生 世事有續有延
沒有當天沒有今天
笑問何時何地再遇從前人面
你是否會知當年

＊＊＊
伸延閱讀：
《天水圍的夜與霧（Night and Fog）》：公屋綜援養懶人
摩摩電影節之《寒戰》：傻的嗎？爭住做一哥？
摩摩電影節之《寒戰II（Cold War II）》：揭開劣政司司長唔辭職選特首之謎