正苦服務長知識（護照篇）

話說魔術師本特衰護照早在今年3月到期，由於魔術師唔去旅遊唔會死，也就放下不管。不過，魔術師又衰在辛苦命，雖然習慣全年無休，但公司假期多，點都要清咁啲，於是日前就放返日假去幫護照續期。

魔術師同大部份傷民唔同，鍾意用電腦多過用手機，所以都唔會用「智方便」去申請呢樣嗰樣，反正用返傳統方法在谷歌 search「特區護照續期」，自然就會去到入境事務處呢個網頁：

（圖片來源：中華人民共和國香港特別行政區政府入境事務處 > 我們的服務 > 旅行證件 > 申請香港特別行政區護照, captured on 8 Aug 2023)

拉落啲仲見到呢兩位幾可愛的囡囡以短片形式介紹換護照的手續，雖然仲係 out out 哋講緊開關復常報復式旅行，但起碼正苦部門都識開竅，知道搵囡囡做袋炎人一定會事半功倍：

魔術師見自助站唔使預約、無配額，又要企響部機面前輸入，唔使諗如果通遇着啲盲毛帶住一家大細去申請，咁就一定有排等，於是便「懶醒」咁選「網上預約申請旅行證件」：

（圖片來源：中華人民共和國香港特別行政區政府入境事務處 > 我們的服務 > 旅行證件 > 申請證件服務站, captured on 8 Aug 2023)

熟悉的小藍人又出來跑了一陣：

便見到以下畫面，只有「預約」相關的項目可選，魔術師 click 進去填好個人資料便完成預約換護照了。

好奇心起，又在以上網頁 click「服務示範」，赫然見到有的網上申請護照，點解魔術師個畫面無得選嘅？

（「服務示範」截圖）

魔術師當時並無深究，等了幾天，終於到了預約的日子（但 set 好了的「早兩天通知」並無發生）。魔術師去到屯門入境處，見到那些「自助服務站」排哂大隊，心中暗笑好在一早預約咗，唔使喺度打蛇餅。上到樓上問明方向，門口阿叔便指示魔術師去辦公大堂一角的名仕快相(08483.HK)去影相...

「有無發達通？60蚊呀唔該！」快相姐姐指示魔術師付款好坐定拍照...

WTF！魔術師作為一介好市民，根據指示上網預約，文件帶齊，一切做好做足，竟然係要付款拍照；而即興 walk in 去自助站排長龍、唔識用指指點點毫無社交距離大噴口水的傷民竟然可以享有自助站提供的免費拍照服務？這是甚麼道理？懲罰乖孩子？

好喇，魔術師在硬食了60蚊快相費之後，又被指去詢問處排隊登記，之後等咗唔使幾分鐘便又被叫到另一位窗口搞手續。

窗口阿姐問魔術師取過身份證、實體照片等之後問：「你有冇印份申請表出來呀？」

魔術師沒好氣地回應：「個網站無得俾我 download 份 form，淨係俾咗個 QR code 我。」

其實網上填 form 就係想電子化，高效率啲又環保（而且唔係人人有 printer），仲要 print 份出嚟豈非反智？

而且無法下載已填好的電子申請表也不知是個網站有意如此，抑或係 bug。

窗口阿姐給了魔術師一個 poker face，便在座位 scan 了魔術師張相，再 print 出嚟。只見份文件明明有魔術師的 scanned 頭像，窗口阿姐竟然又以純熟的手法在魔術師的實體照片背後塗上膠水，再貼在 scanned 頭像之上。

把實體照片貼在 scanned 照片之上，咁 scan 來做乜？如果係以電子版為準，又點解要 print 張申請表出嚟？唔通真係為咗魔術師在紙本表格上的簽名？簽在電子手寫版上唔得咩？

窗口阿姐就叫魔術師去第N號窗前等「窗口哥哥」叫名付款。

魔術師見未取回身份證，便問窗口阿姐：「我張身份證呢？」

窗口阿姐不答，卻反問：「佢叫咗你個名未呀？」

魔術師呆了一呆，窗口阿姐叫魔術師去N號窗都未夠幾秒，魔術師又在問問題，而且跟N號窗距離又遠，又點會知道叫咗名未呢？

沒法子，只好死死地氣繼續玩正苦部門「要客戶市民不停轉窗口」的遊戲。

付款又係奇奇怪怪，唔知點解正苦唔收信用卡，就算係用支付佬同微信囡，都係唔能夠以信用卡交費，一定要扣現金結餘或錢莊戶口。

交完款，取回領證（護照）收據，返到去搵窗口阿姐，此時佢先把身份證俾返魔術師！

頂，原來係驚客戶市民唔俾錢，所以扣押起張身份證？

有無咁嘅就理由呀？無俾錢就無護照，使乜扣押人哋張身份證？

魔術師抱着疑惑的心態回到家中，再試吓睇吓做唔做到網上申請護照。去返第一幅截圖的網頁，原來係魔術師太心急了（attention to details 的心力都花在公司上了），一看到預約 link 便跳了入去，原來再碌落啲就有另一條 link 係 for 網上申請嘅！

（圖片來源：中華人民共和國香港特別行政區政府入境事務處 > 我們的服務 > 旅行證件 > 申請香港特別行政區護照, captured on 8 Aug 2023)

咁點解正苦唔將網上申請的資訊放在最前，反而係在預約、服務站、甚至乎是在郵遞之後呢？最自助、最省資源的方法反而唔係放最前？

又，睇流程示範，網上申請護照可以自行上載照片，又可以用信用卡付款，點解「窗口姐姐」仲要貼膠水？「窗口哥哥」又唔收卡？

又又，入境處預約申請、網上申請、預約領取護照係分開三條 links，介面99%相似，點解唔整合埋一齊呢？

究竟呢啲正苦服務電子化嘅嘢關唔關創科局事？淨係識搵囡囡拍廣告唔夠㗎喎！