一人飯局（2023年8月）

今年呢個夏天真係悶熱，搞到一向在既定餐廳食開「定食」的魔術師都要轉多幾間新飯堂，否則成日食「定食」真係會悶出鳥來的。

1. 山城小麵

此店位於 MK 黨鐵站上蓋、由邪惡房託領展（00823.HK）管理的 T.O.P. 商場及寫字樓項目的地庫 food court（直接啲講，即係位於 MK 黨鐵站底下），應該係在第 N 次重組餐廳組合時引入的川菜快餐。魔術師食得辣亦唔抗拒川式麻辣，今次就試吓個單人套餐：

魔術師今次揀麻辣雞絲涼麵，小辣，幼麵底，小食係尖椒皮蛋，另加一罐 Coke Zero：

雞絲同幼麵不過不失，份量亦夠有突，小辣對魔術師來說可接受，花生粒係魔術師最愛。估唔到成個餐最突出就係個皮蛋，辣汁非常入味，食完再𢳂多幾匙真係幾辣的辣汁嘆埋再走！

魔術師餐單：單人套餐 - 麻辣雞絲涼麵（小辣、幼麵）、尖椒皮蛋小食、Coke Zero（+＄2）＝＄74。

＊＊＊

2. 三多麵食

（圖片來源：OpenRice > 餐廳 > 香港 > 中環 > 三多麵食, captured on 12 Aug 2023）

位於中環砵甸乍街的三多麵家係魔術師以前返中環時的飯堂之一，記得在舊 blog 都介紹過。今次鵝腸米一樣係咁爽口，重點係個辣椒豉油（魔術師會再加辣椒油），腐乳通照例汁都飲埋。

雖然以麵食嚟講價錢偏貴，但食得開心就乜都抵返哂！

魔術師餐單：鵝腸米＄48、腐乳通菜＄25、凍檸茶＄18，埋單＄91。

＊＊＊

3. 鋿晶館

最近我城多咗好多點心專門店，做夜市飲茶，旺角都有呢間食店，門面都算幾大，開正旺角道同彌敦道交界地方，不乏人流：

（圖片來源：OpenRice > 餐廳 > 香港 > 旺角 > 鋿晶館, captured on 12 Aug 2023）

此店菜式選擇甚多，有點心、有小茶、亦有盅頭飯套餐：

魔術師這晚就叫了三籠點心，味道不過不失，相對起每籠30蚊起跳的價錢就顯得偏貴了（尤其是係個腸粉）；反而個茶唔錯，只係 default 點個鐵觀音，都算易入口。：

下次有機會可以試吓無咁貴的盅頭飯套餐，有菜有湯都係＄78。

魔術師餐單：混醬腸粉＄33、金錢肚＄32、山竹牛肉＄30、茶＄8，埋單103（常日免加一）。

＊＊＊

4. 上野鐵板燒專門店

魔術師平日在 MK 遊蕩（尤其是去德發、威威睇碟）都會經過開在女人街中的「鄉下」鐵板燒店，就咁睇餐牌同價錢，唔似係俾魔術師呢啲單打獨鬥廢中用來祭肚的地方：

（圖片來源：OpenRice > 餐廳 > 香港 > 旺角 > 上野鐵板燒專門店, captured on 12 Aug 2023）

但唔知係唔係疫情係就係過咁咗，但傷民的生活習慣卻未「復常」，依然係無乜人行夜街，好多食店9點鐘已開始關門，好似呢類主打貴夾唔飽鄉下菜的地方，夜市只做得一兩輪生意，職員多過客人真係唔多掂。唔知係咪呢個原因，這天魔術師又行過竟然見到有一人餐：

其時已時夜晚8點幾，魔術見無乜人便入去試吓呢個一人餐係乜傢伙：

原來所謂「9道菜」，除咗沙律、刺身、炒飯、飲品同甜品之外，其他都係「炒埋一碟」，其中「鐵板配菜」及「日式炒時菜」更是「難分你我」。總的來說，一分錢一分貨，味道尚可接受，炒飯亦係熱辣辣即炒製成，不過魔術師就覺得「大食代系列」待鐵板燒好似好食啲（當然價錢會貴啲）。

魔術師餐單：一人特價晚餐＄98，凍飲＋＄5，埋單（連加一）$113。

＊＊＊

5. 金禾

繼上次食過鹽焗雞之後（見《一人飯局（2023年7月）》），這天再去返啅金禾，今次叫豉油雞套餐一樣咁有水準，盛惠＄87。

＊＊＊

伸延閱讀：

一人飯局（2023年7月）