爽歪歪澳洲遊（2023年12月）（二）之悉尼篇

從我城出發

出發日，靚姐姐 ban 咗魔術師去接佢的提議（話唔想魔術師太辛苦），於是魔術師便與靚姐姐分頭出發機場等。魔術師由屋企出發，搭新路線行屯赤隧道，真係話咁快就到機場，肯定快過返工。魔術師先到先等，在因航櫃位等 check-in；雖然靚姐姐（租）住西九豪宅（疫情時直至近日都係 home office，佢公司同事竟然會在她家返工），一跳向西跳上機鐵便是，拖住個大喼都難佢唔到，但作為女人就梗係珊珊來遲才顯得矜貴。

Check in 再幫行李寄艙，仲剩唔少時間，於是魔術師便跟靚姐姐逛了一會名店，然後再到機場貴賓室環亞lounge hea 陣食魚蛋粉，仲打包茶葉蛋到袋鼠國食。魔術師是以尾帝錢莊 PremierMiles 信用卡作入場劵，條件就係在一個月內簽夠（我城貨幣，下同）$5,000 卡數，否則就要俾 ＄250 入場費用...唓！去得旅行就唔會碌唔到區區$5000卡喇！

Day 1

到達悉尼

在飛機上睇完《極悍巨鯊（MEG）》，又睡了一陣，終於就到達悉尼了。只見機場內甚多簡體字說明，足見蝗民就是一眾洋腸的米飯班主。旅行社司機早已到達，指示我們方向上車：

由於我們帶着大型行李，而且坐了8、9個小時機都倦了，所以便在市內稍作觀光後，便直接回酒店休息。

旅行社 book 的酒店是 Novotel Sydney Central，門口竟然只有梯級，沒有斜道可供行李上落，更沒有 bell boy 服務，實在難以接受（忘了拍照紀錄）。魔術師和靚姐姐好容易將 22kg 的行李篋提上樓級，再到酒店 check in，想不到 receiption 竟是個頗可愛的巷妹，搞到魔術師條氣即時順返哂。

悉尼歌劇院

魔術師跟靚姐姐上到房，各自梳洗休息一會，下午便出發遊玩。主菜是遊覽悉尼歌劇院，買吓紀念品。有段小插曲就係在悉尼歌劇院外，有人推着一車貨物，靚姐姐又沒為意行出去，魔術師眼看墥上，馬上伸手欄阻，無意間在靚姐姐胸前揸了一吓，真係相當有手感。

快艇

在附近的露天餐廳食個 tea

再沿海濱行一陣，靚姐姐見有快艇駛過，便嚷着要玩...魔術師當然樂見奉陪，呢啲嘢一係唔坐，坐就要坐車頭，享受甩尾被海水打上身的快感（當然少不了跟靚姐姐肩碰肩）：

Bennelong 晚餐

玩完快艇，成身咸水味，下一站就是晚飯了。靚姐姐自稱以手機在悉尼歌劇院內的 Bennelong 餐廳訂了枱...

(網上圖片)

但實際上靚姐姐無睇清楚個回覆電郵，去到門口才獲守門知客型男大隻佬告知原來我們是在 waiting list（錯得嚟搞笑就係情趣，好似魔術師咁萬無一失就係悶）！幸好型男大隻佬非常 professional，加上當時時間尚早，有空間幫我們安排座位。魔術師跟靚姐姐叫了 兩道 three courses，非常美味，fine dinning 二人飯局由黃昏食到天黑變燭光晚餐。

於外地網購

呢餐飯仲有一個亮點，就係型男大隻佬在招呼我們入座時曾經問過我們是否食完飯就去悉尼歌劇院睇 show。究竟有乜 show 睇呢？魔術師一查，原來係有馬戲團睇！

（圖片來源：Sydney Opera House > Circus 1903, captured on 9 Jan 2023）

靚姐姐話未睇過馬戲團，今次買飛的任務自然就落在魔術師身上喇！返到酒店臨瞓前搞定（買親呢類飛都唔可以用自動劃位，一定要人手剔選才揀到靚位）。

又，由於是在網上購票，大貓信用卡竟然彈出 OTP 短訊作認證，但不知何故魔術師卻收不到短訊，不知是否跟外國 carrier 有關；幸好魔術師仲有尾帝錢莊信用卡，尾帝錢莊係用 app 來做認證，非常方便，一 take 搞掂。估唔到網上購票呢類生活瑣事，身在外地的話可能都要花多少少腦筋解決問題。

Day 2

藍山國家公園

第二日主要行程係去遊藍山國家公園，在酒店食完早餐，等司機來接便出發。車程差不多兩個小時。靚姐姐在車上竟然收到同事 call，問埋啲瑣碎嘢十分煩膠 - 靚姐姐話佢佢依家放緊假，無需要鉅細無遺咁 coach 佢，公司又唔係大，叫呢位同事小事情可以問其他同事啫。收線後靚姐姐再瘋狂爆粗 D9 呢條 19 同事！魔術師就係鍾意靚姐姐呢種真性情！

去到藍山國家公園，坐咗陣纜車，又在山道上走走，可惜天色不佳，時晴時雨，玩了兩個小時便折返。

Leura 小鎮

下一站的行程就係 Leura 小鎮，不過由於係平安夜，好多商店都提早關門，唔見洋腸只見滿街華人面孔的遊客，仲有唔少人係講我城方言添！小鎮無乜嘢睇，靚姐姐就買咗啲精品餐巾，然後去食雪榚，chill 住傾下計，過返一粒鐘。

睇馬戲團表演

魔術師和靚姐姐便提早返回，在「黃昏」7點前（袋鼠國晚上9點太陽才下山）回到悉尼歌劇院睇馬戲團的精彩表演。個 show 果然精彩，一眾表演者有如奧運體操選手，而大象和小象也只是輕輕客串，沒有不人道的表演。

而最令魔術師喜出望外的，就是靚姐姐在漆黑的場館中餵魔術師吃小食，真係幸福感滿溢！再呷一口 Rosé，酒不醉人人自醉。

＊＊＊

伸延閱讀：

爽歪歪澳洲遊（2023年12月）（一）之準備篇

爽歪歪澳洲遊（2023年12月）（三）之開恩茲篇（上）