爽歪歪澳洲遊（2023年12月）（三）之開恩茲篇（上）

在悉尼歌劇院睇完馬戲表演，魔術師和靚姐姐就回到酒店，完成悉尼之旅。第二天預期早機到開恩茲，六點幾就要出發，酒店早餐都無得食。靚姐姐梳洗完後（佢有個習慣就係成日都係沖完涼後裏住條大毛巾從浴室走出來在行李喼搵衫着，然後又走返入浴室，十分開放，睇到魔術師眼定定），較個鬧鐘5:30起身，行李都唔執便倒頭大睡；而魔術師則強迫症發作，執好行李，鬧鐘較到比靚姐姐早起一粒鐘作準備。

Day 3

意外延誤

魔術師如期 4:30 就醒咗，順手撳吓手機睇吓航班是否如期起飛...點知維珍袋鼠真係同因航一樣臨時取消班機（好在出發時因航未玩取消班機啫！），金趐大鑊鳥！

魔術師馬上查問谷歌神，得知悉尼機場在平安夜受暴雨影響，甚至有維珍袋鼠客機被雷劈（見伸延閱讀）導致班機取消。魔術師見這幾天在悉尼都是時晴時雨，有似曾相識的「特大暴雨」情況似乎不假，於是便在深宵 call 醒在巷的旅行社「旅遊策劃師」，問她有甚麼意見 - 而其答覆竟然就係「如期出發」，去到機場等睇吓有無機位可以飛去開恩茲，「策劃師」在我城是乜都做唔到的（即係無得幫魔術師臨時調配航班機位）。

魔術師聽畢，將信將疑，畢竟人地寫嘅係「cancelled」而唔係「delayed」，照計唔會忽然「復常」話飛就飛；而且魔術師更唔想好好一個「爽歪歪旅遊」落得要跟靚姐姐「訓機場」咁唔 cool。再等一會，見維珍袋鼠官網已有更新，替代班機要在下午1pm由悉尼飛墨爾本，再在4:30pm由墨爾本轉機飛開恩茲，抵達時間約為7:00pm。魔術師再跟「策劃師」商量，誰知策劃師竟然堅持先去機場呆等，猛咁話航空公司由直航變轉機，去到開恩茲已是黃昏，「唔合理」云云...真係俾佢氣壞。

魔術師當機立斷，就係睬個「策劃師」都傻，一於跟返航空公司安排。寧願通知司機唔使咁早來接我們，再返上床小睡一會，順手撳熄靚姐姐的手機鬧鐘，等佢訓多陣直至半睡半醒可愛地賴床時才告知航班取消，可以休多陣。

事後，靚姐姐竟然話魔術師提早 check 班機有否延誤是「非常人所為」，一般人都會去到機場才知道班機延誤...其實魔術師做事一向穩當，未雨綢繆凡事準備妥當，恪守「故善戰之勝也，無智名，無勇功。故其戰勝不忒。不忒者，其所措必勝，勝已敗者也。」（《孫子兵法．軍形篇）》的法則；不過在靚女面前，諗多咗反應慢咗，「智者千慮，必有幾失」，有時都會有啲無謂的論盡與失誤而已。

到早上7點，見風和日麗，司機也說天氣放晴，魔術師跟靚姐姐才起床梳洗執吓嘢，順手 cap 吓 screen 睇吓有無得 claim 旅遊保險（所以以上截圖是約7:30am），再去食個酒店早餐(靚姐姐以安德尊腔叫魔術師食多啲番茄有助前列腺健康)，通知司機來接我們去機場，途中卻見不到甚麼水浸情況。

錯有錯着

魔術師跟靚姐姐在悉尼機場特維珍袋鼠的 counter 換過機票，便登機到墨爾本，再在墨爾本機場食個 tea set，似乎一切順利...

誰知登機時靚姐姐發現遺失了登機證，魔術師便跟她在登機閘口補領...跟服務櫃位的南亞哥哥仔講一論，才知道本來印在魔術師登機證上的登機閘口已改，由 Gate 3 轉到 Gate 2。如此一來，好在靚姐姐遺失了登機證，我們才知道換了入閘閘口，否則就會去錯閘口乾等，而不知維珍袋鼠竟然會臨時搬龍門咁都得！

到達開恩茲

魔術師跟靚姐姐飛抵開恩茲，取回行李已是晚上八時多，來接我們的司機是大媽一件。由於經已入黑，是日原定行程取消，大媽司機便帶我們在酒店附近的街道，看看夜市 Night Market 有甚麼好吃，與及明天上船遊大堡礁的碼頭，好讓我們自己可以步行前往，最後就返回 DoubleTree by Hilton Hotel Cairns check in。

酒店 check in 時要魔術師填表格，靚姐姐望了一望：「你手字都幾靚喎！」

哇，魔術師又要多謝阿媽當年強逼要求練鋼筆字的苦心喇！（現袋父母有幾多會要求子女練字呢？）

唔講唔知呢間 DoubleTree 酒店提供 Le Petit Chef（小廚師）晚宴，食住飯有 AR 動畫睇，靚姐姐就話想 book 嚟試吓，可惜魔術師查找後發現時間不就，聖誕期間休息，魔術師也就沒辦法見識一下了。

（圖片來源：DoubleTree by Hilton Hotel > LE PETIT CHEF, captured on 14 Jan 2024）

開恩茲夜市

魔術師和靚姐姐上到房，擺低行李，都肚仔餓了，便出去行陣吹下海風，順便看看夜市有甚麼吃...

即係咁，在袋鼠國的夜市是沒有魚蛋篤的。最後我哋去咗食串燒，仲有靚女收銀：

（Nikon Z7 FTZ Nikkor 50mm F1.4G @f/2.5 1/80s ISO 1400）

串燒來了，又真係幾好味！魔術師跟靚姐姐坐在街邊位邊吃邊喝，不知人間何世！

（Nikon Z7 FTZ Nikkor 50mm F1.4G @f/1.6 1/80s ISO 560，有裁剪，景深關係焦點當然不是串燒）

＊＊＊

伸延閱讀：

More storms forecast for NSW after lightning strikes passenger plane（The Sydney Morning Herald, December 25, 2023）

爽歪歪澳洲遊（2023年12月）（二）之悉尼篇

爽歪歪澳洲遊（2023年12月）（四）之開恩茲篇（下）

國泰取消航班｜林世雄批做法不理想　林紹波再致歉：為確保農曆新年航班不受影響 2024年01月11日

【有線新聞】國泰航空無預警下取消多個航班，運輸及物流局局長林世雄批評做法不理想，國泰行政總裁林紹波再次致歉，又說為確保農曆新年出入境高峰時航班不受影響，主動取消平均每日12班機。

國泰因為機師人手不足連日不斷取消多個航班，單計星期四，再有至少20班航班取消。政府批評國泰無預警下取消航班的做法不理想，溝通善後亦做得不好，運輸及物流局局長林世雄：「國泰作為一間這麼大的公司，自己要有品牌、有責任，提供穩定可靠服務，他們也有責任處理航班編配和人手安排。」

國泰行政總裁林紹波之後主動再就取消航班親身致歉，承認低估了候命機師的人數，「12月的更表是11月中出，在出了更表後，直至聖誕節，我們才發覺候命的機師數目，不足以抵銷流感高峰期的影響，所以12月底發現有此問題後，其實我們都檢視過1月的情況，但由於更表已出，所以同樣問題延伸至1月。」

至於農曆新年的出入境高峰，林紹波沒有透露增加了多少名機師候命，只是強調有信心可抵銷病假的影響，「在這段期間，至今沒有任何航班被取消，為保障這階段及一、二月運作正常，我們主動取消平均每日12班航班，令整體餘下的運作可順利進行。」

對於有工會預計，國泰有過千名機師離職，林紹波說國泰去年的員工流失都十分正常，預計今年的機師流失率仍屬正常水平。