雖然魔術師不時都會跟靚姐姐撐吓枱腳，但大家都事忙，總少不了一人飯局的時候。
1. 盛記
|
| （圖片來源：Openrice > 餐廳 > 香港 > 中環 > 盛記, captured on 30 Mar 2024） |
好耐都無返嚟食中環食大排檔了（見《一人飯局（2023年1月至2月）》）。這天再訪盛記，都係照舊豉椒鵝腸、芥菜滾牛肉加白飯，貪其有菜有肉又有湯飲。食材照舊係靚，鵝腸洗得乾淨，即炒有鑊氣，芥菜仲有芥菜膽...其實魔術師都係飲湯加食菜，牛肉只是有來出吓味：
埋單豉椒鵝腸鵝腸同滾湯（細）都各加10元，分別＄98和$56，白飯就依舊＄8無加價，總計$162。
*＊＊
2. 良順興
這天行過大角咀，見到呢間在社交平台被稱為「隱世食店」的鋪頭有開門做 walk-in 客（魔術師之前幾次經過都係只做 booking），於是便入內一試：
|
| （圖片來源：Openrice > 餐廳 > 香港 > 大角咀 > 良順興, captured on 30 Mar 2024） |
魔術師在門口張望期間，老闆娘出來招呼，講到明菜牌中只有雞軟骨肉餅飯同埋水煮魚，魔術師喜愛食的各款雞飯都無提供：
|
| （圖片來源：Openrice > 餐廳 > 香港 > 大角咀 > 良順興, captured on 30 Mar 2024） |
無計喇，就試下麻辣水煮魚。上到嚟果然係水多過魚：
辣就夠辣嘅，但由於水煮魚實在不太啱魔術師的口味（題外話，近年我城多了很多水煮魚、烤魚等「專門店」，唔通又係繼大陸/灣灣茶品後又一潮流食品？），真係難以評論好品好食。
魔術師餐單：迷你版麻椒水煮魚連白飯（＄75），另加咸金桔蜂蜜（＋＄5），總計＄80。
*＊＊
3. 很得輝（大角咀店）
都係在《一人飯局（2023年1月至2月）》提過呢間雞髀專門店的屯門總店，而大角咀分店就是在良順興附近，行過幾步就見到：
這晚早收工就搭車去奧海城行下，由於唔太肚餓，就整隻炸髀外帶返屯門屋企食（由大角咀坐車返屯門屋企都成粒鐘，都係唔叫滷水或者沙薑雞髀了）：
最正就係可以任落調味粉，查實對魔術師來說，「魔鬼辣」都唔係太辣：
估唔到搭咗成個鐘巴士，「焗」完冷氣依然香脆（盒上竟然有倒汗水），正呀！
魔術師餐單：生炸雞髀散叫一隻（＄35），紙盒上（＋＄1），總計＄36。
＊＊＊
伸延閱讀：
//老闆姦出來招呼
回覆刪除嘩哈哈！
//但由於水煮魚實在不太啱魔術師的口味
我都唔喺太鍾意，海鮮都喺越少花臣越好。而且我不太食辣，發覺最近好多新餐廳都喺辣為主。
//老闆姦
刪除哈哈，已改。
//我不太食辣
我食得辣，但四川辣就麻麻，反而印泰越咖喱 even 辣椒粒（例如打邊邊）就可以。
//近年我城多了很多水煮魚、烤魚等「專門店」，唔通又係繼大陸/灣灣茶品後又一潮流食品？
回覆刪除我有一個原創的解釋：
因為「東南西北中 發財到廣東」由來已久，多年來全國各地到廣東打工人數眾多，其中多為華中及西南人士，當地菜色嗜辣為主，令廣東越來越多針對這幫外省人口味的食肆；久而久之，廣東作為經濟大省，加上這幫省籍人士在廣東以外打工亦眾，此類菜色食肆從廣東向全國擴散，部份甚至成為連鎖品牌。
反而廣東人外出打工不多，未能籍此輸出廣東菜，其外省流行程度甚至及不上靠流行文化輸出的的港式茶記。
雖然香港的港漂現象遠比廣東開始得晚，港漂原籍地亦不特別嗜辣省份佔多，但此時內地的嗜辣菜色已成潮流，港漂不論省籍在內地已習慣，而隨港漂越來越多同時港人越來越接受內地流行口味，此類菜色食肆自然在港越發流行。
//這晚早收工就搭車去奧海城行下
提提你近來羅麥記可能好早無燒雞餐...因為奧海城food court裝修，好多原本去food court食嘢的會轉去羅麥記。我上次7：15去到已經賣晒，遠比平時早。
//省籍人士在廣東以外打工亦眾，此類菜色食肆從廣東向全國擴散，部份甚至成為連鎖品牌。
刪除認知中川菜連鎖店在我城大搞是「劉一手」，但剛開了好幾間分店便遇上疫，捱下捱下卻沒有以往的聲勢了，卻被好些較小規模的賣酸菜魚/烤魚/水煮魚的個體戶或小型連鎖加盟店取代了。
//羅麥記可能好早無燒雞餐
謝謝摩摩提場。
之前提過在深水埗元州街的山東餃子館已經執咗，早前已經聽聞話唔做，早兩日出去見已經無咗。
回覆刪除好多食肆捱唔住。屯門靠得住都執咗，佢哋個蒸蝦同埋蘋果紅茶係幾好的。
刪除//屯門靠得住都執咗
回覆刪除新墟小巴黎也執了，塊面咁大嘅朱扒無得食。
WILL
新墟小巴黎我食過一次，又唔係咁出色。華都好似好食啲。
刪除