一人飯局（2023年1月至2月）

一支公搵食，最怕就係搵位（無人幫手霸位也），所以無論係連鎖店或者係小店，魔術師都偏向食啲有座位安排服務的，所以大字頭系列同麥當當呢類都比較啱係太合意（雖然近年呢類連鎖店都有送餐服務，不過多數係照顧長者為主）；而且「有座位安排服務的」亦通常意味着「食完就趕你走」，加快客人流轉，唔容許有青食完霸住個位喺度打機也。

不過，一人飯局有個死症，就係魔術師幫襯開的小店（黃人腔）某些時的營業時間都難以捉摸，唔好話過時過節提早休息，早前疫情嚴重亦搞到一眾食店慣咗早收，直至現在都好似未曾復常，如果魔術師夜咗食飯都變得少咗選擇。

1. 中環盛記大排檔

記得早前曾在網友 blog 留言提及過中環盛記。農曆年前某天趕進度，放工晚了，發起牙痕便去盛記來個一人晚餐來慰勞自己：

豉椒炒鵝腸夠哂鑊氣，魔術師仲叫多個以前老父最拿手的滾湯芥茶煲牛肉，加白飯一碗食得大滿足。湯飲哂唔在講，豉椒炒鵝腸連汁都撈埋，正呀！

中環盛記大排檔：豉椒炒鵝腸、芥茶煲牛肉（細）、白飯一碗共$135（過年後好似加咗價？）。

2. 厚興瑜記手撕雞旺角店

都係農曆年前發生的事，不過就更加近年尾，所以魔術師都唔去中環碰運氣，改去慣常有夜市的MK。正如《無飯一人餐》中提及，厚興瑜記手撕雞係魔術師 all time favourite 之一。其門市主要係提供供外帶飯盒，或雞人隻/半隻，及各類小食。少量門市有堂食，提供款式亦各有不同。魔術師就最鍾意食冷麵餐。呢次叫的手撕雞拼雞腎冷麵，加辣，雞件夠油有口感，另附餐湯，$43食完拍拍屁股走路仲想點？

厚興瑜記手撕雞旺角店：手撕雞拼雞腎冷麵，加辣，附餐湯，共$43。

3. 堅信號生煎包

以前食開嘅祥興記執吓一間，執吓又一間，反而近年就多咗呢間堅信號。魔術師過年前就趁支付佬有 coupon 而走去試吓。唔知係咪夜晚成8點先食晚飯（其實都唔係好夜啫！），佢哋個廚房已經係半收爐狀態，生煎包同小籠包都似係叮返熱咁，包內湯汁亦無「爆」出來；酸辣湯既不酸亦不辣，比大食代系列的上海菜鋪頭更無味（連味精都慳返）。如果唔係過時過節照開，魔術師就絕不推介了。

堅信號生煎包：招牌生煎包、灌湯小籠包、酸辣湯，共$99。

4. 很得輝

以炸雞髀聞名的黃店（「良心小店」）。同一般掛住個黃名做伸手黨要首觸課金的 hea 做食店不同，呢間的炸髀/滷髀/沙薑雞髀竟然可以聞名港九，仲可以由屯門開到出大角咀認真係異數。魔術師最近試過，外賣拎返屋企（屯門店無堂食），炸髀都仲熱，油就一定有而且唔多，加埋任加的辣粉就更認惹味；磨菇飯啲磨菇和汁比上校連鎖店的多和濃，但就無咁上校連鎖店的微辣（可能想辣啲可以加辣粉？），餐飲綠茶亦正常無欺場，果然係可以再幫襯的黃店。

很得輝雞髀專門店：生炸雞髀、磨菇飯、綠茶套餐，共$50。

5. 安安燒

呢間嘢魔術師之前都寫過，咁多年來間唔時都有幫襯吓，不過店員服務態度真係麻麻。好似有一次應該係佢地轉用手機點單無耐，個介面未設計好：話說魔術師揀了某個菜式之後想 delete 但係無得揀，於是便全單 delete 再揀過，點知就連「全單delete」的功能都係假，魔術師被誤導之下點了雙份菜式，叫店員話取消之前啊張單佢竟然話「落咗單無得取消」，要魔術師叫經理來才可以搞定...前排再去食，手機介面已改善了，店員亦唔敢胡亂開罪客人，可能真係受到疫情的「懲罰」吧！

食物水準都係唔錯，不過某些大熱菜式都係依然有「燒定先」的情況，唔係即叫即燒囉！

安安燒：沙茶醬燒金菇、秘製醬燒雞中翼、燒菠蘿、蒜蓉燒蟶子、蒜蓉燒扇貝、辣汁燒海蜆、Coke Zero，共$316。

＊＊＊

伸延閱讀：

無飯一人餐

安安燒