冷氣死因

折騰了好幾星期之後（見《Ｃａｌｌ師傅》、《To 整 or not to 整》），三零的冷氣技工終於可以真正開工，上星期到魔術師家檢查部分體式冷氣（其實係變頻冷暖）在哪裡漏雪種。


今次共有兩名技工上來魔術師屋企。技工問明魔術師，今年年頭最凍嗰幾日，魔術師係有開暖氣，暖氣運作正常，所以當時雪種還未有洩漏，於是便需要量度雪種喉的壓力，以測試哪裡有洩漏的情況出現。由於魔術師睡戶的冷氣機喉是通過套廁的假天花再伸延出機身，只需一人爬出廁所窗外（魔術師當然唔會住黑廁屋！），另一人揭開套廁假天花便可量度雪種喉的壓力，以測試滲漏位置。
經過接近３個小時的工作，結果就係...
搵唔到邊到漏。
但技工唔知係咪為求魔術師安心，便告知一「驚人發現」：魔術師部冷氣機係用環保雪種（Ｒ４１０Ａ），應該用較粗身的２２分銅喉（圖左），但現在藏在套廁假天花內的銅喉卻十分單薄（圖右）：

究竟係電器商在安裝時用錯了喉，抑或是偷工減料（金屬有價，坑渠蓋有人偷，鋼筋都有人剪），又抑或是裝潢時沒有拆去舊機銅喉，電器商見在喉可用便就咁接駁上去...實在不得而知。
總而言之，今次技工幫魔術師將所有接口位換成正確喉管，測試過壓力正常，便算是暫時解決了問題。
技工又主動約好魔術師，下星期再來檢查，看看雪種是否還仍有洩漏；如有就需要換喉，真係頗大工程。
魔術師見技工工作態度良好，下午四點幾做到成八點先走，算係唔話得，俾多一百幾十當小費又如何？
＊＊＊
伸延閱讀：
Ｃａｌｌ師傅
To 整 or not to 整