一人飯局（2023年7月）

 1. 金禾

魔術師幾年前做僱傭兵的時候（見《有個上司是黃C》）就曾經在中環近上環一帶返工，威靈頓街、結志街一帶都幾多好嘢食；時至今日魔術師放咗工都有時會返去行下食個晚飯。這天又係路經威靈頓街，見有間門面裝修都唔錯、主打鹽焗雞、豉油雞、及各式小菜的中菜館，便一於又試吓新嘢。

入到去坐定，服務員遞上茶及餐牌，魔術師裝模作樣的看了一會便叫了個無敵鹽焗雞飯，店員竟然細心地講出是日例湯是甚麼，問魔術師啱唔啱飲（唔啱飲便轉餐茶吧）。有湯魔術師當然啱拘c

落咗 order 後先上例湯，不一會雞和飯已到，服務員也奉上骨碟，又細心地記得魔術師是叫少飯。白飯軟熟，雞肉嫰滑肥美，伴菜的花生亦相當靚仔，例湯亦較想像中大碗，味道亦唔錯，雖未至於「無敵」但在中環$87一個晚餐已經算係咁。睇返 Openrice，呢間餐廳嘅負評原來都唔少，更顯得魔術師唔止唔係「平民食家」，更只能算是「要求低」、「只求飽肚」之輩。

魔術師餐單：無敵鹽焗雞飯套餐，連例湯、白飯，共$87。

＊＊＊

2. 泰國美食

早前在《一人飯局(2023年5月）》提過在奧海城食過黑松露煎餃，這天便又去試吓隔離檔的海南雞飯，睇吓可唔可以代替到旺角新世紀已結葉的三巡（睇嚟魔術師真係好似陳馮阿珍，日日食雞都得）：

估唔到呢個所謂泰式海南雞飯竟然有蕃茄、青瓜同三色醬汁，似坡式多過似泰式，不過店面有泰國菜專有的辣椒魚露同辣椒粉，魔術師就最鍾意幫雞肉同例湯「加料」...個雞算係咁，可惜無去骨，即時雞件唔「鞋」口，但肉質較「實」，比唔上以上金禾的鹽焗雞咁鮮美；而且唔知係咪當時已經係晚上八點幾，個油飯賣得七七八八，店家俾埋啲煲底飯魔術師，感覺上比較乾身；講到尾最出色的竟然係個湯。

魔術師餐單：海南雞飯套餐（$65）＋ 罐裝Coke Zero($10)＝$75。

＊＊*

3. Mr Poggy

周末通常都係魔術師的煲碟 day，有時睇夜咗出到屯門市中心無嘢食（自疫情三年以來，巷狗食肆都慣性早收咗，就連旺角都好似無哂夜市咁），於是有時會轉去龍門居，有時便會轉戰何福堂。是夜去到何福堂，見到呢間有賣 Pizza、意粉、漢堡飽、沙律、炸雞等多國菜、只做外賣的小店，見到個細細食套餐幾啱食，便叫了一 set 外賣自取回家。

雖然要搭車，但返到屋企仲啲雞翼同洋蔥圈都係熱的，包裝用上紙盒與隔油紙，非常精美，味道甚佳。$36仲有得碌卡賺回贈，夫復何求。

魔術師餐單：細細食套餐（香辣雞翼4隻、炸洋蔥圈1份、綠茶一罐），盛惠$36。

＊＊＊

伸延閱讀：

一人飯局(2023年5月）

有個上司是黃C