明星

話說早前魔術師入院期間（見《又見新一袋醫護人員》），早期有幾日抽血檢驗發現肌酸酐（Creatinine）超標，顯示腎功能較差，雖然出院時指數已回落，但為安全計屯門醫院還是安排了為魔術師做過抽腎組織化驗。於是魔術師日前便跟公司請了兩天病假，早上入院，做完之後在醫院睡一晚，無事第二天便可出院回家。

成個過程就係要在抽組織前一晚00:00復不飲不食，然後朝早去醫院日間診所登記入院，等呀等的等到被推去「手術室」，魔術師就趴喺帶床上，感覺到復腰被火酒清潔完後就篤了幾針。醫護幫魔術師貼上大大塊敷料保護後，便可躺平以身體重量壓住傷口止血，其時已是下午一時正。

魔術師被推回原來的等候病房，再要等兩個小時（即下午三點）才可進食，還被告知遲啲會轉病房。魔術師又再等呀等的，去到下午三點終於可以食個三文治同蘋果，飲吓牛奶同水補充吓，再安心睡一覺等轉房。

但，又再等了又等，只是一眾年輕戴住口罩唔知貌唔貌美的「姑娘」（護士）妹妹成日走嚟問魔術師痾咗尿未。喂，成大半日未食過嘢，「篤針」前又已排清小便，下午三點才飲過些少水，點會咁快有得痾？而且魔術師要臥床，不能正常如廁，在床上用鴨仔解決始終唔慣，加上一眾年輕戴住口罩唔知貌唔貌美的「姑娘」虎視眈眈，光天化日之下又點會咁易痾得出呢？

（網上圖片）

去到下午五點，外間的嘈雜人聲愈來愈多，「姑娘」來問「痾咗尿未」的次數和頻率愈來愈多而且密，魔術師終於領悟到係要「有第一次小便」才可以轉病房，而一眾護士妹妹大約在下午五時交更，成日來問的原因就係想在交更前「搞掂」魔術師呢個病人。知道原因後，心情舒暢，終於「完成任務」，小便果然帶有唔少血（腎臟被「篤針」後正常反應，正常來說血尿會在24小時內消失）。

果然，下一次來問的已是另一位護士妹妹，這時魔術師早已「完成任務」亦食過晚飯，可以順利轉病房。

轉移病房後，又有另兩位護士妹妹給魔術師做個病房 briefing，，以及用鴨仔去完小便就 call 佢哋，由護士幫手留起 sample，給醫生檢視血尿情況是否有好轉。魔術師嘗試移動自己，見不痛不癢，便從「行李袋」中拿出手提電腦和充電器，由躺平變成半臥，做吓投資入賬、寫吓 blog、睇吓片等「日常工作」。

呢個復康大樓比主座大樓少外判工，由兩位護士妹妹「睇哂」呢間病房，包括為行動不便的長者病人清潔換片，期間魔術師當然有叫護士妹妹幫手留小便。再夜啲護士換更（這病房的換更時間好似同「做手術」的病房不同），接夜更的是兩個二十出頭的護士妹妹（其中一個戴眼鏡、另一個就淨係睇對眼都應該係可愛妹妹），負責幫魔術師留小便卻是由較年長（高級？無奶油卦？）的眼鏡娘來做，見血尿情況減少，翌日無事應該就可以出院了。

一夜無話，去到凌晨兩點，兩位護士妹妹吵醒魔術師話要量血壓。可愛啲那位護士妹妹竟然問魔術師：「有無人話你似明星？」

魔術師反應唔切，一呆：「吓？你話咩嘢話？」

可愛妹妹重覆了問題，魔術師便說：「有呀！陳錦鴻囉！」

這時眼鏡娘就同可愛妹妹一齊話：「係喎！」

點解魔術師成日俾囡撩嘅呢（新舊 blog 都有寫過）？

隔了兩粒鐘，兩位護士妹妹又吵醒魔術師話要量血壓。

做乜量得咁密？

可愛妹妹今次卻問：「你有無睇『HOY TV』，知唔知邊個係李尚正？」

估唔到可愛妹妹都係「有線」粉絲，便說：「梗係知啦。《臥底旅行團》吖嘛！」

可愛妹妹大喜：「有無人話你似佢？」

由陳錦鴻變李尚正，落差太大了吧。

去到上午七點，又是護士換更的時間，眼鏡娘和可愛妹妹來跟魔術師 say goodbye 了。

可愛妹妹又撩魔術師：「真係無人話你似李尚正咩？」

魔術師笑言：「無喎！」

可愛妹妹：「咁你記住係我第一個話你似李尚正喎！」

魔術師差啲想話：「咁你叫咩嘢名先得㗎！」

但鑑於年齡上魔術師跟可愛妹妹相差比楊過跟郭襄更遠，梗係唔會再「撩」落去（又話說，諗起上次整親隻腳，俾個物理治療妹挽住臂彎行，又真係好 romantic）。

去到朝早，血尿情況已大幅改善，醫生檢視後下午就可以出院。魔術師食埋過淡而無味的「醫院飯」，便可以執嘢返屋企了。

＊＊＊

伸延閱讀：

【醫護熱話】護理系畢業生唔習慣輪更 大呼：唔夠休息 點做一世呀？（CTGoodJobs 2024/06/14）

Bowtie：甚麼是肌酸酐？與腎臟有甚麼關係？了解正常值及健康風險！

新一袋醫護人員

又見新一袋醫護人員