新一袋醫護人員

魔術師入到病房，只覺充滿青春氣息，個人都為之精神一振：唔只係靚女主診醫生，其他醫護例如職業治療、物理治療、護士助護，不論男女，都咁鬼後生嘅！？
睇怕都係以老帶新，由少量有經驗年紀大些少的醫護，帶住一班後生 on the job training。
而更難得的是，似乎班後生都幾 enjoy 份工，例如要幫一些缺乏自理能力的老人洗腳趾甚至抹屁股，都未有口出惡言，以專業態度面對，認真值得一讚。
當然，對於一些要求比魔術師還要高的刁民而言，後生仔偶爾犯錯，待慢了「客戶」，也是接受不到的「服務態度」，唔推上報又點得呢？
星期日早上要去照 X 光，當時未做手術，魔術師就只能躺在床上被助護推動。咁啱嗰次幫魔術師推車床的是一位大眼睛，梳着馬尾，中間分界，頭髮兩邊垂下（有點像《龍珠》中的十八號），雖然鼻子咀仔同下巴都被口罩包住，但照計都算是一件樣貌標緻的 MK 港妹...

（網上圖片）

搭 lift 去 X 光室期間，遇着一群醫護同事；當港妹「十八號」一開聲，魔術師就吃了一驚。
「嘩！我尋晚買條大眼雞返去煲湯，竟然成200蚊條喎！」
估唔到港妹竟然會買餸煲湯！魔術師一貫的工作環境真係見唔着！
於是一班醫護同事又取笑「十八號」買餸唔知價。
魔術師想起老父的食譜，便搭訕說：「靚大眼雞梗係唔係用來煲湯喇！加陳皮豉汁蒸就一流！」
「乜你好肚餓咩？」「十八號」竟然回應。
但這時已到了 X 光室，要跟「十八號」說再見了。
到了下午二時，輪到魔術師去做手術了。
跟先前的理解不同，魔術師是可以用半身麻醉便可以了。
而跟魔術師解釋的，又是一名嗲聲嗲氣的妹妹仔麻醉師！
究竟邊間大學教出咁多妹妹仔醫護出嚟架？
打了麻醉針之後，妹妹仔麻醉師便跟魔術師「玩冰」，用冰測試一下魔術師對腳是否還有感覺。
魔術師回應說沒有感覺，站在魔術師右手邊的妹妹仔麻醉師竟然俯身橫跨到魔術師左手邊搞些什麼。
喂，魔術師只是下半身麻醉，上半身還是感覺到吃了兩記波餅的！
難道這是「另類麻醉」？
妹妹仔麻醉師給了一些安眠氣體，令魔術師迷迷糊糊。
手術開動，魔術師感覺到醫生在劏開左邊大腿的肌肉，然後傳來鑽骨聲。
不知時間過去，迷迷糊糊間便傳來妹妹仔麻醉師的嬌聲嗲氣在魔術師的耳邊細語：「手術就嚟做完喇，有無覺得痛呀？」
魔術師心想都係唔好掛住撩妹妹仔：「有你把聲係側近，梗係唔痛喇！」，只係正式地回應：「唔痛。」
於是，魔術師這宗「骨髓釘」手術便完成了。魔術師被推出去觀察病房裡靜候一會，確定沒有異樣之後便被推回病房去了。
這時已是下午五點半了。
＊＊＊
其實，現在的「手術」，已變成是「半電腦術半手術」，真正倚靠「精湛手藝」的程度，應該無以前咁多。
另外要注意的是，魔術師呢類「急症手術」，是跟所有病症同排一條隊的，所以如果有雙非產婦衝急症室，魔術師就要被打尖了。
又，睇見班年青的醫護人員，如果唔知，在街上隨時以為係一件 MK 妹或是有青，看來我城還不致太絕望。
最後，病房裡的清潔、捧餐等都是外判的，佢地嘅 job description 係唔包括幫病人做任何事，就連病人跌咗條毛巾都唔會幫人執的。呢一方面病人和家屬都要留意，不要見到醫院員工態度冷漠便亂發脾氣。