逆工管思維（二十七）之人才荒

話說魔術師返咗新工兩個幾月，便深得「上司器重」，竟然有份參與招聘新同事，簽立合約等工序及流程。作為新同事，魔術師當然不涉及錢銀交易的審批權，但準備文件，與獵頭公司溝通等都是魔術師的工作範圍。魔術師諗，簽合約批錢等流程固然每間公司的操作方法都唔同，魔術師以往的工作經驗在這一方面並不能派上用場，但對於保密（因為會接觸到同事薪金、職級等敏感資料）及 attention to details，這些就會是魔術師的強項。畢竟呢個部門的長工與合約工比例是50:50，招聘事務呢啲重要職務都唔會搵抱有僱傭兵心態的合約工去經手，所以魔術師呢類買少見少的長工當然就係分擔這些繁瑣精密的事情的不二人選。

認完一輪叻之後，講返正題，魔術師至今經手參與開單請人程序共有兩位新同事，一位年約30歲，一位係 fresh grad，兩者皆為電車仔...

結果30歲就做咗4日唔撈，fresh grad 就更勁，做咗兩日之後，聲都唔聲唔返就算，就連小組長都唔知佢已經唔撈：fresh grad 離職嗰日，小組長到下午先走嚟佢個位，見人影都無個便問魔術師：「佢無返工呀？」

魔：「可能佢又唔撈掛？乜佢無話你知咩？」

另外，時近年尾，又係眾合約工 contract ends 的時期...於是又有兩件電車仔僱傭兵話唔續約了。

於是，魔術師不禁以黃人腔問：「究竟係乜原因公司/我組留唔住『人才』呢？」

1. 硬件

公司電腦呀，工作空間呀等等都算 okay，而且係久違了的一人一位，唔使 share 豬肉檯咁無私隱。唯一唔好嘅地方就係本來成個 team 應該坐埋一齊好溝通，但因疫情關係眾同事要同其他 team 撈亂位坐，以免一人中招全 team 攬炒。結果就係就算小組長都係坐緊別人的座位，唔會有櫃桶、locker 擺私人嘢（魔術師枱頭就只係擺咗私伙 notebook dock、叉電火牛、無線滑鼠、須及茶杯和茶葉）。咁樣嘅安排對新同事唔係咁易適應，尤其事有問題想問人會比較困難（魔術師都係靠自學）。

魔術師評分：7/10（10分滿分）

2. 軟件

可能公司都有返啲歷史，有啲軟件用開真係好難轉去新版本（例如雲端版)，所以好多軟件的用戶介面都比較 outdate。魔術師見到嘅係有嘗試去用新的 version，但凡事總有個過程。結果舊 version 的功能有限，就多咗好多 manual admin work，非常之易錯。不過，魔術師容忍到，有青未必忍到，用舊版本軟體亦肯定「學唔到嘢」，到日後職涯無乜幫助。

魔術師評分：6/10（10分滿分）

3.健康

暫時嚟講工作壓力都唔算好大，好多時六點左右已經可以完成是日工作，最多留低一粒鐘準備翌日工作，精神壓力尚可。但由於辦公室唔近黨鐵站，返工放工尚有巴士可搭，不過如果要行去市中心食飯的話都要幾分鐘，對魔術師呢類廢中正是做運動吸收陽光預防骨質疏鬆的好機會，對身體健康有益；但對於有青來說，辦公室唔近黨鐵站又無冷氣要行一段路經已係死罪...

魔術師評分：8/10（10分滿分）

4. 人事管理

呢個就係魔術師稍有微言的地方。唔知係因為同事忙定係魔術師較一眾有青高級，不論係阿姐（眾小組長的組長）或者係小組長都無乜 training 俾到魔術師。要魔術師自學當然無問題，但如果講緊既定的工作流程，無 documentation 跟住做要自行揣摩就未免太低效率。最搞笑就係阿姐係個有如比卡超的「心急人」，講嘢一輪咀，assumptions 亦唔合理。例如魔術師只返了幾日工便當魔術師好似已經返咗成年工咁熟啲程序，求其講個名話搵阿 Peter，魔術師就跟唔到邊個係 Peter。到魔術師話聽唔明佢講乜，亦唔熟呢個流程的時候，阿姐先問小組長：「乜你無教過魔術師嘅咩？」結果阿姐知道爆錯咗魔術師，就當住魔術師同其他同事面（應該是在電話會議中）爆咗小組長一嘢，完全無面俾。仲有一些別組的電車仔會無緣無故掟電話，人人都知其性格。雖然話係個別人士，但魔術師工作咁耐，咁無家教或 business etiquette 晨早就俾老細捉去照肺好耐。

最後魔術師都要使出必殺技，返咗新工一個星期就要同小組長講自己只係打風流工，賺錢買花戴，唔係一定要受阿姐同啲唔關事的電車仔閒氣的。可能小組長有同阿姐反映，阿姐態度先好返啲，叫做 reasonable。至於無魔術師咁有冇「底氣」的有青，一係默默做工資奴，一係等機會轉工。呢個部門留唔到人，管理上的問題應該係主要原因。

魔術師評分：2/10（10分滿分）

5. Diversity

梗係講緊囡囡喇！我組只有一位聽聲係後生嘅電車妹，長工都做咗好些年。不過佢唔係坐魔術師呢個辦公室，魔術師未有機會一睹芳容。唯有等嚟緊十一月有得同佢一齊做...offsite support，到時就會返同一個辦公室...

魔術師評分：3/10（10分滿分）

＊＊＊

總分：5/10（10分滿分）