貓店長（十五）

自從疫情後屯門龍門臨、富健花園街市鋪頭大執位，好多貓店長都消失無蹤，魔術師都唔敢去打聽一眾貓店長究竟係仙遊、走失、被偷、棄養、俾咗人、定係上樓返屋企。誰料這天行過富健花園街市，只見搬入了一個鋪位的士多鋪的貨架中，有一對貓手伸了出來...望真啲係三兄弟貓其中之一，只係唔知佢兩個兄弟去咗邊：

貓店長（十四）

旺角藥房呢隻貓店長虎虎出名係隻咸濕仔，見（聞？）到有囡囡，馬上就由半睡半醒嘅狀態跳落隻走去討摸！

貓店長（十三）

HOY TV（即係有線）77台最近有新節目《尋找喵喵的故事》，究竟一眾明星貓店長會唔會入圍介紹吓佢哋呢？

講到貓店長，自然不能不提旺角藥房貓、自帶憂鬱眼神的吳（唔好摸我）生：

貓店長（十二）

早前靚姐姐牙痛，又未曾 book 到牙醫（依家應該唔痛，因為已剝咗隻大牙！），魔術師行經旺角，便去買兩包止痛藥俾佢頂住先（另加一個 pill cutter 等佢可以食半粒）。

旺角咁多間藥房，魔術師當然要揀呢間有旺角名物貓店長「吳生」睇鋪的藥房喇。魔術師買完嘢見「吳生」在紙箱產訓覺，便將兩包藥放在「吳生」白雪雪的手仔腳仔處影相...只見吳生醒一醒，用鼻子聞一聞兩包藥，知道唔係零食，便又有訓過了：

貓店長（十一）

最近 FB 討論區有個最受歡迎貓店長選舉，竟然有所謂貓店長粉絲「認真地懷疑」點票制度、有無造假等等...嘩，呢班人咁認真倒不如去選衰蟻員好過了：

（網上圖片）

貓店長 (十)

這天魔術師行過去睇吓有無貓仔睇，幸運地見到藥材貓由後巷經過藥材隔離的牛雜粉麵鋪施施然地踱步返屋企：

可能藥材貓扭吓扭吓咁行實在太吸睛，一名正在牛雜粉麵鋪食緊嘢的巷女忽然麵麵唔食，跳了起來一把捉住藥材貓對手，成隻抱起來放到粉麵鋪前面吸；又係咁幫藥材貓掃背脊，藥材貓卻之不恭，咪起對眼享受。正當魔術師舉起手機想影返張相「巷女吸藥材貓圖」之際，有個路人阿伯忽然跳咗出來：「佢係藥材鋪養，好多 fans 㗎！」

貓店長 (九)

是日（雙十）牛一，一於休息一期，吸吓貓療癒吓。這天好久不見的藥材貓竟然蒲頭走出來俾人任摸唔嬲，呢位踎係度嘅C9說就係咁摸藥材貓嘅背脊同屁股，非常之之咸濕：

而魔術師就趁機撩吓佢下巴，啲毛好軟熟，摸同被摸嘅都好開心。

水電鋪的貓仔（二十二，完？）暨貓店長（八）

話說水電貓年事已高（都有十到尾差唔多二十歲了，等於人類90歲了），隨時撒手塵寰；有時夜晚去龍門居買嘢食，見到有啲執紙皮的廢老在水電鋪前放滿紙皮箱，又怕水電貓跳了進去就此被賣豬仔...總之每次唔見佢一排都魔術師都非常擔心；今次就更加唔使講，幾個月前水電鋪已經連「鎮店之寳」的招紙都摵咗，平時水電貓夜間出入的洞口亦用雜物封住：

雖然早前有網友話貓貓仍在，但魔術師寳在信唔過呢班街坊（見伸延閱讀），而魔術師亦都唔會去問老闆水電貓的下落，廢事聽到壞消息傷心也。在此再回顧一下老朋友的英姿：

水電鋪的貓仔（二十一）暨貓店長（七）

呢兩個月唔係咪因為到藥材鋪睇中醫的街坊多咗，藥材貓也少有露臉（怕中招？），只係驚鴻一暼見過佢跳返入「員工休息室」的身影，另一次就係佢坐係度眼望望：

貓店長（六）

呢排魔術師去探一眾貓店長，都係唔見水電貓走出嚟（見到佢躲在店內的身影），就連士多貓同藥材貓都少咗浦頭。有一次見到藥材貓坐咗係店內東張西望，即刻就引到個阿叔走嚟同佢玩，呢位阿叔牛龜咁大隻遮住哂個鏡頭，搞到魔術師想影張相都唔得。

唯在趁年尾，整理吓啲以前幫士多貓和藥材貓影落的照片出嚟喇！

士多貓（們）都是好員工，會留心睇鋪：

水電鋪的貓仔（二十）暨貓店長（五）

這天行過水電鋪，碰巧又見到水電貓一枝箭咁從鋪內竄出，心知佢又要去花團如廁，便靜靜地等候水電貓坐定再「偷拍」（應該不算是犯了「窺淫罪」吧？）：

由於唔知道水電貓會痌幾耐，魔術師「偷拍」了一張相之後便欲離去。點知呢個時候水電貓已經完事，飛快地用手撥好沙土掩蓋氣味，再一個轉身穿越欄杆跑回店內，入門前仲要四處張望睇吓有無被敵人跟蹤...全程唔使１０秒，魔術師想再開機拍攝都來不及，真係唔好睇水電貓年紀唔細，身手都仲係依舊矯捷呀！

水電鋪的貓仔（十九）暨貓店長（四）

水電貓神隠咗大半年，只係間唔時見佢伏在鋪頭內的暗角嘆冷氣睡懶覺，想影張相都唔得；這天唔知點解竟然唔怕熱走咗出嚟，眼神依然係咁凌厲，梗係要影返張相同各位粉絲報吓平安喇！

貓店長（三）

這天行過，見到其中一隻士多貓急急腳從店內竄出，橫越行人道「捐」過欄杆走到花圃一邊。有青店主人隨即追出，喝罵幾聲叫貓貓不要再跑，否則就會跑出馬路。只見那貓左望右望一會，又飛也似的跑回店裡去。魔術師好奇心起跟去看看發生甚麼事，原來有個女人帶着小狗行過，不知是否嚇親士多貓，令其跑走店外。轉過頭有青店主已抱起膽小士多貓，跟狗仔親近親近。

另一隻士多貓就無你咁好氣，心靜自然涼：

貓店長（二）

千呼萬喚，先嚟一張藥材貓情深款款、眼仔碌碌咁望住鏡頭嘅玉照先！

貓店長（一）

水電貓少出嚟蒲頭，但佢附近的鄰居就相當活躍。有日行過就近的士多，見到士多貓蹺埋對手好嘆咁享受貓生，其實人類營營役役成日講財務自由為乜呢？