裸考ＪＲＥ

舊年年底魔術師待業期間，前上司葵鼠曾介紹了個獵頭小妹給魔術師。嗰時獵頭小妹曾經介紹過一份工給魔術師，但由於大家要求其實都幾唔同，見完工都知唔啱；最近日前又收到小妹來電，話有份類似老本行的工問魔術師有無興趣。魔術師無可無不可的便去了面試，那面試的主管倒也識貨，對魔術師ＣＦＡ３個 Levels 都考完大感驚訝，謂「好多人想考都考唔到架喎！」，魔術師見之，印象早比那反問「什麼是ＣＦＡ」的黃Ｃ上司好得多。
不過，在見呢份工之前的周末，魔術師卻走了去考特衰正苦的ＪＲＥ。
ＪＲＥ全名是Joint Administrative Officer / Executive Officer / Labour Officer / Trade Officer / Transport Officer Recruitment Examination。顧名思義，要做ＡＯ就考呢份卷。雖然魔術師早已不是「覺得ＡＯ薪金好吸引」的年齡組別，不過人工雖然不感冒，但見到兩個表弟都係公墓員，仲可以牙斬斬話年年有人工加，呢種對沖自己薪俸稅兼屈廣大港豬機的生活卻也頗寫意，真係財務自由靠哂佢；於是魔術師在考完ＣＲＥ之後，見ＡＯ招工，便又搏下大霧申請。在網上填好申請表後，不久便收到電郵通知叫魔術師去考ＪＲＥ了。
考試之前，魔術師都上網查下，ＪＲＥ係考乜東東。原來係考作文。以魔術師文采來說，空槍裸考都可以，咁即係唔使溫習喇。之但係在查找資料期間，竟然見到一條咁搞笑的thread：

老公手快DELETED左聽日公務員JRE EXAM個EMAIL...
緊急..我老公前幾日手快快DELATED左佢封公務員EMAIL...之前只係記得話有個SEAT NUMBER...但唔記得係幾多號...係唔係一定要知個NUMBER先可以考試架???有無JM知道???封EMAIL仲有無咩要注意嘅地方, 因為只係睇左一次, 諗住今日再睇點知無左....仲有, 今日都收到封信係公務員嘅申請書覆函, 裹面有個申請人編號, 呢個NUMBER同唔同SEAT NUMBER呢?希望有經驗嘅JM或聽日會去考試嘅JM可解答, 唔該哂

魔術師實在難以想像終日在Ｃ９王國中流連的港豬，做嘢咁鬼唔小心，ＩＱ究竟有幾高！
＊＊＊
由於ＡＯ／ＥＯ等報考人數眾多，ＪＲＥ試埸分佈我城各地，方便考生。魔術師也就給分派到屯門某中學應考。去到學校，只見較成熟者有之，較年輕者亦有之，ＭＫ港女狀者亦有之，紛紛盤踞在學校操場各方，或執「手機」、或執「碌屎」，均口中唸唸有詞。魔術師大感詫異，乜寫作能力唔係日子有功，浸淫返嚟嘅咩？抑或班有青又係好似公司班小妹咁又要對正字有興趣但又葉公好龍乜都唔去主動暸解，所姒臨場要惡補時事？
以上呢啲問題，對掹住車邊都叫「周身刀」的魔術師當然不值一晒。
入到試場，魔術師都打咗個突：環顧四周，竟然有一半考生 no show，乜唔係話公墓園職位係爭崩頭嘅咩？
＊＊＊
打開試卷，有一中一英兩條問題，限時三小時作答：
英文題係講某城有青為患，向上流機會低，樓價飛升，青年人創業路亦難行。現在有一計劃，打算由政府撥出１０億，另找商界又搞助１０億，成立一配對基金，以助有青置業或創業。答題者身為青年事務部的官員，就要為成立該基金撰寫一份建議書，明確建議一個方向，並提出分析及至少兩個論點以支持該建議；另外就係要列出選取該方案後對經濟、社會、和政治的影響（每項最少要講一個論點），與及提出兩項可行措施以落實方案，並令到該基金可以「持續發展」。題目、背景資料、及少量數據其佔７頁紙。
中文題就係講疑似假難民申請酷刑公約聲請政治庇護的審議。由於該些疑似假難民在審理期間可以在港自由活動，容易變成黑市勞工、或參與不法活動，而且也花費正苦不少資源。有議員致函保安局局長提出將該些呈請庇護之人士在審理期間均需被關進禁閉營。答題人需要為局長草擬一封回信，信中需提及禁閉營的優點及缺點各兩個，局長是否贊成此建議，並提出兩個落實措施。題目連資料佔兩頁紙。
＊＊＊
英文題比較簡單，答題都是一般建議書格式，有返咁上下工作經驗應該毫無難度（對考ＥＯ的有青考生可能會難咗少少），係要寫四五頁紙會有啲攰：

• Purpose
• Background
• Analysis and suggestion
• Implications
• Implementation
• Conclusion

至於中文題，都無一般書信格式。中文答題簿係原稿紙格式，一頁３００字，魔術師答了大約一千字便完成。
題目簿封面有寫名虛擬姓名中文要用陳一心，英文要用 Chris Wong，呢一點要注意。
時間方面，審題連思考大概花１５分鍾，英文題答９０分鐘，中文題答７５分鐘。又唔係等佢開飯，話知有無下文，求求其其，咁就考完。
＊＊＊
最後，有個有返咁上下年紀的監考官見魔術師用萬寶龍限量版靚筆應考（枝 rollerball 真係好鬼好寫，答題無理由用鋼筆或鉛筆吧！），趁收哂卷手多多拎起支筆嚟睇，似乎都係識貨之人！

＊＊＊
伸延閱讀：
傷港特衰正苦公墓園事無局　政務主任╱行政主任╱勞工事務主任╱貿易主任╱運輸主任聯合招聘考試
今年狀元特別少
「學霸」都有落泊時
言出必行買鋼筆