《屍殺列車（Train To Busan）》：小人比女子更難養

講真，魔術師睇完又真係唔覺好似啲影評咁講到咁神，其實咪又係一貫喪屍片的「人性黑暗面」加困獸鬥，有啲似《２８日後（28 Days Later）》加《末世列車（Snowpiercer）》，而魔術師最討厭的小屁孩的下場又唔似《80分鐘死亡續播（[Rec]²）》，委實令魔術師相當不滿。

男主角徐碩宇（孔劉飾）是個沽貨唔眨眼，專吃散戶的基金經理，但實際上只是「工資奴隸」兼單親爸爸，忙到女兒的才藝表演又無去睇，同一份禮物更可以送兩次俾阿女都得：

成套戲最令魔術師討厭的就是這位小屁孩女兒（金秀安飾），由頭到尾雙目無神，好似聚唔到焦咁，就連片中的喪屍的眼神都要比佢勁：

由於小屁孩冤住老豆去探媽咪，所以基金經理便帶了阿女上了由首爾直到釜山的高鐵。忽然列車上闖進了一名被喪屍咬了的少女，喃喃自語話「知錯」，唔知代表咗乜；仲有就係有一名流浪漢也上了車，喃喃自語話「啲人死哂」，似乎是知道內情。由於魔術師未睇《屍殺前傳：首爾站》，呢兩條友是否跟前傳有關就不得而知：

火車上有新聞廣播，話全國都有暴亂，老婆婆姐妹花見之，便深信不疑，話「依而啲人少少嘢就暴動，俾着以前一定俾人拉去再教育」，盡顯世代矛盾：

少女病發，首當其衝的就是 train attendant；然後屍毒就一傳十、十傳百的爆發開去：

喪屍病毒已在全國爆發，政府將之定性為魚蛋革命，又掟磚又放火，仲捉住直升機唔放，導致大量軍民受傷，老解已出動平亂，６８９更多謝軍隊及時支援，並呼籲民眾携手共渡時艱：

大隻佬尹相華（馬東錫飾）與懷孕妻子成姬（鄭有美飾）是對富有正義感的夫妻，做老婆的竟然叫老公去救個三九唔識七、被喪屍襲擊的乘客甲。眾乘客逃到某卡車，小屁孩發揚大愛精神讓座給老婆婆（魔術師一向唔認為精力過盛的小屁孩是需要座位的），卻給基金經理爸爸數說了一頓，學笨土派話齋，顧掂自己就好了，邊得閒理人地呢？

列車到達中途站下車，基金經理以內幕消息跟軍人客戶作交換，要求接應；其實搞到咁大單，空倉不回就得，仲使乜要內幕料呢？去到站頭，做爸爸的仲要俾阿女鬧，話有秘密通道都唔同大家講，咁鬼自私怪唔得老婆要走佬。其實有無秘密通道都一樣，原來一眾人民子弟兵已受感染：

眾人又跌跌墥墥的走返去架列車，車長開車直奔釜山。混亂間眾人失散了。基金經理、大隻佬、和中學棒球隊男生要出發去搵返女兒、老婆、同女朋友仔珍熙。三人有如美帝隊長，智勇兼備，利用喪屍不會開門與及只有視覺（在黑暗的隧道中不能見物）和聽覺（以電話鈴聲引開其注意力）的特性去闖關，終於救出了小屁孩、成姬、老婆婆姐姐、與流浪漢四人，要到珍熙等乘客處會合：

乘客裡面有個巴士公司的ＣＯＯ，疑心基金經理眾人已被感染，不准開門。其實以病發速度來說，受了感染捱唔到幾分鐘，而且阿ＣＯＯ佢見過會講嘢會打電話的喪屍咩？最柒的地方係其他乘客都聽佢講而無人質疑：

最後大隻佬要基金經理幫佢「照顧」佢老婆，英勇戰死。開始變得唔自私的基金經理他們破門衝入ＣＯＯ等人的車卡，大罵ＣＯＯ自私冷血，卻給ＣＯＯ反咬一口說他們已受感染，要趕到另一車卡；都係嗰句，呢幾個人企係度咁耐都無事，即係無事喇，使乜咁大疑心？結果，由於婆婆妹妹見跟自己相依為命的姐姐已變喪屍，又不值眼前這群人的不知所謂，便打開門讓喪屍來殺個痛快：

究竟喪屍係點嚟嘅呢？就由唔知點解在證券公司好安全的同事匯報給基金經理聽：原來就係因為佢地天使投資基金旗下的核心項目其中的一間化工廠洩漏肇禍，現在就只有釜山是安全的：

去到某處，列車路軌受阻，需要轉車。一個轉折，ＣＯＯ將服務員和珍熙當成人盾給喪屍吃了，棒球小子亦殉情甘心被咬，列車長又因救ＣＯＯ而死，流浪漢為救小屁孩犧牲了自己，最後就只有基金經理、小屁孩、和孕婦成姬上了列車長臨死前已開動了的火車頭：

現在全國已沒有「人營」，只有「喪屍營」。所有喪屍發動齊心力量，想拉停火車頭，但卻給基金經理踢走：

但最後基金經理也逃不過變了喪屍卻依然忘不了要返釜山探媽媽的ＣＯＯ。基金經理雖然摔了ＣＯＯ下火車，但自己也被咬了一口，唯有交代了後事之後便跳車自盡：

火車去到釜山前的隧道停下，成姬帶着小屁孩下車。軍隊接到上頭命令格殺勿論；但這時小屁孩無端端的卻唱起才藝表演時的歌曲，軍人知道二人不是喪屍，便將她們救了下來：

＊＊＊
魔術師真係唔多覺本片描述的人性黑暗面有幾咁突出，基本上好多荷里活片都已經講過；如果講自私賤格與「人性光輝」對比，甚至乎在《異集續集（Aliens）》裡，想以「懷孕」方式將異形偷運回地球的 Weyland-Yutani 公司代表跟忠於人類的機械人Bishop的對比更為強烈。劇情亦基本上估到哂，唔驚嚇亦無扭橋（只係最後ＣＯＯ想返屋企見阿媽的遺願比較估佢唔到），對睇慣呢類電影的魔術師只是一般水平（最大的 bug 就係喪屍無死穴，主角群根本無可能衝到出車卡）。傷民如此依哇鬼叫，可能真係哈韓哈到上腦，乜都秤先啲之過。
＊＊＊
伸延閱讀：
《末世列車（Snowpiercer）》：傷港人的自我實現