鎢絲 sir 的大茶飯

無見鎢絲 sir 咁耐，原來去咗食大茶飯（36:25 - 47:25）！

樓盤傳真 2018/04/07 2018/04/07 22:55

二手公屋成交創十年新高，價位一再突破500萬，同時預示下一期綠置居即使以市價六折訂價後，大有機會貴過今期七折訂價居屋，關乎綠置居選址優越，但供款佔入息比率亦會超出金管局限制，房委會資助房屋小組內，有委員贊成綠置居定價與市價脫勾。
樓價連續創出歷史新高，當中反映豪宅指數更是領頭帶上。今集以半新豪宅盤畢架山一號為例，談談豪宅市道。
宏安馬鞍山薈晴，驗樓單位是全盤最平單位之一，當日買家入票搶購，但會否平得有道理？
680 萬裝修費，將2600呎空間大改造，三層高獨立屋，除了單位外牆，基本上全屋改頭換面。

鎢絲 sir 話係呢間屋自己最滿意的作品之一，梗係喇！有得將間三層獨立屋反轉再反轉任佢玩唔在講（好地地又現水泥工業風，仲屈係戶主想要的效果），收費仲哈哈哈添！唔向屋主講返聲多謝都唔好意思喇！

鎢絲 sir 先由 nice to have 做起：將地庫有蓋停車場原來的門拆去（左上），再向停車場偷位造了一個玄關（右上），玄關附有到頂鞋櫃和地台，方便屋主換鞋（左下、右下）：

鎢絲 sir 將地下客廁１拆去改細（左上），搬去廳中心變黑廁，間屋咁大都要在客廁偷位擺鋼琴，同埋無厘頭整個閣仔在客廁上面（右上）。於是從地庫停車場行上一層到地下，便見到了由新客廁１打造出來的走廊（左中），轉到客廁１背面是鋼琴（右中），頭頂是閣仔（左下），沿着飯廳旁的樓梯可以到達呢個在廁所頂的「休閒區」（右下），臭唔臭就真係住落先知：

鎢絲 sir 又將原來的客廁２、廚房及書房全拆（左上），變成特大開放式廚房（右上）；又將無窗的雜物房改建（左中），變成極度刻薄兼唔合規例的工人房（住人的房一定要有窗！）及工人廁（右中）。加上懶豪華的樓梯及六大雲石餐桌（左下、右下），「朱門酒肉臭」五個字早就刻在牆上。

客廳有特色吊燈（左上），梳化後落地玻璃可以直通花園（右上）；但奇怪的是另一邊的梳化背後竟然有張椅同摺枱，逼逼狹狹咁，拉開來可以做小書枱（左下、右下）！原來拆咗個書房變廚房，「新書房」就小家到咁：

鎢絲 sir 再將二樓所有房間拆去（左上），間成三房（右上）。主人房套廁用磨砂落地玻璃趟門分隔，若隱若現（左下）；馬桶例牌以水泥風格打造，縮埋一角同痴瘋仔個「次格」差唔多：

三間房都偏細。主人房同客房都係黑白灰加張綠色椅，配返個客廳的用色（左上、右上）；反而仔房就正常得多，包括埋個套廁都無玩水泥風（左下、右下）：

三樓最無嘢改，又係 nice to have 咁間一間洗衣房出來（左上、右上），其餘地方又係休閒空間（下）。但，三個人住要咁多休閒空間做乜？

係咪發覺仲有好多位未睇？原來係屋主唔俾影。２６００呎三層獨立屋，一家三口，兩公婆一個仔，明明係住開１４年（當年買入價為７２０萬，現價為２,１００萬），點解會忽然間發覺唔夠住，仲要住屋拆哂來個空間大改造？唔知又有無僭建成份呢？唔怪得屋主神神秘秘，唔肯透露地址喇！