爽歪歪芽莊遊（一）之魔術師被有青職場整頓

是咁的。靚姐姐生意難做，聽佢講真係唔覺「執1間開16間」的「盛勢」（又或者執的是靚姐姐的舊客戶但新開的卻並非她的潛在客戶群），所以忽然要離巷散吓心，否則壓力爆煲隨時「會死」（算係另類「唔去旅行會死」），於是就緊急召喚魔術師做書童男伴遊。

今次短短哋玩四日三夜（其實第一日去到已是夜晚），又係越南（見《爽歪歪富國島（二）之到埗（Day 1）》），但今次就係去芽莊。點都好，去得咁急，結果就係要魔術師緊急向公司請假。

由於公司年度半年結的關係，魔術師最近就多咗好多計算人力資源，與外判商處理合約安排人手的工作。咁啱有個別項目較為緊急，需要有青同事囡囡C做魔術師的後備。早前都曾提及過有青同事囡囡C屬卡練精學懶之輩，同佢開會交帶工作，魔術師就即時被整頓，就連 call 埋另一名負責看顧資源的女同事G一齊出席，有青同事囡囡C亦無面俾：

1. 工作程序每次都要重新「高呼」一次                                                                                                                                                                                                                    

每次魔術師放較長假期，都有責任每次要求有青同事囡囡C作工作替補時，都要花時間將工作程序 go through 一次，否則有青同事囡囡C就有藉口「啱識做」。是的，魔術師在開會期間問有青同事囡囡C「之前我放假都講過幾次啲工序，點解仲要重複？是否唔記得？」

有青同事囡囡C回應：「梗係唔記得喇！」

2. 替補工作只是按 send

每次魔術師交帶有青同事囡囡C工作時，就算已有電郵關於項目A寄出並 cc 了有青同事囡囡C，希望她可以「舉一反三」，當被要求替魔術師完成項目B、C、D時，佢要識「抄 template」發電郵。但有青同事囡囡C在會議中卻問：「點解你唔寫埋項目B、C、D，俾我 send 出去呢？」完全是「不在其位，不謀其政」的態度，魔術師無幫佢起埋稿，似乎是魔術師錯。

3. 以時間爭取空間

由於魔術師 call 埋另一名同項目管理有關的女同事G來開會，有青同事囡囡C都未必好意思太過賴皮。到連同事G都頂佢唔住，發功這有青同事囡囡C需要完成替補期間獲發的工作時，有青同事囡囡C最後就以不在乎的口吻「咁好喇，盡做喇！」。魔術師一聽就知佢係以「I will get back to you later」呢類方式拖延直至魔術師放完假回來為止，工作完成不了不特只，隨時仲搞到一鑊粥。

其實以止工作模式在唔少有青同事都見過，係有青同事囡囡C能夠「集各家之大成」，表現特別亮眼而已。

＊＊＊

伸延閱讀：

傷巷有青整頓職場

爽歪歪富國島（二）之到埗（Day 1）