魔術師多月前跟靚姐姐傾閒計，見佢話好想去旅行，於是便馬上打蛇隨棍上，話魔術師年底要清假，可否結伴外遊？沒期望之下竟有極大驚喜，伊人竟然一口答應，真係「唔試又點知唔得呢」！靚姐姐係我城「商界女神」（笑），日理萬機，魔術師當然馬上化身「男伴遊」，幫靚女打點旅行計劃。
1. 找旅行社包團，訂立目的地與行程
魔術師跟靚姐姐的共識就係二人包團，由旅行社提供路線、安排司機（同時兼任導遊）。目的地考慮過好幾個，由中歐、南非、古巴、都考慮過，但經再考慮天氣及旅行社包團情況（有啲旅行社尤其是係旅遊達人KOL主理嗰啲，真係當你水魚咁劏）），機票、酒店訂等（各位唔好心邪，魔術師係訂一房兩 Twin 或 Single beds 的），最後都係決定遊袋鼠國；路線有部份係靚姐姐朋友推介的旅行社提供，有部份則係參考其他旅行社推介調整，總之有動有靜，10天內去勻悉尼、開恩茲、墨爾本，每處停留3天，唔會太 chur 就得（有啲旅行社提供行程係每間酒店住一晚，去10日淨係日日執行李都死得）。
在旅行社安排好因航機位後，一定要記得「加錢」（《黑社會以和為貴》鄭浩南腔）劃位，否則俾人劃哂得返單丁位，到時就真係「後果自負」了！
|
| (圖片來源：傲遊天地 BLISS TRAVEL FB, captured on 6 Jan 2024） |
2. 澳洲入境簽證
要留意持有特（級）衰（退）護照去袋鼠國並非免簽（唔怪得智障瘋走去袋鼠國「執葉」）：
|
| （圖片來源：中華人民共和國香港特別行政區政府 入境事務處 > 旅行證件 > 香港特別行政區護照免簽證或落地簽證情況一覧表, captured on 7 Jan 2024） |
所以去袋鼠國是要申請簽證的。袋鼠簽證是要用 App 申請，搜尋「Australian ETA」就可以，需要輸入我城身份證、scan 護照、自拍等，旅遊簽證費用為20元袋鼠幣：
|
| (圖片來源：App store Preview > AustralianETA, captured on 7 Jan 2024) |
由於澳洲 ETA 要綁定護照，資料都存在手機內；靚姐姐傾生意就叻，呢一方面個人 admin 的自理能力就係有限公司，都係要魔術師用佢部手機嚟申請。
3. 貨幣找換
雖然尾帝錢莊提供呢個 Global Wallet 服務，只要戶口有足夠我城貨幣，碌 Debit Card 便可隨碌隨唱錢（ 「動態 spending」？），仲可以免 1.95% credit card/debit card 外幣手續費，同埋有 3% 現金回贈，對於一般 layman 客戶來說都算是方便：
|
| (圖片來源：Citibank Hong Kong > Citibank Global Wallet 官網, captured on 7 Jan 2024) |
不過，魔術師一來唔會預留我城貨幣在尾帝錢莊的儲蓄戶口用來俾 Globl Wallet 「動態 spending」（有多餘現金都去哂 Mortgage Link 賺高息，其他錢莊的儲蓄戶口只係剩下「散紙」），二來作為 Interactive Brokers（簡稱 IB） 的客戶，魔術師又點會用銀行唱錢呢？IB 提供的兌換率就最貼市最化算，而且提款澳紙，由 IB 尾帝錢莊戶口去魔術師的尾帝錢莊戶口，完全無手續費。就好似今次靚姐姐同魔術師各提 2,000 袋鼠幣現金，魔術師用帝幣轉袋鼠幣再提款，提 4,000 得 4,000，真係人都癲！
再加上尾帝錢莊櫃員機可以撳袋鼠幣現金出來（50蚊紙），連隊都唔使排，真係話都無咁易就搞定：
|
| (圖片來源：Citibank Hong Kong 官網 > 自動櫃員機網絡, captured on 7 Jan 2024) |
4. 電話卡
靚姐姐作為企業客戶，電訊公司一早就送定呢樣嗰樣的特惠漫遊套餐，外遊上網電話唔使煩；但魔術師「一介草民」，用「薯嘜通」的漫遊未免太貴：
|
| （圖片來源：Smartone > 外遊服務 > 漫遊數據多日通, captured on 7 Jan 2024） |
於是魔術師便加入了大貓 Travel Guru 計劃，同樣有外幣 3% 回贈，
|
| （圖片來源：HSBC HK > 信用卡最新優惠 > 全新 Travel Guru 會員計劃, captured on 7 Jan 2024） |
申請 AirSim 電話卡亦有優惠，（2023年12月時）再用 PayMe 增值亦有回贈，只需我城貨幣$188 便有 10天 5GB 4G 數據使用：
|
| （圖片來源：AirSim > 大洋洲 > 澳洲 - 4G 數據, captured on 7 Jan 2024） |
5. 旅遊保險
至於旅遊保險，由於索償難度高，便在維基TV Mall 購入簡單購入一份，聊勝於無：
6. 執行李
魔術師唔係旅行達人，自然無資格教大家執行李；靚姐姐帶足十日衫，行李喼重達 22kg，被航空公司貼上「Heavy」標題，咁先夠勁。其實要帶去嘅嘢唔多，都係內外衣物（預咗帶4套，需要在酒店洗衣），個人衛生用品、電腦、相機、鏡頭、旅行插頭、USB 線、叉電等。鑑於要遊大堡礁，魔術師都特意帶埋泳褲拖鞋，與及一套舊衫去做後備替換，用的着就用，唔用就丟掉。靚姐姐帶足十日衫，行李喼重達 22kg，被航空公司貼上「Heavy」標題，咁先勁。
不過，即使靚姐姐在出行前溫馨提示魔術師要剪頭髮同埋帶鬚刨（其實唔使提魔術師都會做會帶），就係唔記得提及帶「指甲鉗」，百密一疏之下魔術師呢十日就要做住「陳玄風」先喇！
|
| 裁剪自靚姐姐為魔術師拍攝，2023年12月29日亞拉河谷熱氣球之旅後 |
7. 見家長（？）
其實魔術師在十多年前都見過世伯伯母，不過就無深入介紹。今次阿女同個男人去旅行，孤男寡女共處一室，世伯又身體違和，當然就由伯母出面同魔術師食餐飯，問清楚姓甚名誰、做邊行每月搵幾多（關乜事？）、暸解吓人品性格咁；在另一場合靚姐姐阿哥又問我哋點識返嚟...總之問長問短，有啲似見緊女婿咁...
但實情是，靚姐姐人見人愛車見車載，魔術師有排都未輪到喇！
＊＊＊
伸延閱讀：
原來魔兄喺冇關於旅行嘅label，可以考慮整一個...
回覆刪除//有啲似見緊女婿咁
問做邊行每月搵幾多, 可以省略"有啲似"喇!XD
//行李喼重達 22kg，被航空公司貼上「Heavy」標題
去天氣熱嘅地方又的確喺重咗啲. 不過我喺極簡人士，十幾日淨手提都得...而且女士有時會為咗去高級啲特別啲嘅場所（我預計之後應該係會有嘅！XD）會帶多啲靚啲嘅衫呀鞋呀手袋呀
//目的地考慮過好幾個，由中歐、
聖誕去勾州要預防天氣差，例如十二月德國就真喺差到火車飛機停咗好耐，所以都喺去暖嘅地方好啲。
//即使靚姐姐在出行前溫馨提示魔術師要剪頭髮
淨喺十日唔喺十個星期.....呢個要求真喺可圈可點，恭喜恭喜XD
//原來魔兄喺冇關於旅行嘅label，可以考慮整一個...
刪除加咗喇！
//可以省略"有啲似"
伯母可能誤會咗（笑）
//女士有時會為咗去高級啲特別啲嘅場所（我預計之後應該係會有嘅！XD）會帶多啲靚啲嘅衫呀鞋呀手袋呀
咁佢啲「裝備」又真係幾齊全嘅。
//十二月德國就真喺差到火車飛機停咗好耐
係，愛隊拜仁都有一場賽事被取消。
//呢個要求真喺可圈可點
唔明，點解？
夜深+雖然有D酒醉眼訓，睇到呢個post, 點都要急速留個言先。
回覆刪除//魔術師多月前跟靚姐姐傾閒計，見佢話好想去旅行，於是便馬上打蛇隨棍上，話魔術師年底要清假，可否結伴外遊？沒期望之下竟有極大驚喜，伊人竟然一口答應
位靚姐姐是否多年前提過話好似有D似鐘+欣(?)那位（唔知有冇記錯)，定係第二位？
//各位唔好心邪，魔術師係訂一房兩 Twin 或 Single beds 的
意思係同房？拿，係的話會冇事發生？老老豆豆，我真係唔係好信law。佢肯同房已經表示好多野。
//有啲似見緊女婿咁
//問做邊行每月搵幾多, 可以省略"有啲似"喇!XD
Absolutely 同意！！
//真係「唔試又點知唔得呢」！靚姐姐係我城「商界女神」（笑）
//但實情是，靚姐姐人見人愛車見車載，魔術師有排都未輪到喇！
魔兄做乜咁humble呀？以小弟判斷，魔兄條件極佳，學識及入世智慧勝過我身邊不少教授及「有識之士」，有意思就去馬喇。唔係我要認威認叻，只是想分享經驗，我太太當年是某名女校校花，佢在鄉大時都有唔少追求者，只是當時佢有男友，沒有理會。到佢讀研究院時正遇佢同前男友關係開始有問題，我就把握機會，起初沒有甚麼信心，但經一位老師鼓勵下去馬，結果成功。
//位靚姐姐是否多年前提過話好似有D似鐘+欣(?)
刪除yes, 靚姐姐只得一個。
//一房
//意思係同房？
一房就梗係同房喇！
//佢肯同房已經表示好多野。
//魔兄做乜咁humble呀？
出發前佢已經派定檸檬俾我，其實同房都可以顯示佢對我嘅信任啫。
//我太太當年是某名女校校花，佢在鄉大時都有唔少追求者
咁又點同呢？靚姐姐在商界打滾多年，大把富二、三代、情場聖手埋身，見多識廣，非我呢類天神村出身的可比；而且佢係 outgoing 運動型，同我呢類書生真係唔多夾。
//魔兄條件極佳，學識及入世智慧勝過我身邊不少教授及「有識之士」
呢個係重點。靚姐姐就係在商場見過不少教授乾收銀，學歷要幾多有幾多，present 出嚟頭頭是道，圈錢億億錢，但一去到實戰就沒戲唱，隨時累到「僱主」輸清光。所以只會紙上談兵的人「有識之士」在她眼裡是一文不值的。
同房？ 最後一日，靚姐姐係鬧您禽獸？定係禽獸不如？hahaha...
刪除咁就要睇埋落去嚟緊呢幾篇喇！
刪除恭喜魔兄
回覆刪除見到靚姐姐家人既表現, 就知魔兄係特別既存在啦
係伯母的成日都過想見吓我...
刪除有無拎返把妹達人出泥重溫一次?
刪除可惜唔得閒睇...
刪除小弟五年前都去過澳洲（和老婆新婚渡蜜月），又咁啱十日去晒墨爾本，悉尼和開恩茲。
回覆刪除先講交通，由於有好多亞洲萬里通哩數，所以係單程機票國泰商務客位去墨爾本，再坐Jetstar 去開恩茲，幾日後再坐jetstar去悉尼，最後係坐澳航商務客位回港。
行程方面，墨爾本和悉尼有好多本地一天團可供選擇，例如墨爾本有火車上山，纜車落山的小鎮一天遊，悉尼也有藍山+動物園+小輪一天遊。開恩茲當然係大堡礁+綠島，強烈建議在綠島住一晚，仲有去綠島和大堡礁非常大浪，真係會暈會嘔的。
呢間旅行社 plan 的路線圖偏向廢老 feel，好多嘢都無玩到（包括火車、綠島）。
刪除內陸機我哋坐維珍 Australia，夠哂 hea，遲啲再寫。
我又強貼留名先😁
回覆刪除是否呢位？
https://magicianyang.blogspot.com/2017/12/blog-post_21.html
//（有啲旅行社提供行程係每間酒店住一晚，去10日淨係日日執行李都死得）
小弟係至少唯二港人（不是唯一是因爲同行有一個香港同事）跟過大陸團游台灣，當年四日三夜走晒北中南、一晚一酒店真係想死...
//至於旅遊保險，由於索償難度高，便在維基TV Mall 購入簡單購入一份，聊勝於無：
旅行社包團無送？或topup附加？
//魔術師都特意帶埋泳褲拖鞋，與及一套舊衫去做後備替換，用的着就用，唔用就丟掉
我剛剛是6日5夜，中間轉過一次酒店，under同襪全部帶舊，一換酒店就丟晒
//就係唔記得提及帶「指甲鉗」，百密一疏之下魔術師呢十日就要做住「陳玄風」先喇
其實去之前一日剪定都ok。
// 見家長（？）
// 靚姐姐傾生意就叻
奇怪是呢位靚姐姐應該是行走江湖多年之輩，長輩家人仍然對其私生活咁著緊？
雖然男女有別，但小弟大學畢業後死鬼老豆就無問過我在外邊行蹤，連讀左個master都完全無同佢講過...
//酒店訂等（各位唔好心邪，魔術師係訂一房兩 Twin 或 Single beds 的）
//意思係同房？拿，係的話會冇事發生？老老豆豆，我真係唔係好信law。佢肯同房已經表示好多野
要辯證去睇😉：
機會係100%，或0%，無中間--後者的原因是，「女性是不會與好友造愛的」😜
//是否呢位？
刪除係。但呢兩張係十幾年前影的了，依家正好多。
//一晚一酒店真係想死...
酒店ONS 實在太趕，洗衫都唔得。
//旅行社包團無送？或topup附加？
沒有喎！
//呢位靚姐姐應該是行走江湖多年之輩，長輩家人仍然對其私生活咁著緊？
每個家庭都唔同。佢屋企比較傳統。
//「女性是不會與好友造愛的」
哈哈！1
// 目的地考慮過好幾個，由中歐、南非、古巴...
回覆刪除據悉近年古巴國民生活水準大跌，罪案增多，暫時不去為妙。
// 百密一疏之下魔術師呢十日就要做住「陳玄風」先喇！
笑咗 :D
// 郭靖：澳航商務客位回港
服務是否好過國泰？
// 是否呢位？
原來我以為是江欣燕 :D
// 摩連奴：當年四日三夜走晒北中南
走難團。 :D 我試過巴士團，十四日去十二個地方。
貴賓室，座位同餐飲都係國泰完勝（2018水平）
刪除//走難團。 :D 我試過巴士團
刪除我都係巴士團，車上訓覺時間仲多過在景點。當年駐惠州厰，公司搞旅行經内地旅行社報左兩個團：台灣同馬來西亞，結果得兩個香港員工揀台灣團...
連埋中途招呼午晚兩餐的方式同經常帶你去唔知乜地方購物，港人嚟講小弟完全明白嗰啲土瓜灣團是什麽 🤣
//原來我以為是江欣燕
刪除你的審美眼光有點怪。
//座位同餐飲都係國泰完勝
因航的確係唔錯。
//連埋中途招呼午晚兩餐的方式同經常帶你去唔知乜地方購物，港人嚟講小弟完全明白嗰啲土瓜灣團是什麽
原來當年已經有「逆向鳩嗚」。
// 貴賓室，座位同餐飲都係國泰完勝（2018水平）
刪除疫情前搭過澳航，印象很好，貴賓室內的餐飲可以像餐廳一樣由侍應招呼，不是國泰的飯堂形式。當年覺得國泰服務差了，但近期又有進步。
// 連埋中途招呼午晚兩餐的方式同經常帶你去唔知乜地方購物，港人嚟講小弟完全明白嗰啲土瓜灣團是什麽
天下烏鴉一樣黑，可見一些香港人缺乏同理心。
// 你的審美眼光有點怪。
照片轉鉛筆掃描那幅真的有點似江欣燕嘛。:D :D
//照片轉鉛筆掃描那幅真的有點似江欣燕嘛
刪除我接受唔到囉！
哇！ 二人旅行，見家長。俾哂位魔兄上。過倒呢關考驗，再見多幾次，就得米了。
回覆刪除哈哈，唔抱太大期望呀！
刪除隔住mon都feel到sweet^^
回覆刪除加油也魔兄XD
//就係唔記得提及帶「指甲鉗」，百密一疏之下魔術師呢十日就要做住「陳玄風」先喇！
我旅行都會帶，短trip通常都唔會用到，主要係以防萬一有倒刺XD
z
//隔住mon都feel到sweet^^
刪除哈哈！多謝！可能係我啲文筆好啫！