逆工管思維（二十五）之劣幣驅逐良幣

話說客席主持摩摩在《國產凌凌漆》影評留言謂

撇開政治，呢套野其實好多對白/蹻段好有哲學意味：

• 我以爲我們的關係是建立在感情之上，點知道原來都是一盤生意
• 一張厠紙一條底褲都有佢本身用處
• 太陽能電筒（寓意多此一舉）
• 攞你命三千（寓意只顧多功能的堆砌而無系統性整合）
• 三十年苦練，終於可以派上用場
• 而家搞緊兒女私情，國家大事呢啲濕碎野唔該行埋一邊

魔術師發現呢幾句話都可以用來形容同事光頭Ｍ（見《學師》）。

重溫一下宣稱有２０幾年有關工作經驗的光頭Ｍ係點做 project manager 嘅呢？

１. 唔識落手落腳

光頭Ｍ就算只係管個細 team 都唔知啲 releases 幾時出、document 甩甩漏漏、project progress 十問九唔知、電車仔叫佢幫手做少少 admin 嘢，佢就叫返電車仔「自己功夫自已做」；相反魔術師「做爛咗個市」，自己管理個大 team 嗰 part 的 release schedule、release scope 全部寫得清清楚楚，其他部門的同事都可以一目暸然知道情況，結果其他同事就成日質住光頭Ｍ來問，光頭Ｍ的ＥＱ又唔太高，份份電郵駁嘴駁舌，睇到身處海外的本部門看守領隊Ｏ哂嘴。

２. 射波

光頭Ｍ基本上「自己工作自己做」 — 只係做最 minimum 嗰 part，一啲有用可提高效率但非必要的配套工作就一概唔做（例如簡簡單單寫幾句 code 幫手 automate 工作）；灰色地帶可以係佢做又可以係其他人做的就一定唔會做；唔講到明的亦一概唔做，即係踼一腳郁一郁，毫無主動性。最新情況就係要身處海外的本部門看守領隊開住 online team 指住光頭Ｍ逐個部門網頁去 update 返啲文件和工作進度。四十幾歲人仲要好似２０幾歲的巨嬰咁要上司指導，講一樣做一樣，真係多啲羞恥心都做唔住。

３. 極低的 attention to details

可能係魔術師的  attention to details 太高，同光頭Ｍ一齊開會，魔術師講完 release plan 可以同佢點配合之後，佢可以當無聽過，在發夢狀態中亂吹話「等魔術師出完 release 之後我就會做㗎喇，佢遲我咪 delay 囉！」可怒也，魔術師剛才就係講緊點樣提早完成好讓光頭Ｍ可以早啲開工做，唔使 delay，點知魔術師話口未完佢當無聽過自行諗點樣可以 delay，果然夠哂「保護自己」。

＊＊＊

至於點解《國產凌凌漆》的金句令魔術師想起光頭Ｍ呢？

「三十年苦練，終於可以派上用場」

從光頭Ｍ的口頭禪「要保護自己」就可以知道，佢一切的 behavioural traits 都係遵照呢個軌跡而行：唔主動做啲無人叫你做嘅嘢，自然就唔會出錯，又唔會俾人話「都無人叫你做，做嚟做乜？」，踢一腳郁一郁就係最能保障自己的方法（責任要發號司令的人負）。呢個可能就係光頭Ｍ的超過２０年工作經驗學到嘅嘢。

「一張厠紙一條底褲都有佢本身用處」

至於點解魔術師咁睇重光頭Ｍ的表現，就係由於當初係前黃色上司見魔術師一人睇大細兩條 teams 工作量太大，所以就請光頭Ｍ返嚟分擔魔術師的工作：分擔的確是有的，例如佢可以幫魔術師開吓啲例會，但要好似魔術師主動咁幫手做嘢下決定就一定無。就算係手板眼見的工作例如「每個星期三將 system 的 report 下載回來再上載到網頁」咁簡單的工作，魔術師都唔敢叫佢做：怕佢「保護自己」起上嚟，話「魔術師無每個星期都提佢做，佢自然就會『唔記得』做。」

所以所謂要光頭Ｍ「分擔魔術師的工作」係唔合格，魔術師反而更擔心佢做唔好工作，又管理唔到條 team，仲要日日睇住佢做乜（明顯佢一日有效上班時間應少於兩小時，嚴格來說公司請個 part time 就得）。

「太陽能電筒（寓意多此一舉）」同「攞你命三千（寓意只顧多功能的堆砌而無系統性整合）」

最令魔術師「爆起來」的就是光頭Ｍ發明了一條「工作表現考核」方程式去討論各電車仔組員的工作表現，就係：程式難度＋緊急程度＋其他因素＝分數。魔術師一睇，程式難度、緊急程度、其他因素都唔係 on the same scale 嘅，就等於 １ｍeter＋１ｋｇ，又點可能加得埋呢？

「我們的關係只是一盤生意，而唔係建立在感情之上」

結果魔術師都係頂佢唔順，搵工轉會。可能真係因為移民潮的關係，「一出嚟就有人請（做返以前妹頭、包青天上司舊公司的同業），人工仲哈哈哈」添！

就當魔術師話俾看守領隊同人治部經理聽魔術師要走的時候，兩人大驚，猛咁想留魔術師；但魔術師當然不為所動，佢地覺得光頭Ｍ係合格員工的話，咁魔術師就好難繼續對住個一日扮工６粒鐘的員工，唯有留返啲機會俾佢表演了。

（註：光頭Ｍ都有少少 cam cam 地（有啲似前前黃Ｃ上司Ｍ），成日要掂吓魔術師扮 friend，魔術師當然唔會俾面。「而家搞緊兒女私情，國家大事呢啲濕碎野唔該行埋一邊」搵唔到適合比喻，從略。）

＊＊＊

伸延閱讀：

學師

摩摩電影節之《國產凌凌漆（From Beijing with Love）》：注重形象好重要

有個上司是黃Ｃ