一人飯局(2023年5月）

魔術師慣常一人食飯，好多時都有既定食店和既定菜單（一言蔽之曰「定食」），所以好多時啲食店店員都會認得魔術師，好多時人未坐定店員已經知道魔術師要叫乜。

1. Delifrance Bistro

多年前屯門市中心錦華商場（現稱錦薈坊）係魔術師飯堂之一，在現時3樓珠寶店的位置，就曾有魔術師最愛的炸雞店哈迪斯，哈迪斯結業之後就開咗 Delifrance Bistro，佢嘅醬燒豬肋骨套餐亦曾是魔術師至愛。Delifrance Bistro 結業後（當時個經理仲送咗一套碗碟餐具俾魔術師，依家仲用緊）曾在以前威龍機鋪舊址（即現時滷味店）開業一段短時間，但由於沒有 Bistro 店 menu，晚餐唔太啱食，魔術師便沒有再幫襯。點知過了幾年 Delifrance Bistro 又重返屯門，都係在錦薈坊開業，不過店址就變咗喺以前蘇寧個位。

(圖片來源：Openrice > 餐廳 > 香港 > 屯門 > Délifrance Bistro, captured on 12 May 2023)

剛開張時新 Delifrance Bistro 只係做到下午六時，直至個多月前才開夜市，魔術師當然趁機幫襯。入到去坐定，見 menu 竟然有醬燒豬肋骨！

但睇真啲要300幾蚊咁貴原來係二人套餐，一人套餐啱食的就只有法式香草檸檬烤雞。於是便叫咗一客，先上餐包和餐湯：

雖然係晚餐，但餐包有烘熱脆卜卜，餐湯亦係以前的味道，唯一就係無抹碗邊就端上來，稍微要扣分。

半隻雞份量夠魔術師食，賣相唔錯，烤得亦剛剛好唔會太乾。美中不足的是餐茶竟然是跟餐包餐湯同上，食完主食隻雞最後才享用餐飲，熱飲已變凍飲。縱有小瑕疵，但環境舒適，價錢親民，算係「食得落肚」的平民西餐選擇。

魔術師餐單：法式香草檸檬烤雞套餐熱檸茶（$120），加雜菜湯、餐包（$15）連加一＝$148

2. 想餃就餃

早前在《年尾晚餐推介》一文中提及過三巡海南雞係 food court 界中比較突出的坡式海南雞飯。但好景不常，魔術師去開的旺角新世紀廣場(Moko) food court 於4月尾結業，變成又無咗一個「飯堂」。其實魔術師本來有兩個「三巡飯堂」，除了旺角 Moko 之外仲有奧海城 food court 都「曾」有分店，係魔術師發現奧海城三巡執咗之後才被逼「聚焦」到旺角，點知依家旺角三巡又無埋，真係慘絕人寰。

記得當日去到奧海 food court，搵唔到三巡卻在相同位置見到呢間餃子專門店，反正一場嚟到便食個餃子餐：

(圖片來源：Openrice > 餐廳 > 香港 > 大角咀 > 想餃就餃 > 外賣紙/餐牌, captured on 12 May 2023)

新X坑試食就少少地叫六隻黑松露鮮肉餃，可湯可煎，魔術師就叫咗煎；個餐附例湯，但就無得加錢轉燉湯（亦即係話燉湯一定要散叫，認真奇怪）：

醋、辣醬、菜脯都係大路嘢，無話特別好或者特別差。個煎餃係有浸「淡淡的」黑松露味，但將貨就價都無乜想點。平平地都啱內地廉價團用餐的（見伸延閱讀）！

魔術師餐單：黑松露鮮肉餃（煎），跟例湯，$48。

3. 燒肉 Like

魔術師在去奧海城 food court 途中說見到到呢間平價烤肉店開正係 food court 隔離。由於燒肉嚟講魔術師平時只係食開牛角，好奇心起日前便又去試吓。

(圖片來源：Openrice > 餐廳 > 香港 >  大角咀  燒肉LIKE (奧海城) , captured on 12 May 2023)

餐廳雖然唔係放題，但就好似放題咁限食60分鐘，不過魔術師一人晚餐又唔會賴死係度 hea，60分鐘真係夠有突。餐廳亦係極度鼓勵顧客用手機落單，落完單後自動跳轉到電子支付，除咗支付佬、微信囡之外仲可以用 Apple Pay，職員落單只係聊備一格（如果用支付佬、微信囡的消費劵俾錢說強制要人手落單），認真係廢老不友善的落單系統（但亦唔會收加一）。

此店食品種類唔多，就係 menu 上的套餐及散叫，有唔同份量可選。比較令魔術師喜出望外的事白飯都有大中細份，啱哂魔術師呢類食餸唔食飯嘅廢中（下圖是網上截圖，隻手當然不是魔術師的）：

(圖片來源：Openrice > 餐廳 > 香港 >  大角咀 > 燒肉LIKE (奧海城)  > 外賣紙/餐牌, captured on 12 May 2023)

魔術師叫咗 set 壽喜燒牛小排加牛五花套餐（200g，應該係指牛小排和五花腩各100g？）、一份牛舌（4片）、同埋80g 細白飯（少飯照計正價）；壽起燒餐另附生雞蛋乙隻：

枱上有各式日韓醬油及鹽同黑胡椒，不過就唔係扭扭磨而係撳撳吓。醬油樽係同隔離位share，所有有疫情潔癖的就會比教避忌了：

魔術師餐單：壽喜燒牛小排&牛五花套餐（200g）($135) + 牛舌（$15）＋ Coke zeor($10) = $160

少少地食完都 okay 嘅，性價比都算高。查吓 Openrice，原來屯門 V City 都有分店，魔術師又有新飯堂可以回頭了！

(圖片來源：Openrice > 餐廳 > 香港 > 屯門 > 燒肉LIKE (V City), captured on 12 May 2023)

＊＊＊

伸延閱讀：

年尾晚餐推介

團餐名單｜據悉四美食廣場劃區接待旅行團　最平約40元　另有16間港九食肆 2023年04月25日

【有線新聞】據了解，旅監局向旅行社發放願意接待旅行團的餐廳名單，包括四個商場的美食廣場。餐費最低每位約40元、最貴240元，名單還包括16間酒樓及茶餐廳等，超過一半在土瓜灣和紅磡。

大角咀這個商場的美食廣場有12間食店，涵蓋中、日、韓、東南亞菜式，午飯時間幾乎每張枱都有人。同一集團在油塘的美食廣場，中午空位就較多。據了解，集團旗下四個美食廣場向旅監局表達願意接待旅行團，午餐每位約40至75元，豪爽一點可以吃鐵板燒、每位240元。消息指，旅行社要打電話預約，屆時美食廣場會劃出一個範圍，只接待旅客。

除了四個美食廣場，據了解，旅監局近日向旅行社發放的餐廳參考名單還有九龍區多間酒樓，有9間位於土瓜灣及紅磡，每位餐費60至120元，而專門接待內地團的嘉樂軒及富源酒樓不在名單上。尖沙咀、九龍灣也有酒樓願意接待旅行團，餐費貴少許，每位最少收80元。榜上有名的還有洋紫荊維港遊，以及位於半山這間茶餐廳，約有40個座位，希望每日最少接待200名旅客。茶餐廳負責人朱小姐：「試試乾炒牛河、星州炒米等菜式，不用如新聞報道般那麼可憐，要在公廁外吃飯、吃兩餸飯，站在街邊吃那麼可憐。」

負責人說除了午市，早上9至11時及下午茶時段都較淡靜，會安排旅客和本地客人分開不同時間來用餐：「根本不能復常，飲食業來說仍是很水深火熱，希望開拓多些客源。如果人數多，就算價錢是40至55元都可做得到。」她希望可以長期接待旅行團，暫時未有旅行社接洽她們。