年尾晚餐推介

 以往魔術師都會趁冬至公司有得早放，便可以預到時間去沙田的堂家姐處黐餐兼聚一聚，畢竟魔術師的親戚朋友本來就唔多也。之但係疫情來襲三年，大堂家姐教小學的，自然怕羊攬煲怕得要死，社交距離層層加碼再加碼，由第一波開始已經叫魔術師唔好來聚又唔好拜年，叫得幾次魔術師都無謂再問，最多都係等過年去唔去佢度坐吓。

無論點都好，晚飯始終要食，不過又做冬又聖誕又除夕，好多工資奴都趁機放假，單人搵食點都係難啲。魔術師的心得就係儘量食夜啲，能夠掌推握到時間食最後一轉就最好。更何況疫情幾年以來，好多食店都早收咗，要「食最後一轉」都唔使等太夜也。

1.旺角女人街 三一餃子

魔術師一向都有放工後去旺角行吓的習慣。上個月較早前便在女人街見到呢間餃子店，見 Openrice 話中環總店人氣甚高，魔術師好奇心起便哄埋去睇吓：

只見門口招紙的文氣甚為「跳脫」，極似有青手筆，似乎都係黃店一間：

魔術師叫了一客芫茜豬肉餃、絲網春卷同埋可樂一罐，盛惠＄85。起筷吃了幾口，春卷較為美味，餃子唔太熱只係一般，雖未至於好難食但要回頭再幫襯卻又不是傻先選擇。唔知中環店的質素如何，抑或又只係首觸們營造出來的幻象：

2. 屯門市廣場 Food Maze 梨泰園

疫情來襲好多商鋪都做唔住，為了吸引人流，食食食就幾乎係必勝方程式。作為收租霸的信和（00083.HK）年前便將屯市二樓大裝修，引入大量「藍店」（真係「搵食艱難」，正字上腦的有青會否短命啲？）

呢間係以數月前泡菜國有青人踩人蒲點命名的食店藍唔藍魔術師就無研究，不過有一樣嘢卻吸了魔術師的睛：

雖然魔術師對泡菜國食物無乜喜好，但人參雞湯套餐實在係吸引，而且「價格相宜」都係一舊水左右，便叫了一客來試試：

等了十多分鐘（應該係在廚房加熱），便有得食了。魔術師本來就唔係好食飯，於是叫了少飯，仲叫多罐 Coke Zero，盛惠＄103；老闆可能見湯賣唔哂便送多個湯俾魔術師。個餐嚟到都非常熱，而且雞肉鬆軟唔霉易入口，估唔到臨收工都仲叫有相當水準，food court 來說真係唔差

3. 旺角 Moko Food Opera 三巡海南雞

唔好以為 food court 只有頹飯，呢檔在旺角新世紀廣場的海南雞專門店都算係唔錯的選擇，最緊要有三色醬（辣醬、薑蓉、黑豉油）、雞湯、同青瓜，成個 set 十分「正宗」李加坡海南雞飯。魔術師今次叫的是燒雞，要雞髀，盛惠＄62，性價比最高係佢。