壓力式熨斗

時間回到農曆過年前一個星期。魔術師慣常都係星期六晚邊睇波邊（在廳）燙衫（魔術師傾向度身訂做西裝，但恤衫呢啲易損耗嘅嘢，買成衣就算，起碼 Brooks Brothers 真係幾好着），點知燙燙吓忽然電視熄了、音響熄了、Now TV Box 熄了...雖然廳房仲係燈光火着，魔術師都心知不妙。走去 check 吓電箱，果然是跳了掣。

魔術師硬着頭皮將跳了的電箱掣啪回原位，謝天謝地沒有即時再跳，而電視、音響等亦恢復正常...魔術師繼續熨衫，卻發現手中的熨斗機身發熱，但就傳唔到去底板，完全熨唔到衫了。

似乎跳掣的元凶就係熨斗，應該係蒸汽水箱論漏電搞到跳掣，share 同一條（牆內）電線的電器熄哂機，而熨斗就攬炒燒埋自己。

魔術師先上友和（02347.HK）搜尋「熨斗」，發現有平有貴，最貴嘅幾千蚊都有，叫做「壓力式(Steam boost/pressure)熨斗」，究竟係乜東東？

（圖片來源：友和 > Search keyword 熨斗, captured on 12 Mar 2024）

一於問吓 ChatGPT：

說穿了「壓力式熨斗」就係噴出「高壓」蒸氣把衣服的摺痕熨平（蒸氣用得多，唔怪之得個水箱要分開擺，但應該就少咗漏電的風險）。雖然以魔術師一向熨衫的習慣，用「高壓」蒸氣的機會不多，但本住有好嘢梗係買貴的精神，點都會買部「壓力式」嚟玩吓。

由於當時年近歲晚，網購落單有排都送唔到，唯有移一移玉步到屯門市中心各大電器實體鋪睇吓有乜型號賣。估唔到無論係法老會、凶宅、鬚零、以至 Shitty Store、Leon，大多數的熨斗品牌唔係 Tefal 就係「非常離譜」...Tefal 就係依家魔術師燒咗的熨斗品牌，係平嘅，但質素似乎差啲；「非常離譜」呢，多年前壞咗的入門家庭影院組合修理經驗（舊 blog 有寫）令魔術師 blacklist 咗呢個品牌，但在揀無可揀的情況下，都唯有「解凍」試吓呢隻嘢好唔好用：

（圖片來源：Philips PerfectCare 6000系列 壓力式蒸氣熨斗 PSG6064/86 官方網頁, captured on 12 Mar 2024）

最後在屯市兜咗個圈，發現 Leon 最平，平過其他鋪頭兩百大元，咁就扑咁鎚將部機帶返屋企了。

（魔術師屋企玄關位有個不合風水法度的條子「屏風」XD）

用咗幾個星期，感覺相當良好。雖然用蒸氣的機會真係唔多，但「免調校溫控技術」已經好方便，燙牛仔褲同燙恤衫一樣都係一嘢車埋去就得，唔使較來較去。不過，呢部嘢唯上的缺點就係個水箱倒咗水出嚟好難乾呀！

＊＊＊

伸延閱讀：

智能燈泡試當真