再上次轉工造咗套新西裝（見《再三消費，帶動經濟》），話咁快就過咗幾年，期間疫情肆虐，要保持社交距離，所以轉依家呢份工時（都係2022年下半年的事）都無 shopping 過...加上就算復常之後，好多鋪頭都一早關門，搞到魔術師放咗工去逛吓都幾唔方便。結果拖吓拖吓，到去年年尾比較凍，要着件厚啲嘅冷衫返工，即時就覺得兩年前造嘅西裝幾窄吓...魔術師唔係中年發福，而係件西裝造得太貼身啫！
於是去完旅行返嚟，便試吓新嘢搵呢間早前在邪惡FB見過廣告的裁縫店：
The Lancelot Brand Video - Final 4K.mp4 from The Lancelot on Vimeo.
要去呢間栽縫店度身造衫要先在其網站 book 時間，輸入資料後就會有人用 Whatsapp 同魔術師確認時間，約實時間上樓。呢間店位於中環商廈，相當易搵：
撳鐘仔叫門，應門的是位靚仔（唔係𡃁仔），入到去見到仲有位巷妹助手添（似是時裝系的學生）。寒喧一輪後，靚仔應該就係間鋪嘅老闆（二人公司？只係唔知佢是否另有裁縫造衫），因為佢去旅行時公司係會關門的：
事不宜遲，靚仔先給魔術師選定西裝樣式，然後就拎各種布料俾魔術師揀，點知魔術師一早就有指定品牌：「我着開 Zegna 的，依家呢件都係。」
既然有指定品牌，咁就易辦事。靚仔馬上拎咗幾本 Ermenegildo Zegna 的布料樣辦俾魔術師揀，並介紹一下不同質料和價錢（魔術師指明要造一衫兩褲）；魔術師亦沒有選擇困難症，摸吓睇吓，中間較高級別的 15 Milmil 15 系列反而唔鍾意，揀咗最右手邊的 Trofeo 全羊毛面料：
|
| （手由靚仔提供） |
點知巷妹打去訂貨，布商竟然話售罄，果然英雄所見略同，靚嘢就係多人揀。於是魔術師就選咗上圖左手邊 95%羊毛 5% 茄士咩的面料
|
| （手由靚仔提供） |
今次靚仔親自出馬打去確認有貨，然後再揀鈕扣。魔術師就揀咗 set 較工業風的
|
| （手由靚仔提供） |
揀好「面子」之後就要選襯裡子（《一代宗師》），魔術師亦好快完成。
靚仔：「咁你會唔會試吓我哋公司嘅 AI 3D Scanning 度身？」
有新奇嘢玩魔術師當然唔拘，過程就係要在試身室進行，要魔術師除淨內衣褲俾靚仔部平板 scan 身形。
香港故事 - 世紀物語 (第51輯)：度身訂造 from The Lancelot on Vimeo.
原來靚仔之前都係電車仔來的。
玩完 3D Scanning，靚仔就幫魔術師用傳統方式度身（點解唔係巷妹幫魔術師度？），拍照做紀錄，再問明魔術師喜歡的細節位（當然有啲位魔術師都唔識或者無所謂，就任由靚仔提議吧），之類之類就按下不表。臨走前當然要俾錢先喇（先估吓幾多？）！
由於魔術師唔係趕住要用，就等靚仔慢工出細貨。一個月後（即過農曆新年前）才試身；試完身又一個月才攞衫。
到本來約妹攞衫的日子，靚仔忽然打嚟叫停魔術師唔好過去佢公司住，話件衫仲有少許要修整，要再等多一星期。
可能係發覺咗有 bug 要要執修喇！都好嘅，出貨前再驗一次，有 attention to details 吖嘛！
前幾日去西裝店試着，感覺良好：
終於勝利完成，將件新西裝帶回家了！
 |
| （個西裝袋都別出心裁，側邊有拉鍊，拉埋有似個公事包咁。） |
謎底揭曉，一衫兩褲盛惠三萬三！
＊＊＊
伸延閱讀：
【青黃不接】洋服入行門檻高 港青研發AI系統將科技融入洋服行業（經濟日報 2021/07/20）
Oh, you are a big spender!
回覆刪除Have you seen "Outfit" on Netflix? Sort of a "battle of wits" kind of movie. The protagonist is a meticulous cutter (he preferred to call himself this in the film), formerly an apprentice in The Row, London. There are scenes of how to cut and make suits.
Old BJ
//you are a big spender!
刪除串啲講：財務自由除了會計/數學上的定義，態度上就係可以維持自己的生活質素，不強求亦不用做苦行僧特別慳檢。
所以我唔明以林作身家，幾萬蚊造套西裝有幾咁威。唔通佢一日做一套？呃霉妹仔咩？
貼地啲講：西裝唔會成日做，一套靚西裝其實可以着好耐，着得舒適人又開心，性價比係返度。
//Have you seen "Outfit" on Netflix?
入咗我的片單，未睇。
比我預期貴三倍，咁重羊毛料，係唔係只適合冬天着？
回覆刪除用得 Zegna 料就唔使旨意1萬蚊落樓，其他品牌布料就可能得。
刪除是四季款式來的。
嗰折扣喺因為新年原因定喺第一次幫襯？一直都想喺香港做（唔知點解每次理性消費我都有興趣XD），因為點都喺平過敦倫尤其喺Savile Row，而且見過亞洲KOL做完覺得有啲怪怪地...如果香港只喺得兩三個禮拜唔知做唔做得切。
回覆刪除／／手由靚仔提供
哈哈我正想問呢手幾乾淨型唔錯，樣應該唔會太weh
／／過程就係要在試身室進行，要魔術師除淨內衣褲俾靚仔部平板 scan 身形。
／／點解唔係巷妹幫魔術師度？
呢嗰scan巷妹做就真喺唔喺咁好啦XD亦都提醒咗如果去做內衣褲都唔好太樣衰...
／／一套靚西裝其實可以着好耐，着得舒適人又開心，性價比係返度
返工每日都要，如果身材有（小）變又可以去改下，點計都喺抵。林作假假地都曾經喺劣C，呢啲行頭應該喺基本嘢點解佢會咁諗
//唔知點解每次理性消費我都有興趣XD
刪除好嘢梗係要開心 share！
//嗰折扣喺因為新年原因定喺第一次幫襯？
應該係首次幫襯的折扣。另可電郵我 undefeatablemagician@gmail，等我介紹你俾靚仔，應該仲有折頭。
//如果香港只喺得兩三個禮拜唔知做唔做得切。
可以同靚仔傾下。
//呢嗰scan巷妹做就真喺唔喺咁好啦XD亦都提醒咗如果去做內衣褲都唔好太樣衰...
是在更衣室內自己一人搞掂，個平板會同你講要企好點樣姿勢來量度的。