又見新一袋醫護人員

事緣魔術師兩三個星期前已開始覺得自己有啲唔妥，最先係同同事傾電話時忽然之間無咗聲，係唔夠氣一口氣講晒全句，繼而開始氣力不繼。初頭以為為冷親傷風，睇過兩個唔同的私家醫生食傷風咳、氣管藥都無進展，後來發現自己行路氣促，唔夠氣，徵狀跟老媽子心臟衰竭相似（老媽子都捱咗廿年才去世），不能諱疾忌醫之下，馬上便去屯門醫院急症室求醫。

雖然話魔術師仲可以自行搭的士去急症室，但都無話「備受歧視」排隊輪在「白車送入來的病患」之後...實情上當時急症室唔多人，魔術師被分流為第三等級，唔使等太耐就見到醫生。

急症室醫生聽完魔術師自述病情，便先行安排魔術師照X光照肺，並要有心理準備入院。其實魔術師一早就預咗會入院，基本必需品都帶定，係重嘅嘢唔方便帶唯有事後叫舅父幫忙了。

等照X光是比較花時間，畢竟係同病房病人一條隊。魔術師換了單薄的「X光衫」之後乾等真係覺得凍，問個負責叫名的「阿姐」有無保暖衣物，「阿姐」手指指：「嗰便有被...」

魔術師放眼望去，一架「Walmart(山娒？)貨架式大車」上果然有被有毯，看來是人手不夠，叫病人自助吧。

魔術師攬住張被等咗一陣，終於都輪到去照 X 光，照完馬上換好衫，便出返去急症室等。

等了不久，果然便被叫名準備入院。

入到病房被安排訓冷巷（公立醫院係咁），但亦反證魔術師並不是太嚴重，起碼屬於可以自行落床行得走得嗰類：

1. 初頭量度血壓，去到150/100，搞到要每小時度血壓一次，而負責量血壓的都是後生仔學護 - 目測似乎有「過多」後生仔學護，只見多名有青各自推住血壓計「巡房」，有事沒事也不管病人是在吃飯或是在做甚麼都叫人量血壓之類（食緊飯量血壓準唔準㗎？）。

2.「後生仔學護」最需要改善的就是同理心，除上述話唔理你做緊乜都要你去量血壓之外，最離譜有次就是當魔術師啱啱食緊個橙時嗆了喉嚨，有青學護卻走來叫魔術師去磅重...頂，佢見唔到魔術師咳到不可開交的嗎？透順條條先去磅重都得掛？有青學護似乎只係掛住要完成自己的「功課」，而忽略了病人的需要吧。

3. 由於入院初期魔術師心跳都快，去到110幾，醫生便叫魔術師在胸口貼住啲「電極」mon 住心跳 - 而貼電極這個「低難度工作」竟然是由「醫務助理」的阿姐搞定，反而唔係由「有青學護」搞，認真奇怪。

4. 同樣地，魔術師抽了幾次血去化驗，除了由正規護士做之外，「阿姐」竟然都有份幫魔術師抽血，係「有青學護」免戰，都幾奇怪。

5. 醫管局都請咗幾多外判工幫手推病床、輪椅，而呢啲負責「醫院服務」的外判公司都請埋唔少上咗年紀嘅長者（搭$2車返工）。昨天就竟然由一名白髮婆婆負責推魔術師坐輪椅去照 X 光，搞到魔術師非常唔好意思，幾乎想自己行到去添！

最後，四位舅父舅母都有幫魔術師打點，很多謝佢哋。靚姐姐同伯母仲煲埋湯嚟飲，感激。現在血壓已回落至正常，在等安排照心臟超聲波，看情況才如何治療。

＊＊＊

伸延閱讀：

新一袋醫護人員