逆工管思維（二十九）之跟古天樂抬槓

這天靚姐姐 call 晚飯，魔術師放工後做到中環會合。靚姐姐話食完之後要返公司繼續工作，於是便帶魔術師去食碗快麵，話「都幾好食」。靚姐姐識飲識食魔術師一向唔懷疑，樂得由佢話事來個二人麵局：

（圖片來源：Openrice > 餐廳 > 香港 > 中環 > 九頭鳥米線, captured on 2 May 2025）

去到小店，其時已是約 8:20pm。一入門口，店家個阿姐甲就已經表示話 8:45pm 關門。

靚姐姐：「得得得，好快食完。」

於是魔術師便和靚姐姐極速點了菜，店家也極速上了菜。

阿姐甲亦極速把「單據」放在我們枱面。

魔術師知道意思，便拿單據出櫃面付款，好讓阿姐甲快速埋數。

付完款後魔術師返位，跟靚姐姐方食邊傾，都唔係掛住吹水碌手機磨時間嗰隻。

但就食得一陣，阿姐甲就再嚟提示：「我哋收 8 點 45 分。」

靚姐姐遭打斷思路，有點不高與，看一看錶：「我知道喇！況且現在只是 8 點 32 分。」

點知，再過一陣子，便開始有阿姐乙、阿姐丙、廚房佬丁在我們面前「挹挹揚揚」，很有點「趕客」的意味。

阿姐甲更不斷提示「8 點 45 分」。

其實接近 8 點 45 分，魔術師同靚姐姐已完成 8 至 9 成，都算食得快。

點知，魔術師喝了一口凍檸茶，剛放低個杯，阿姐乙便伸手來收。

「未飲完！」魔術師連忙喝止。

「咁我哋寫明係收  8 點 45 分 㗎嘛！」阿姐甲仲駁嘴。

「本來我都話以後可以再來幫襯，咁嘅態度，都係無下次。」真係士可忍孰不可忍，魔術師不嬲都係「好客」，從來唔會給店家添煩添亂，只會好好配合；同時也希望店家能提供優質服務，若只是遲了幾分鍾，店家讓客人飲埋杯嘢先，又有乜相干呢？

靚姐姐就話：「佢哋只係打份工，會唔會得失客人，根本同佢哋無關。佢哋關心嘅只係唔好阻到佢哋收工，返屋企湊仔、睇電視。」

魔術師咕噥道：「咁香港地大部分人都係打工，個個趕收工，古天樂同宣萱拍個廣告（見《瞬間睇廣告（十六）》都係嘥氣！」

我們食完就走，臨出門口靚姐姐仲拋走一句：「所以呢種人永遠都係做茶餐廳，一世無進步。」

魔術師笑言：「係囉，抵佢哋一世做窮撚。」

行咗一陣，魔術師想深一層，咁又係，伙記趕客，公司少咗生意，公司做唔住，受影響嘅始終係自己；但以呢種人嘅目光，都唔會諗到咁長遠，茶餐廳東家唔打打西家。

但魔術師依然正氣撚上身：「咁做得老闆，一定要 train 啲員工，唔好同你倒米至得㗎！」

誰知靚姐姐一句就駁倒魔術師：「你知唔知依家請個正常人係幾咁難？我見啲後生真係無個似樣，點教得識佢哋做嘢！」

然則傷民都北上消費，話深圳河以北食買玩乜都有，服務態度又好，唔似喺傷巷貼錢買難受。咁即係話，「大陸人」比傷民更「正常」，更易受訓，更加唔係「恃住自己只係打份工就大哂」？

魔術師兀自不服氣：「既然員工咁難教，老闆就應該坐係鋪面監住班食塞米做嘢。又唔見呢間食店咁做喎！」魔術師後來才知道呢間店都叫「小型連鎖式」，有幾間分店，老闆不在場（靠「店長」打理）唔出奇。

靚姐姐感同身受：「做老闆，要理幾多嘢先得㗎？咁得閒對住班𡃁咩？」

咁又係，古語有云：搵食啫，犯法呀？人人都要「搵食」，邊有時間顧住其他人？

＊＊＊

伸延閱讀：

瞬間睇廣告（十六）