睇咗
1. Disney+：《潔西卡瓊斯（Marvel's Jessica Jones)》第一季
唔知點解尾帝紐約市咁多超能人，之前復仇者第一集眾英雄同洛基的外星人大軍打餐死又唔見 Jessica Jones 同夜魔俠出場幫拖。言歸正傳，Jessica Jones 今次對付的壞人是有 mind control 能力的渣男，能力來自小時候被虐待。渣男的超能力就係只要講句話，就可以控制被害者聽聽話話唯命是從，拍攝相當容易，完全唔需要特技效果都拍得到。Jessica Jones 的起能力就係特別大力，能力起源有待揭曉。
魔術師評分：70分（100分滿分）
2. Prime Video：：《無限之住人（Immortal)》
魔術師沒看過原著漫畫，只看過 Netflix《無限之住人》真人版（見《嚴選影音產品（八）之 Netflix 中字與 4K Blu-ray》），無法評論動畫版跟原著有何差別，但論 2D 水墨風 加 3D 背景，畫功細膩，真是沒話說。全片缺點是節奏過快，情節跳躍，而且某些角色面容辨識度不高，導致唔知發生什麼事，有些武林高手突然出現，之前也沒交代過，不熟原著者可能難以跟從。
魔術師評分：75分（100分滿分）
3. Netflix :《暗夜情報員（The Night Agent)》第二季
劇情較第一季兒戲得多，壞人角色年青時代跟成年時代樣貌相差太遠，角色背景亦交代得唔清唔楚，表面似賣關子，實際似係寫唔到落去，落雨收柴。尤其是最後一段闖聯合國總部，保安竟然比我城一般企業更兒戲，實在令人出戲。整體表現較第一季差（除了「伊朗妹」幾靚），但竟然仲有第三季（劇情安排戲中的「侵侵」當選總統，似乎要諷刺呢位「荷里活公敵」），實在無言。
魔術師評分：60分（100分滿分）
＊＊＊
將睇未睇：
1. Netflix:《狂賭之淵（Bet）》
《狂賭之淵》日本真人版第一、二季（濱邊美波主演）魔術師俾到95咁高分，動畫版在 Netflix 都有播，但今次無聲無息竟然有尾帝 DEI 版上畫，除咗主角係「鄉下妹」之外，全部角色變晒種族共融，搞到魔術師預咗佢爛都心痕痕想睇吓佢有幾爛：
2.《潔西卡瓊斯（Marvel's Jessica Jones)》第二至三季
魔術師唔睇都睇咗夜魔俠三季（果然第三季太跳躍，有啲唔連戲睇唔明），於是睇《夜魔俠：重生》前，點都要補返功課：
|
| （圖片來源：Daredevil & The Defenders Complete Timeline: What Order To Watch, captured on 1 Apr 2025） |
3. 《盧克·凱奇（Marvel's Luke Cage）》第一至二季
同《潔西卡瓊斯》 一樣，睇《夜魔俠：重生》前要睇 Marvel 版《夜魔俠》第三季；睇 Marvel 版《夜魔俠》第三季前就要先做以下功課：
4. 《鐵拳俠（Marvel's Iron Fist）》第一至二季
同《盧克·凱奇》一樣，睇《夜魔俠：重生》前要睇 Marvel 版《夜魔俠》第三季；睇 Marvel 版《夜魔俠》第三季前就要先做以下功課：
5. 《捍衛者聯盟（Marvel's The Defenders）》
同《鐵拳俠》一樣，睇《夜魔俠：重生》前要睇 Marvel 版《夜魔俠》第三季；睇 Marvel 版《夜魔俠》第三季前就要先做以下功課：
6. 《制裁者（Marvel's The Defenders）》第一至二季
同《捍衛者聯盟》一樣，睇《夜魔俠：重生》前要睇 Marvel 版《夜魔俠》第三季；睇 Marvel 版《夜魔俠》第三季前就要先做以下功課：
7. Disney+：《夜魔俠：重生（Daredevil: Born Again）》
終於令魔術師於 Disney+ 睇返 Netflix 版 Marvel「社區英雄」系列的催化劑。金霸王（唔係電池）等人出返嚟，奸都奸得特別有魅力。
7. Max:《神探智擒職業殺手（The Day of the Jackal）》
跟多年前的經典電影同名，不過神探就 DEI 化變成黑人女 Popo。咁鬼煩膠魔術師就好想睇吓「神探」會否被殺手處決。
9. Apple TV+：《君主組織與神秘巨獸（Monarch: Legacy of Monsters）》
又係呢類見《XX宇宙》收得便無限伸延加油添醋的衍生劇。其實橋唔怕舊最緊要受，只要識見好就收，唔好愈寫愈過火同主線故事有犯駁就得。
10. Netflix：《W - 兩個世界（W）》
唔使講，都係睇妄民稱「顏值最顛峰時期」的韓孝周(同《Moving 超異能族》個樣都幾唔同，魔術師睇預告就覺得 Moving 時的韓孝周仲靚啲)。
11. Netflix：《諸神末日（Twilight of the Gods）》
估唔到 Zack Snyder 連動畫都玩埋，將玩到爛的題材「開新篇」，即管又睇吓好唔好睇。
12. Disney＋：《天龍八部》
CCTVB 搞咗兩對「中年好聲音」出嚟唱主題曲，又可以湊吓熱鬧睇吓完全無刪剪版係點嘅一回事。
其他：《黑鏡（Black Mirror）》：因單元故事，表現飄忽，魔術師暫不評分。
仲有大量動畫、舊劇、紀錄片，包括《陰屍路（The Walking Dead）》、《迷（Lost）》、《GANTZ 殺戮都市》、《二戰大事記彩色版（Greatest Events of WWII in Color）》 等...未能盡錄。
＊＊＊
期待中
1. Disney+：《異形：地球（Alien: Earth）
魔術師不嬲都係人類敵人的鐵粉，當中荷里活三大殺手（異形、Predator、Terminator）殺人不眨眼，每次都睇得魔術師眉飛色舞。今次《異形》有影集推出，魔術師無理由錯過：
1. Netflix:《星期三（Wednesday）》
魔術師第一季都未入坑，卻連第二季預告都出理，唔知幾時至有得睇，要諗吓等唔等埋一次過睇：
＊＊＊
無乜期待中
1. Netflix：《魷魚遊戲（Squid Game)》第三季
魔術師不嬲都唔覺第一季水準高，尤其是個主角簡直是不知所謂；第二季訪間負評「滿點」，故事講到一半，都係等墥第三季再睇。
2. Netflix：《殭屍校園（All of Us are Dead）》第一、二季
未入坑。如果兩季完魔術師都可以有時間就睇：
3. Netflix:《Fubar》
久違了的大隻佬再現《幼稚園特警》式的動作喜劇，本來諗住用來攝時間，但竟然有第二季，咁就等吓先。
4. Netflix：《暗夜情報員（The Night Agent)》第三季
第一季幾好睇，第二季唔好睇（除了「伊朗妹」幾靚），第三季已無期望（劇情安排戲中的「侵侵」當選總統，似乎要諷刺呢位「荷里活公敵」）。
＊＊＊
最後貼上魔術師的 all time favoruites 影集/動畫/單元劇/紀錄片頭十名（僅限現時在 Netflix、Disney+、及 Amazon Prime 的非電影類片種)，排名分先後：
1. Netflix:《闇（Dark）》
三季完燒腦穿越神劇，無 bug。
魔術師評分：100分（100分滿分）
1. Netflix:《魔剎（Monster）》
漫畫改編之暗黑系動畫，分鏡出色。魔術師由錄影CCTVB直至買碟二刷，同先父一齊欣賞之動畫之二（另一套就係《銀河英雄傳說》）。
魔術師評分：100分（100分滿分）
1. Netflix:《今際之國的有栖（Alice in Borderland）》
兩季完求生劇，漫畫改編。淨係睇囡囡已能完勝。
魔術師評分：100分（100分滿分）
4. Netflix：《狂賭之淵（賭ケグルイ，Kakegurui – Compulsive Gambler）》真人版 第一、二季
睇多啲濱邊美波就要睇呢套劇！顧名思義本片為漫畫真人化劇集，一眾動漫造型的「鄉下妹」上半身給你一式一樣的校服誘惑、下半身就有各式短裙仔裸足或黑絲化身賭神賭聖賭俠任君選擇，當然還少不了每次美波賭身家時的高潮樣（仲要係從不出千），與及一眾「旁白」配角的誇張對白和表情、賭局中主人翁內心戲的場景切換只會令魔術師愈看愈興奮（！），看完只能說句「鄉下妹」顏值真係無得輸，怪唔之得泡菜妹要以整型才可挽回一局。
魔術師評分：95分（100分滿分）
4. 《混沌少年時（Adolescence）》
演員演技精湛，場景安排出色。尤其是男女警察、心理學家，甚至那些不起眼的角色例如第一集的律師（自嘲現實與及戲內時間過了25分鐘就能到來）、護士、搜身警員、以致第二集的老師和學生、第三集的拘留所看護等。一鏡直落鏡頭穿插走位技巧高超（第二集尾段鏡頭由地下上空中再降落）更添觀賞價值；但成件案嘅邏輯似乎有啲講唔通，要扣分。
術師評分：90分（基本）-5分（案件細節）＋10分（演員、拍攝技巧）＝95分（100分滿分）
6. 《紙房子（Money Heist）》
知名西班牙「神劇」，五季完。雖然講到教授幾咁算無遺策，但其中靠不可預測的巧合及符碌的情況亦唔少，真係「好運好過好波」；要睇不如睇女督察（後稱里斯本(Lisbon)）的英姿、奈洛比（Nairobi）的「人事管理技巧」；及東京（Toyko）的西口西面。
魔術師評分：90分（100分滿分）
6. 《新世紀福爾摩斯（Sherlock）》
魔術師最鍾意 attention to details！
|
| （圖片來源：BBC iPlayer: Sherlock, captured on 26 Aug 2023） |
魔術師評分：90分（100分滿分）
6. Amazon Prime Video：《刺客旅館：捍衛任務世界（The Continental: From the World of John Wick）》
《殺神（John Wick）》衍生前傳劇集，講大陸飯店經理 Winston（Colin Woodell 飾）的前半生。酒店接待沙隆（Charon）讚以青年身份出現。有 John Wick 式打鬥，係幾爽幾好睇。本片仲有 Mel Gibson 參加演出。
魔術師評分：90分（100分滿分）
6. Disney+ :《Moving 超異能族》
韓孝周在本片的知性型後生至中女形象（副眼鏡幫咗大忙，做了眼鏡娘直程唔同咗樣），實在太正！
魔術師評分： 90分（100分滿分）
10. Netflix：《The 8 Show》
大橋類似《饑餓鬥室(El hoyo/ The Platform）》的貧富懸殊、社會階層欺壓、為金錢出賣人性、直至最底層的人發出絕望的怒吼（同時也暗示了網紅靠出位嘩眾取寵表演（飲酒飲到死？）賺打賞的畸形制度）。本片好睇過《魷魚（The Squid Game）》。 看來泡菜人民真係好壓抑，才經常有呢類的劇集、網漫流行起來。
另外，本片配樂用心（包括曾在《銀英傳》中採用過的配樂、華格納 Wagner《Ride of the Valkyries（女武神的飛行）》），值得加分。
魔術師評分：85分（基本）＋5分（配樂）＝90分（100分滿分）
10. Netflix：《冥王（Pluto）》
浦澤直樹又一力作，喜歡《魔剎（Monster）》的觀眾不容錯過。劇情改編自手塚治虫的《小飛俠》篇章《地上最強的機械人》，所以有不少手塚治虫的「童真」feel，跟浦澤直樹的暗黑風有少許錯配，而且結局解畫有啲牽強，個人覺的得稍不及《魔剎》和《二十世紀少年》。故事起源於一個似曾相識的背景：中亞國家波斯王國被某自稱世界警察的國家指控藏有大殺傷力機械人，聯合國調查團發現本無此事，但戰爭經已開打，引伸出不少愛恨復仇，人類和機械人（人工智能）的包容與矛盾的故事。
魔術師評分：85分（100分滿分）
10. Disney+：《夜魔俠（Marvel's Daredevil）》第一至三季
本來係 Netflix 版，但因版權問題搬到去 Disney+。魔術師因為「強迫症」關係，睇續集《夜魔俠：重生（Daredevil: Born Again）》前必先睇埋之前嘅故事。第一及第二季幾好睇，尤其是 Venessa （Ayelet Zurer 飾）同埋 Elektra（Élodie Yung 飾）勁靚，蓋過了夜魔俠婆媽：第三季劇情稍微跌 watt。因為隔咗《捍衛者聯盟》，即係又要睇返哂之前幾套 Marvel 劇才能夠「連戲」。
魔術師評分：85分（100分滿分）
13. Disney+:《美國恐佈故事（American Horry Story）》第一至十三季
季度單元故事，共用相同或類似的世界觀，追看無難度。本來係幾好睇的劇集（魔術師個人喜歡 Season 2《Asylum》、Season 1《Murder House》＋Season 3《Coven》＝Season 8《Apocalypse》），但愈拍愈頹，由第10季開始覺得有啲無厘頭，故事亦開始唔吸引，無乜新意和追看性，加上元祖演員全數退場，無哂癮，追看下去也只是情意結而已。
魔術師評分：（第1至13季平均)80分（100分滿分）
13. Netflix: 《少年法庭（Juvenile Justice）》
呢套係少有可以叫魔術師有心機追落去的韓片，有時仲深宵播放一晚追睇兩集：是關女主角的價值觀啱哂魔術師：年輕唔係大晒，對於窮兇極惡的少年犯，一定要嚴懲，否則佢地只會嘲笑法律的無能。不過，本片結局有啲不太合理，太過正能量：以結局案件的有青之殘忍性格，無可能只在女主手臂上刺一刀，而唔係割喉棄屍；肥婆部長亦不可能在庭上為其慣性草率結案而影響的受害人公開道歉吧！
魔術師評分：80分（100分滿分）
13. Disney+: 《解碼追兇（Signal）》
金憓秀實在太迷人，估唔到當時48歲的女主在過去時間線做20歲出頭的新紮師妹毫無違和感。本劇在逆轉時間線的劇本尚算講得通，但本來應該是正義化身的「電波刑警」卻有不少徇私、鶳之舉，加上個結局為了鋪下一季（結果唔成事）而寫爛咗個尾，美中不足。
魔術師評分：80分（100分滿分）
13. Netflix：《Happiness》
雖然話係喪屍劇，但係沒有一般喪屍片的壓迫感，似乎係影射新冠時泡菜政府對疫情的處理多啲。描寫人性醜惡就寫得幾「透徹」，反派角色又奸又蠢。劇情有些許 bugs，美中不足。好在有韓孝周支撐場面。
魔術師評分： 80分（100分滿分）
13. Amazon Prime Video：《死期將至（Death's Game）》
泡菜仔大學畢業後 7 年都搵唔到嘢做，投資被人呃錢，無錢交租被逼走，又自卑感作祟受靚靚女朋友（又係《超異能族 Moving》的金允貞飾演）接濟食軟飯，要自殺不特止（泡菜國的自殺率滿高的），還要將死亡看成是「低等手段」，結果便要被死神罰死完又死...當中當然又穿插了主角「間接被逼自殺」的前因後果、愛情線和親情線等。最弊就係復仇線有 bug，即使主角具有多個人世的記憶都不等於有能力去做哂呢啲人做到的事也。
魔術師評分： 80分（100分滿分）
13. Netflix：《黑鴿（Black Doves）》
呢個間諜劇劇情緊湊，文武戲處理出色，但牽涉的案件寶在太無厘頭，而且牽涉中英兩國關係，中方無可能咁好相與。女主角 Keira Christina Knightley 勁靚，衰在又要整到個男主角係 gay（夾硬搞到男女主角無感情線？），仲有女殺手二人組似係 Les，呢 part 魔術師最唔鍾意。
魔術師評分： 80分（100分滿分）
13. Disney+:《照明商店（Light Shop）》
《Moving 超異能族》作者又一力作，幾好睇；不過有啲角色唔夠突出，存在感可有可無，但又好似講到好重要咁，人物同故事有點不平衡，較《Moving 超異能族》差。
魔術師評分：80分（100分滿分）
＊＊＊
伸延閱讀：
沒有留言:
張貼留言