2012年11月29日 星期四

超筍退休金

世界上是有這樣的一種退休金制度,叫 Defined benefits,雇主100﹪供款,兼保證回報,其方程式為:

退休金=員工最終月薪 x 服務年資(不足一年按比例計算) x 因子

因子隨年資遞增,例如第1年為0.5,第2年為0.6,...,第5年為1.0(意味着員工在5年內離職會「攞唔足」退休金,亦係「挽留」員工的方法),...第15年為2.0,至此頂盡,真至做到真正退休才有特別「獎賞」(例如因子會「暴增」至2.5)。

呢個方案,本來係認為了員工皆為精英,培養需時,唔想人才流失而設。缺點就係這些退休金屬於對員工的「承諾」,在財務報表中會以負債形式表現出來,雇主亦需撥出儲備投資來兌現承諾,萬一投資失利,該年度更要撥出資金去「保底」,財務負擔絕對不輕。

有鑑於現時投資環境風高浪急,社會上廢青冗員絕對多過有實力的人才,所以本來設立好呢類「超筍退休金」計劃都紛紛「截龍」,新入職者通通都要變成強積金參加者;有些公司甚至為了做靚盤數而強硬將「超筍退休金」取消,逼令員工提款再參加強積金。朋友S亦正有此疑惑,來問魔術師點睇。

其實條數好易計,先假設朋友S的年資為N,並已「頂盡」年資因子,如果無升職加薪,則「超筍退休金」一年回報為:

[(N+1) - N] / N = 1/N

即係話,如果朋友S在公司服務了20年的話,其「超筍退休金」的回報率便只有1/20 = 5﹪;年資愈長回報愈低。

如果有加薪 x% 呢,公式就變成

[(1 + x%) (N + 1) - N] / N = 1/N + x% (N + 1) / N

即係話,每加薪1﹪,其「超筍退休金」比無加薪的情況下會多出 (N + 1) / 100 N 咁多,以N = 20 為例,即 1.05%。

所以,除非朋友S可以獲大幅加薪,否則「超筍退休金」的回報其實也不過爾爾。

按照積金局網站顯示,如果員工在2000年強積金生效以前參加了呢類「超筍退休金」計劃的話,一旦計劃終止係可以拎返全數的(最壞情況是將「最低強積金利益」放返入去強積金計劃)。如果係咁講,魔術師就建議朋友S不用擔心,拎返舊錢可以買樓收租或投資高息公用股或買高息外幣債券,總之點都好過為咗「公司包底」四個字同佢磋跎歲月吖!

Picture

***

參考資料:

積金局網站 職業退休計劃成員

積金局網站 職業退休計劃僱員  常見問題

2012/11/28 23:44:21 

2012年11月27日 星期二

覆讀者來信(21 Nov 2012)(三)-社運仔的語言偽術

最後讀者再以國民教育為例,當時facebook群情洶湧,peer pressure極大,好似只要唔去反國教就會被標籤成「邪惡化身」一樣。讀指出只要靠人多,一人一把口就就可以成功逼使政府就範;一旦提出理性思考,社運仔就會拋出以下名人語錄,令讀者欲辯無從,故深感困惑。

當納粹逮捕共產黨員時,我沒有說話,因為我不是共產黨員。

當納粹逮捕社會民主人士時,我沒有說話,因為我不是社會民主人士。

當納粹逮捕工會主義者時,我沒有說話,因為我不是工會主義者。

當納粹逮捕我時,已沒有人能替我說話了。

﹣ 馬丁·內莫勒 9月27日名言

要應付朋輩壓力,說易不易,說難不難。具體一點說,就是有獨孤求敗的心態。絕大部分鬼群眾都是「平庸」的人,雖然未必真係能做到如劍魔般天下無敵,但要脫穎而出,做個(相對自己朋輩)成功的人的話,必需要有我自求我道,孤身走我路的覺悟。看就例如說要做個成功投資者,就不可以太過隨波逐流,人買你又買,雖云「有智慧不如趁勢」,但出入位一樣要有自己見識,否則就變成是專接火棒的水魚了。

另外,並非任何名人雋語都可以不限時間空間隨手拿來當成是真理的。然而社運需要係自我認同,社運仔只要能將一些名人之言變成社會運動背後的精神論述,就能夠將自己正當化正義化,出師有名,也更容易聚集信徒,故「雞蛋高牆論」如是,「替人說話論」亦如是。

查實,當魔術師第一次聽到「替人說話論」時就已經感到一頭霧水:第一、二戰時納粹黨何等手段?竟然以為單憑「有人為你說話」就可以逃離納粹魔掌?那不會是太傻太天真吧?第二、當納粹黨逮捕共產黨員、社會民主人士、再到工會主義者時,你自己仲唔醒覺,一係逃亡、一係躲進地下,反而戇居居地等人來逮捕你,仲想有人「為自己說話」就可以倖免於難?如此行徑,跟明知有人在路上斬人都唔走佬無分別喎?

寫寫下,魔術師忽然想起《鋼琴戰曲(The Pianist)》嘅呢一幕,一個德國軍官,一個人一枝槍,要槍斃10幾個猶太人,但猶太人卻只會扒在地下等死,甚至乎軍官打到無子彈要再上膛時,都無人識反抗: Picture

所以,而家唔係出唔出聲的問題,係有無一顆寧為玉碎,不作瓦存的必死之心的問題。

而香港人,即使係激進社運仔,明顯都無呢一種覺悟。

再退一萬步講,就算馬丁·內莫勒呢句話係啱嘅,我地真係要「發聲」才可以維護我地嘅利益,咁又是否等於「有理無理都嘈咗先算」?黑社會都係靠恐嚇威脅收陀地,世事就係咁無奈,唔講道理真係可能會更容易「達成目標」,但最後自己支唔支持,過唔過到自己嗰關,其實都係問自己良心啫。

再說,馬丁呢句話,應該係講大家應該不分你我(例如政治立場),一起對抗邪惡政權(納粹黨)吧?而依家香港的社運派、激進派卻偏偏對各政黨,無論係建制或泛民都發動全方位攻擊喎!而更諷刺的是,以反國教為例,嗰種將支持國教的人都標籤「魔鬼」,不停攻訐的態度(連梁紀昌校長都不能倖免),就已經唔係「自衛式」的「發聲」,而係變成「革命小將」了。

所以呢,魔術師不嬲都懷疑社運仔對佢地所採用的名人雋語背後的歷史人文和精神有幾多理解?抑或又係學「皇上」金口話齋,名言之係用來團結眾人的「容易瑯瑯上口的口號」(K歌?)?搞不好,所謂「名人精神」其實就是「幌子」吧? 

Picture 

***

參考資料:

馬丁·內莫勒 wiki

逆工管思維(十一)之獨孤求敗

關於社會公義(三)之雞蛋和牆

《鋼琴戰曲(The Pianist)》預告片:

 

2012/11/27 22:52:29 

2012年11月26日 星期一

覆讀者來信(21 Nov 2012)(二)-鬧爆文化

睇完呢段片,發覺實在係得啖笑,如果叫魔術師俾個簡短評論,就只有5個字:「認真你就輸」。

但係事實上亦有唔少人係「認真」的,就例如信報占飛:

2012年11月19日

信報 占飛 忽然文化

違反社會價值

《新聞透視》節目「鬧爆文化」一集,將鬧爆與理性對立,彷彿有鬧爆,便沒理性。理性的人不會鬧爆對方。這當然不是事實。秀才遇着兵、有理說不清時,除了破口大罵外,還有什麼其他辦法?

用最淺顯的社會學常識講,鬧爆其實是「社會制裁」(social sanction)之一。有人不顧公德、排隊打尖,不能繩之於法,怎樣制裁他?旁人側目而視、以白眼表示不滿,是最輕微的「社會制裁」。嚴重一點,則開口叫他遵守秩序排隊。再嚴重一點,則群起而罵之,令他知難而退。「社會制裁」正是維護公德的犀利武器。在網上鬧爆,不過是使用「人言可畏」的壓力的「社會制裁」而已。

社會上有許多沒有白紙黑字寫下來的價值(values),沒有人違反時,大家未必察覺其存在。一旦有人違反了這些價值,大眾便會嘩然。最好的例子便是最近的「人情500」被鬧爆,反映了港人依然重視人情,反對金錢至上,反對將請飲擺酒看作生意。鬧爆該女子的網民言辭容或過火,起底示眾亦不對,但背後「重申」(reinforce)人情的價值在於「豈窮達而異心」,怎能說這是網上欺凌呢?

發洩抑鬱挫折

又如反國教時用「洗腦」這個標籤,經常遭強調「理性討論」的人士指責為「刺青化」(stigmatization),那可能是事實,但不能否認這標籤團結了群眾,而且重申了「思想自由」的可貴,反對廉價的、約翰遜說的「流氓最後避難所」式愛國主義,甚至涉及近期熱烈討論的港人身份認同問題。假若只考慮「洗腦」是否屬實而不看這標籤背後的深層意義,便見樹木不見森林了。在《新聞透視》節目中,自以為含冤受屈而出鏡訴苦的受訪者,正是不明白這個道理。今時今日,沒有「社會學想像力」,不易看清社會事實(social fact)背後的「真相」。

當然,本身心理不平衡、為發洩抑鬱挫折而四處去鬧爆別人的網民,亦是有的。但網上是完全、絕對自由的平台,這類發洩遲早會受到「社會制裁」。回首香港這些年的網上鬧爆事件,大部分被鬧爆的人都多多少少是咎由自取。至少目前是如此。

占飛將「鬧爆文化」合理化,其抱持的態度是「秀才遇着兵、有理說不清時,除了破口大罵外,還有什麼其他辦法?」,鬧爆只是「使用『人言可畏』的壓力的『社會制裁』」。彷彿很有道理,但占飛沒有提及的是「有人不顧公德、排隊打尖,不能繩之於法」,一眾守秩序的良好市民「破口大罵」時,「良好市民」是正面面對着這位不守social norm的仁兄的;說得明白一點,就是拳頭在近,在鬧爆打尖者的同時,鬧人者亦面對被毆打的風險,這是和節目中所提及的「鬧爆」有基本上的分別。

魔術師並沒有反對「鬧爆」的意思,天下事天下人皆能管,如果連評論一下都不可以,這個社會便完全失去了言論自由了。魔術師自己就曾評論過不少見聞時事,自問都係從對事出發,對人者則是由於「這個人做這件事」而已;但「鬧爆」不等於一定要對方叩頭認錯才能了事。現在起底組做的,已不是以理服人了。試問「500元港女」的前度男友跟此事何干?「以德服人者仁,以力服人者霸」,起底和拳頭一樣係屬欺凌,而起底比拳頭更不堪的,是前者的騷擾是「有心人算無心人」的下三濫行徑(如同韋小寶撒石灰)行為。這種躲在暗處從事「秘密調查」的網絡警察,跟納粹德軍的「蓋世太保」並無二致。

而更可笑的,是占飛在字裡行間中,都已認同了「國民教育等於『洗腦』」未必屬實,但「這標籤(洗腦)團結了群眾」,民眾需要「看這標籤背後的深層意義」。魔術師不明白的是,如果只要靠rebranding便可以將「錯的標籤」變成是「對的標籤」,那麼只要將獅子rebrand成是貓,是不是就意味着給「輕輕」咬上一口也沒所謂呢?

***

講返個節目,當中所說的「鬧爆文化」實在很籠統,例如有政黨就以「散播仇恨」的方式煽動民眾去「鬧爆」。奇就奇在他們只會只會控訴其他政黨「禮義廉」,而對自己「散播仇恨」的卑劣行為完全沒有半分自省,試問「散播仇恨」對整個社會,有何好處?

Picture

Picture

Picture

也有網民因屈小姐達不到他們的「期望」而去騷擾她,連「沉默的自由」都沒有了。所謂「核心價值」中的「言論自由」,也應包括「不發聲的自由」吧?

Picture

試問有承擔者,又何用「期望」他人去為自己發聲?好,屈小姐達不到你的期望吧?那就不要靠她,求人不如求己,自己赤膊上陣,如何?如果只懂用自己(或他人)的「赤膊」裸照去恐嚇弱質女子,恐怕狗熊沒有什麼分別。

Picture

總括來說,「鬧爆」並不是一種「文化」,只是一種「行為表徵」。縱觀香港,「鬧爆」者本身彷彿就是追求民主正義的化身;然而在「鬧爆」的行為背後,大多數「鬧爆」者的面目都是模糊不精的,有點像靚模,一式一樣的面孔和身材,個個都係得個英文名,叫人難以分辨),其精神面貌,最適合被當權者「管理」:

「民眾所喜歡的並非自主性的思考及隨之產生的責任,而是命令、服從及責任免除。魯道夫的登場,就是一大歷史見證。在民主政治中,該為政弊負責的是選擇不合格的從政者當政的民眾本身;專制政治則不然,民眾不願自我反省,而喜歡偷偷且不需負任何責任地大肆抨擊為政者。」

- 《銀河英雄傳說 序章 銀河系史概略》

***

伸延閱讀:

仇恨又卻是誰所種?(「洗腦」什麼的,魔術師早在2010年已經有講。)

2012/11/25 16:29:47 

2012年11月25日 星期日

覆讀者來信(21 Nov 2012)(一)-北斗慚悔拳

感謝讀者又再來信問魔術師對時事的看法,先生前先生後,實在愧不敢當。因工作事忙,延至現在才回覆,而且更要分篇作答,還請見諒。

***

讀者問題之一,係想知道魔術師對有關鬧爆文化、理性討論 、激烈抗爭的看法。魔術師還未看過CCTVB的節目,只好留待下回再評,現在先講讀者所引用「皇上」在某網上節目以「北斗之拳邏輯」對「和稀泥文化人」評論(以下片段含有極多粗言,敬請留意):

 

最令魔術師氣憤的,就係「皇上」連鮮魚行學校的梁紀昌校長如此古道熱腸之人都唔放過,被譏為「投共」(應該係講緊辦國民教育吧?),「燒數簿」之餘,再將梁校長比喻成「為照顧細妹而濫殺無辜的拳王手下」(00:00-08:30),唔會因為扶咗阿婆過馬路(教好學生)就唔係敵人(「投共」就係敵人)。如此偷換概念,要受「北斗懺悔拳」折磨的,恐怕是「皇上」自己吧?

 Picture

魔術師對《北斗之拳》的理解係,無論壞人做壞事的背後有甚麼苦衷(例如希恩(シン)),做咗壞事始終係有報應嘅,而替天行道的就係武功高強的正義使者拳四郎。阿婆在核戰後的社會中並非沒有生存的價值,而係貫徹了《楢山節考》中的老人為後生仔的生存而自我犧牲的精神而已。武論尊(《北斗之拳》的作者)可沒為「有故事」的壞人說項喎!

跟「皇上」的理論相反,在《北斗之拳》這個核戰後的亂世之中,武力就是一切,這是殘酷但又不能不承認的事。在拳王的絕對武力面前,拳四郎即使要宣揚「愛」,也只能以雷奧更強的「無想轉生」以暴易暴將其擊倒,而唔係係度得把口嗌口號。

至於「皇上」聲稱要「打倒中國共產黨,需要好多人參與,亦需要龐大的行動力」(17:00-17:10),呢番言語,明顯係要造反喇!咁無嘅,香港又無23條,無佢乎嘅。作為一個小市民,魔術師只能放長雙眼睇下「皇上」點樣搞革命囉!老共(以至整個中國歷史裡的開國皇帝)都係槍杵子裡出政權,天下係要打返來的,而唔係用把口講返來的,又睇下「皇上」可以發起幾多革命軍囉!最緊要「皇上」要好似曹操咁站在陣前打仗喎!「皇上」咁英明神武,又有型(13:55-14:15),應該唔會好似《銀河英雄傳說》中的特留尼西特咁,猛咁叫人去戰場去送死,自己就留係大後方咁狗熊嘅!

***

註1:「皇上」一句說話裡助語詞之多,近乎泛濫;魔術師不明白加入如此「大量」的助語詞對溝通有何幫助,亦對此類語言句式有極大的理解障礙,聽咗一陣就唔係太想聽,不過本着「沒有研究就沒有發言權」的原則,只能硬着頭皮聽一陣,如各位發現魔術師對「皇上」的看法有錯,敬請不吝指正。

註2:魔術師發覺自己真係對「皇上」大不敬,直程係犯咗死罪!

***

伸延閱讀:

「你已經死了!」

***

不推薦伸延視頻:

熱血時報 笑死朕 第96集: 剖析鬧爆文化:

 

 

2012/11/25 00:42:52 

2012年11月23日 星期五

包租婆之言

討論區最近有講呢一篇「毒文」,絕對有理由懷疑作者係個包租婆:

Picture

無樓族的另類人生 

貴麗芙 November 2012

當走到街上,隨便一個街坊都在議論買樓時,便正正代表泡沫正在冒起。當然有人仍然唱好,說樓巿只會愈來愈貴,應趁早買,不過對於幾「平」都買唔起的人而言,升到曉飛都唔關自己事。

相反,這正正是時候讓我們抽離羊群心態,重新反思:買樓是否人生must have?買不起樓,但能騰出充裕時間、金錢和自由,能否用來做些令自己生活更快樂豐盛的事?

不妨告訴自己:上不到車,並不是世界末日,反而因為你沒甚麼可失去,可以更豁達去創造另類人生。

享受Work-life Balance

不用供樓,便不用為了那一千幾百在辦公室裡卑躬屈膝,不用跟同事無謂地鬥OT,甚至不用排櫈仔等升職,因為不做這份工的機會成本較低,你大可以到別的公司打工去。或者換個角度想,打工不是你人生的全部,與其捱騾仔,不如工餘時間投入自己的興趣、家庭和社交生活。

事業更靈活

一份穩定職業,對無樓族來說相對不那麼重要。你更有本錢和膽識去發掘其他出路,實踐個人passion,令自己才能得到充分發揮。例如轉做自由工作者?或是小本在網上搞點小生意?《作死不離三兄弟》的主角說,你有熱情做的事,便是你會成功的事,相信他!

出外闖世界

不做樓奴的一大好處是不用被綁死在固地位置。不妨走出大世界尋找新機會,也不用事事以錢掛帥,花三個月遊東南亞,搬到巴黎學一年烹飪,或到災區做義工,說不到回來後更超然物外,放下一般香港人的短視庸俗。

搬屋當旅行

無殼蝸牛最痛苦就是命運由業主發落,每次搬屋都叫苦連天,仿如無主孤魂般失神落魄。不過也可調整心態,每次搬屋,就當作去一個新地方深度旅遊,順道了解香港不同區域的社區特色,發掘當地好去處及地道美食。沒有安居樂業,說不定可換來多姿多采。

 

好奇怪的想法,供樓就係做樓奴,唔轉得工,份工一做就要就三十年?邊個話買咗樓唔可以換樓嘅呢呵?

做自由工作者,又或者以小本在網上搞點小生意,唔通又唔使住?做自由工作,做網上生意,所需要的居住條件與打寫字樓工(假設)有何分別?為何會有分別?唔通打寫字樓工就要住要體面點,做自由工就可以住劏房?究竟係想自由所以唔供樓,抑或係無本事供樓所以打自由工,擺出一副懶不屑做樓奴的樣子?

無論份工點自由都好,人始終要住,要有瓦遮頭,除非你去訓街或者去住露宿者之家,否則唔供樓就要交租,點都要有一份「收入」去支撐,唔係話交租支出就可以少啲的。就算話唔介意住劏房;係,呢個世界(暫時)無個別劏房出售,之但係可以無良業主可以買一層再劏,收返N個「自由人」錢,到時和味過和味龍,而「自由人」卻始擺脫不了為人作嫁的命運喎。

依家問題租樓始終係要仰業主鼻息,求神拜佛希望佢菩薩心腸唔好大幅加租。咁樣嘅諗法,完全係違反了「致人而不致於人」(《孫子兵法 虛實篇》)的用兵法則。在市場上,持有一個自住單位的業住,可以比喻為股票場上的塘邊鶴,好淡倉都無揸;持有多過一個單位,用來投資收租的,是好友;而死都唔買樓的就是淡友。咁究竟呢班人睇淡,又有乜嘢原因呢?魔術師真係百思不得其解,唔做好友都可以持平嘅啫,做乜一定要做淡?

再講,人嘅搵錢能力,通常係會隨着年齡減退的,而除非你係有米到唔使點做按揭,否則跟銀行借錢買樓,供樓期限亦係隨年齡遞減的;雙管齊下,一係就意味着每月供款額大增,一係就借少啲囉,買間無咁「好質素」架囉!所以,追求「多姿多采」的人生,係有代價架!

觀乎此,大家係咪應該「有樓趁嫰供」呢?

***

伸延閱讀:

投降

點解買保險?

2012/11/23 02:59:25 

2012年11月22日 星期四

It's time to change

人就係咁樣,永遠都係自我感覺良好行先。

未轉組前,妹大大老細作為地區行動部阿頭,一方面要攞威,一方面又要親民,所以特別多鬼點子,又要在公司網絡內寫blog喇,又要拍片喇咁;淨係呢啲古靈精怪無極限的要求,就已經夠搞到妹頭陀陀擰,更遑論上有好者,下有更甚的低一兩級的頭領了。本來以前仲有葵鼠,同事A、小寶同魔術師等人幫下手度橋,做下捉刀人、整下試玩版咁(雖然最後都係不了了之),但依家所有人都走哂,轉組的轉組,退休的退休,妹頭無人可用,相信反而落得清閒。

唔好以為呢種寫blog拍片懶new media的作風係中國人(包括香港人)先有,原來總部嗰便都係一樣文化。自從魔術師開始將廠仔啲火撲滅,成為總部網絡的臨時接管人之後,先發覺各所謂「高層」(講真可能只係高過妹頭一級)都係各佔山頭,一人一blog的風氣甚盛,有啲仲係video blog添!文字blog係咪請槍就唔知嘞,但拍片喇喎,邊嚟咁多資源呢又?

最搞笑係,好多「高層」都係唔知醜的,好似今日咁,魔術師正做到七竅生煙之際,忽然總部傳訊人傳來消息,要刪除某video blog的留言。原來該video blog的主人是位肥洋婦,個個同事都擦鞋留言,講下"You are awesome"等恭維說話,而偏就有人唔生性留言(原文乃英文):

「你真係好鬼肥(you are so fat), 快啲減下喇!(it's time to change)」

偏偏個blog又無留設定言監控,並沒有先過濾後出街,搞到總部要搵人叫魔術師馬上將之掃除…當然,魔術師做得掌管人,就一定記返低個IP俾總部,追唔追查就係佢地嘅事了。

美顏上司與頭領N得知後,要到直打跌;不過好笑還好笑,咁個留言其實都幾反映到現實嘅,inconvenient truth也。魔術師嘅笑點反而係,唔知點解啲高層梗係咁鬼鍾意出醜咁解啫。

 

2012/11/22 00:03:50 

2012年11月20日 星期二

是日晚飯

連日救火,餐餐無啖好食。好在魔術師唔係住豪宅區,就算夜晚十一、二點返到屋企,樓下大把嘢食,都唔怕餓親。做到心火盛,自然想買嘢減壓,一時間血拼不來,便只好買嘢食,話知自己眼闊肚窄,一於買咗先算。

排骨蒸飯、雞翼、冬蔭功湯,承惠62大元。更想不到的是,樓下小店的冬蔭功,用料竟然毫不含糊,還有一大隻蝦,真係估佢唔到。

真係架!諗諗下住豪宅,出入鬼迷咁遠,夜馬馬想搵餐食真係唔係咁易,少咗好多樂趣!當然,香港有某些近西九偽豪宅,附近就係大角咀舊區,到時又有CEO Living,又有街頭小吃,都唔知幾過癮。

 Picture 

2012年11月19日 星期一

消失的46萬

都話咗,聽「傳霉人」講嘢,真係當聽下故仔、講下笑話就算,否則一旦認真起來,「舒」的便是自己:

信報 2012年11月15日

舒友

為綠表居屋補地價 真正活化居屋

縱使特首梁振英視而不見、見而不認也好,自從他於7月16日宣布每年准許五千個白表名額免補地價購買居屋後,原本相對平靜的居屋市場迅即炒熱;由於預期政策明年落實前仍有很大提價空間,結果價格瘋狂飆升,但由於盤源極少,成交量反而減少。

這個未經民意諮詢、沒由專業人士詳細討論的房屋政策,單憑長官意志誓要硬推,既破壞公營房屋的本質,亦直接推高樓價,害苦市民,最終可能未見「活化」,卻已搞死居屋綠表市場,加劇民怨。

推出新策四種理據

政府推行新政策的理據大概可以總括為四點:

一、居屋流轉太慢——許多單位已經完成供款,業主礙於補地價不願放盤,寧可空置形成浪費,政策增加合資格購買人士,居屋第二市場的買賣便可有望增加。

二、滿足白表人士置業需要——政府已停售居屋十年,累積大量想置業但無力負擔私人樓價的市民,新計劃可滿足他們的置業需求,而且只是2016至17年新居屋落成前的過渡安排。

三、數量不多,對樓價影響不大——由於申請者資格須經過審批,加上設有兩年禁售期,每年五千個名額相對於已發售的三十八萬居屋和公屋只屬小數目,政府認為不會令居屋出現炒風,對價格影響也不大。

四、先推行、後檢討——相信新政策可助市民置業,應先試行後再檢討成效,貿然擱置是不負責任的。

社會提出五點質疑

新政策宣布後經過三個多月的醞釀,至今尚未上馬,已有許多惡果浮現,反對聲音日漸升溫,外界質疑的理由如下:

一、製造「居者炒其屋」

在沒有增加供應下卻製造需求,令一向溫和的居屋市場急速升溫,升幅跑贏大市;而且已明顯出現炒風,從而推高樓價,加重所有置業者負擔,租金續升,令窮人更加受害。

二、能否釋出目標單位成疑

在期望樓價繼續上升的情況下,供完樓而沒有急需現金周轉的業主,正正是不急於放盤的一群,他們可以一直等待更好的價格,致使單位未能有效流出市場;反而原本計劃放盤的業主由於認為愈遲放賺得愈多,造成盤源少,叫價卻又脫離市場購買力,交投量比之前更低。

三、破壞公營房屋架構

屋居主要存在的意義是,藉着補貼地價,吸引想置業、又未能購買私樓的公屋戶變成居屋業主,待他們交回公屋後,可讓輪候者入住。不過,白表人士的收入和資產遠高於公屋輪候冊的人,如讓他們免補地價購買居屋,即已破壞興建居屋的原意,亦會令公屋流轉大幅減慢,也等同破壞原有公屋居民的利益;加上白表者買居屋後不會令公屋增加,即對公屋輪候冊者不公平,最終可能引發司法覆核等訴訟問題。

舉個例說,身為公屋住戶的立法會議員梁國雄(長毛),假如他在新政策前打算購買居屋,但屋居樓價受新政策影響,跑贏大市的飆升,令他買居屋夢碎;若他以政策損害公屋住戶和輪候冊者的權益入稟,法庭該如何處理?

那並非如施永青於《am730》撰文所說的「歧視白表申請者」,而是公營房屋的主旨是要扶助弱勢,而且有明確的資產和入息審查作界線,如按過往的做法行事就叫「歧視白表申請者」,那政府該訂出讓李嘉誠都有權免補地價購買公屋的政策,才叫做公平?如今立法會的決議對新政策並無約束力,但數以萬計家庭卻受到影響,議員的憂慮實在並非為反對而反對。

政府說新政策只是過渡安排,首批名單明年1月接受申請,5月公布,如果大約三年後有新居屋發售,有關措施可能收回,即前後只有一萬五千個名額;短視如此,卻對現行公營房屋架構卻造成難以彌補的破壞,難怪港人愈來愈懷念推出公屋和居屋的前港督麥理浩了。

四、限量名額加劇炒風

政策限定每年五千個名額,有評論謔稱是「抽獎福利」,因為中簽如中獎;加上須限時使用,中簽者當然心急入市,但供應能否增加卻成疑問,到時出現「搶盤」情況將令居屋市場進一步升溫,屆時白表者買到的單位,由於價格已給政策托高,本身利益也會受損。

五、不應以民為白老鼠

特首梁振英公布新政策後,居屋樓價即升。當時運輸及房屋局局長張炳良對傳媒表示,情況屬「意料之內」。居屋升價已是可見的事實,偏偏近日特首和高官均指白表政策不會刺激樓價上升,反而推說現時只是隨市場調節,那等同張大眼、講大話。

須知道,對許多市民來說,買樓是畢生最重大的決定,近日熱門地區的綠表屋居價格動輒上升三成,普通單位都賣到四五百萬元,原來政府把市民當實驗品,若效果不佳,則再作檢討。屆時錯而鑄成,政府是否已擬定賠償方案?是否有人願意負責任下台?若不,實在不應把小市民當作白老鼠。

每宗買賣可釋出公屋

比較過政府思維和外界憂慮,加上惡策的反效果已經明顯出現,白表新政策可謂一無是處,百害而無一利。經過連月苦思,筆者在此姑且提出一個大膽招數——既能符合政府活化居屋的理念,又能消除外界批評──在新居屋發售前,政府對綠表居屋進行地價補貼,名額不限,且同時宣布將會調高新居屋白表者中簽比例;那樣,就不會破壞公營房屋架構,亦能增加業主賣樓的誘因。

有關構思是這樣的,在限定時間內,公屋戶主購買綠表屋屋時,賣家可獲政府額名補貼若干地價,例如兩成地價金額。以綠表成交價一百萬元、補貼五成地價的單位為例,自由市場樓價是二百萬元,業主出售單位予公屋戶時毋須補地價,過往只可獲一百萬元,新建議下多獲二十萬元,總共可得一百二十萬,而單位仍是綠表居屋。

買家交還公屋單位供輪候者入住,以一百萬元購入居屋後,補地價比率由五成變作七成,他日在自由市場放售時須補回,但禁售期後仍可在綠表市場出售。由於名額不限,可減少買賣雙方的焦慮和預期;在供應層面上,若如政府所說,補地價是買家的心理障礙,面對額外津貼的誘惑,相信放盤意欲可望提升,能否完成交易由自然供求決定,不會造成供不應求或求過於供的反效果。

這個建議只是讓活化居屋的成本分散,買賣雙方都有得益;同時每宗買賣都可釋出公屋單位,政府的補貼金額則遠較興建公屋為低,卻可達到以為民本、照顧低下階層為先的關愛效果。

另一方面,當屋居第二市場平穩發展,自由市場的樓價亦可望較為理性,白表者反而更易上車,在新居屋增加白表購買者比例,或者興建夾屋等資助房屋扶助白表者,破壞力遠比打亂現有公營房屋制度為低。

政府不妨從居屋原意出發,然後以新思維讓它真正活起來,政府能夠從善如流,才是市民之福。

作者為資深新聞工作者

Picture

 

先講係呢位「資深新聞工作者」的反對論點:

1. 所謂「居者炒其屋」的現象,只係證明了港人事實上真係將置業當成是「投資工具」之一,亦反證了某些80後要求港人「反思」置業需求的不切實際。以往居屋無炒風只是因為政策上令交易成本過高而已,現在政策一旦放鬆,便如洪太尉誤走108妖魔一樣了。

2. 「能否釋出目標單位成疑」並沒有抓着癢處。貴買貴賣,無論居屋點升,速度點都唔會快得過私樓。居屋業主的賣咗現有層樓,卻買唔返一間「可以改善居住質素」(以空間論,而非窗台、會所等不切實際的「增值配套」)的私樓,這才是要點吧?

3. 「破壞公營房屋架構」呢一點叫做說得有理,但短期措施本來就係暫時性的,咁都可以用「短視」來入罪就未免有點太過。

4. 「限量名額加劇炒風」係多餘嘅,香港人乜都炒一餐架喇,炒限量版有乜出奇?以前北控(0392)上市,連申請表都有得炒添!因為「得獎者」的成本幾乎係0,抽到獎屬於Windfall gain,用不着也不用介懷,就如公屋輪候者排到揀樓都會嫌地區太遠而放棄,寧願再等過。現在社會氛圍民綷先行,政府政策朝令夕改,魔術師就認為就算抽到獎,都未必係有人會去「恐慌性買樓」,因為置業畢竟是要先從自身的經濟情況開始考慮啊!

5. 「不應以民為白老鼠」呢條罪又係莫須有。所謂「新政策」,就是「未經試煉的政策」,難題昔日麥理浩的居屋政策就不是「以民為白老鼠」?所謂「近日熱門地區的綠表屋居價格動輒上升三成,普通單位都賣到四五百萬元」就更無稽,400萬樓,就算95按,以2%息供25年計,一個月都要供成$16,000,又豈是一般綠表申請人所能負擔?如此荒謬之開價,註定就係有價無市,呢位「資深新聞工作者」唔係真係咁傻咁天真掛?

全文最搞笑的是,呢位「資深新聞工作者」竟然提議:

公屋戶主購買綠表屋屋時,賣家可獲政府額名補貼若干地價,例如兩成地價金額。以綠表成交價一百萬元、補貼五成地價的單位為例,自由市場樓價是二百萬元,業主出售單位予公屋戶時毋須補地價,過往只可獲一百萬元,新建議下多獲二十萬元,總共可得一百二十萬。買家交還公屋單位供輪候者入住,以一百萬元購入居屋後,補地價比率由五成變作七成...

魔術師就真係睇極都唔明佢條數點計出來。首先,賣家收買家100萬,再收政府20萬,共得120萬,5成補價,自由市場價就是240萬,買家付100萬,即補地價比率由5成增至(240-100)/240=58.3%,而並非「資深新聞工作者」所說的7成。其次,就算調轉頭來計,買家付出100萬可以以補地價比率7成買到二手居屋,引申出市場價為100/(1-70%)=333.3萬,原業主佔5成,即起碼都收166.7萬,但係佢依家只係收咗120萬咋喎!

咁消失的47萬呢?

呢條錯得咁離譜嘅數,竟然係經過「連月苦思」所得,魔術師就真係唔明呢位「資深新聞工作者」個腦係裝乜架嘞!

***

參考資料:

房屋署>公屋申請>入息及資產限額

2012/11/19 00:38:29 

2012年11月18日 星期日

與靚模@中大

是日中大龍友半日團,想不到幾年無返過去,崇基到體育館之間又再地盤處處,「滿目瘡痍」,連校巴線都被分拆成數條,實在令魔術師大吃一驚。

Picture

嗯,言歸正傳,各位認為魔術師會覺得邊位妹妹仔索啲呢?左還是右呢?

魔術師就話係佢嘞!女孩子笑起上來有酒窩的確是較優勝的:

Picture

在新亞影完一round,大伙兒便去荷花池取景。有麻甩伯伯級的龍友叫酒窩妹妹除外套,佢竟然問:「我裡面咁樣你地介唔介意?」魔術師無聽錯下化?

 Picture

魔術師都是較喜歡比較朦朧的感覺。

 Picture

似乎人人都鍾意酒窩妹妹,為免另一位妹妹仔太難看,魔術師也就「幫襯」一下佢喇!

 Picture

影影下竟然聽見麻甩伯伯大聲對酒窩妹妹講:「你個膊頭好靚!」簡直係離哂大譜。導師開始叫停,魔術師當然也要把握機會,最後都要折返為伊人整返張黑白照:

 Picture

又,離去前麻甩伯伯仲要強迫兩位妹妹仔同佢合照,十足公司前組員博士K!

2012/11/18 00:01:33 

2012年11月16日 星期五

魔術師實物基金(2012年11月15日)

三個月過去,雖然金價有所反彈,但係都要繼續機械式操作,買入實金乙塊。

***

魔術師實物基金現持有:

澳洲柏斯鑄幣廠金塊1盎司,平均價$13,172.21,現價$12,988.63。

2012/11/16 00:02:30 

2012年11月15日 星期四

逆工管思維(十二)之職場騙案

魔術師自問EQ已經「高咗好多」,幫廠仔執手尾執咗成個禮拜,係今日先忍唔住同廠仔爆一鑊。當然就係俾廠仔惡人先告狀,話魔術師態度唔好喇!

是咁的:事緣美顏上司叫第三世界廠女S電郵一份文件俾佢,廠女S剛巧放假,便叫「聯絡人(coordinator)」廠仔R處理:「R,請幫忙。」

而廠仔R竟然就左手交右手寫封電郵俾魔術師:「魔術師,請處理。」

 

本來救火已經救到哂煙,一眼見到真係火都嚟埋,於是回郵:「你地可唔可以唔好將個問題環繞地球一周之後毫無增值(without any value added)咁俾返香港處理呢?美顏上司就係知廠女S係原作者先問佢啊!」

不是嗎?如果魔術師有呢份文件的話,美顏早就問咗魔術師喇,使鬼問你咩?

第三世界的廠仔就係咁無常識,想也不想就像電話接線咁,按「1」字就搵魔術師。

「聯絡人」呢個職位,應該係「廢人」的同義詞。

更爆的是,「聯絡人」廠仔R同廠長S都話魔術師態度惡劣,要留意用字,好歹廠女S都係一個副經理咁話,仲提供咗一個唔合乎公司保安制度的方法俾魔術師:「你可以咁樣做架嘛!」

當然仲要「施屍」埋俾美顏同頭領N。

同人嘈喇喎,咁美顏梗係話魔術師唔啱喇。

個問題就係,太著重和諧,係會將問題掩蓋的。廠仔爆鑊爆到總部哇哇叫,要總部女頭領N同香港男頭領N決定唔再俾班廠仔做,仲特意指派魔術師去幫班廠仔補鑊,竟然換來一句「你小心講嘢」、「態度惡劣」、同「要尊重佢地」之評。

咁邊個尊重魔術師呢?

魔術師本來唔多服氣,之但係忽3靈光一閃,於是話好喇,同佢地道個歉喇!

咁做好似好聽美顏話咁,識得認下低威,但其實其設個局,睇下美顏識唔識做。

即係好似《恐懼鬥室》中的陷阱一樣,用來測試一下「獵物」的反應。

數小時後,美顏看來無乜反應。

魔術師亦心知肚明,火起上來,電聯美顏,講返頭先件事,最後話:「佢地咁叻咁重要咁要呵護,無腦做錯嘢搞到一鑊粥就大哂,我話下佢地就錯哂,咁你炒我囉!」

自稱「呢個部門大把人叻過魔術師」的美顏「竟然」無言可對,爆鑊要幫手的時候,啲「叻人」唔知去哂邊。

另一個問題來自魔術師自轉組以來從未「正名」,個職銜依然係跟緊妹頭時的樣子,所謂名不正言不順,出師無名,班廠仔唔知魔術師乜頭乜路,梗係俾班廠仔恰。

於是魔術師趁呢個機會逼美顏寫返封信,講明魔術師的職級,其實係高過嗰個所謂「副經理」的廠女S好多,而且做嘅嘢係由兩位頭領特地指派的,「唔好當魔術師流嘅」。

由美顏的反應,唔多唔少都更確認了跟前同事A的共識:1. 呢個部門係當我地班轉組嚟嘅人只係僱傭兵,做完呢個大茶飯project,用完就會掉,唔會同你諗長遠,所以連職位都費事同你搞;2. 廠仔無論幾鑊都好,始終都係「自己人」,魔術師呢類臨時指派的「專員」,當然唔會同班廠仔講仔細喇!

所以呢,都係早走早著!

當然前同事A就更加早著先鞭,提早退休回家享(湊)仔福囉!

2012/11/15 01:09:11 

2012年11月13日 星期二

是日噩耗

公司內部郵址多是以部門名稱為「尾」。年初魔術師轉組,最最開心的就是有機會「必」甩「電車部」呢條尾,仲要懶得戚添!點知...

今日美顏上司同魔術師講,部門又有可能歸返入電車部!

天呀!我唔要做返電車仔呀!

我唔要同妹頭同一個部門呀!

***

點解,有可能係巨無霸幫人做咗嘢,收唔返錢,而電車部嘅收錢制度比較健全掛? 

 

2012年11月12日 星期一

龍尾殺生大行動

全城關注,守護龍尾?點解啲水母會斷手斷腳嘅?究竟係邊個搞成佢地咁架?

 

講乜都係假,香港人的「保育意識」就係:保育好重要,但係細路仔開心就「更重要」!咁我地要俾細路仔要接觸生物吖馬,整死咗「佢都唔想架」!「咁細路仔玩玩吓,整死咗難免,死咗咪再捉過囉」!

話政府建人工海灘會殺死海洋生物,要求「不遷不殺」?殺佢地嘅乜唔係就係呢班「假日忽然關注生態旅行團」咩?所謂「關注」,就係「覺得啲海洋生物好有趣」,即係好似覺得人地個BB好得意,咪走去meet下佢囉!點知啲海洋生物咁易死嘅啫!

如果真係保育,就應該等啲海洋生物靜靜地在那兒生活,「井水不犯河水」。香港人去搞人地,捉來捉去根本就係邪惡行為,佢地口中的「保育」,其實就係「維權」-「維護自己任意妄為,主宰其他弱小生物的權利」而已!

當然,更深層的,就係搵個藉口反政府囉!

***

參考資料:

有線電視 周日不講理 (11 Nov 2012) 龍尾灘發展要叫停? (二)

2012/11/11 23:13:03 

2012年11月11日 星期日

獅子山下精神

由部門極度倚靠第三世界的廠仔工作,但收到的投訴卻愈來愈多,原因很簡單,一來佢地做出來的產品質素低,二來落手落腳做嘢嘅人大多有「語言障礙」,唔識同客戶(即使係內部客戶)溝通,所以要經多一層「傳話人」做溝通工作,結果就係多咗好多出錯嘅機會;三來,唔好話廠仔,就連「傳話人」,甚至係廠長,其溝通技巧和服務憑度都相當也也烏,最大的問題係處處表現出「無心」去暸解客戶所需,甚至乎係「有誠意」對方解決問題的樣子都唔做,作為客戶,見到部門工作層面的同事個個都人急佢唔急咁,唔寫投訴信俾啲高層就有鬼了。

 

如是觀之,香港人仲係有好大的競爭力的,不必妄自菲薄。尤其是,現在機械式、工廠式流水作業之類所謂的「低增值」工業的生存空間其實愈來愈低。你人工平咩?點都平唔過一旦set好程序便可以24小時不停運作、唔會倦唔會出錯的機器,所以汗血工廠的經營模式,魔術師就真係覺得唔會好有前途。依家香港搞到好似低不成高不就咁,所謂無咗「獅子山下」精神,講嘅唔應該係70年代穿膠花嗰隻死拚死捱的「拚博精神」,而係應該保有不亢不卑,只要己力所能及就要做到最好,而唔係吓吓斤斤計較;咁當然,前提就係老闆要「識做」,本着良心對待員工。

現在勞資關係緊張,唔係最低工資,就係最高工時,再唔係就係全民退保,下下將勞資放在對立面;事無大小都講乜權物權,樣樣都要劃清界線定義,灰色地帶愈小,可以靈活變通的空間就愈細,結果就係愈來愈唔鼓勵香港人用腦去做好(正和),反而將注視引導去鑽空子(零和/負和),搞到內耗不斷。

種瓜得瓜,種票得票,當然有人可以話雇主都唔自律,係咁剝削打工仔,我又做乜要同佢講良心,做自己做到最好?無嘢嘅,呢個係個人的選擇。有條件的,當然可以嘆吓世界;無條件卻又要錙銖必較的,就不如「反思」下做返農民耕田會唔會好啲,起碼唔使同廠仔爭囉。

 

2012/11/11 00:42:56 

2012年11月9日 星期五

傻嘅都叻過你

嗱嗱嗱!係咪早就話咗呢?全球化吖嗱!壓抑成本吖嗱!貪未發展地區的人工平吖嗱!係咪衰呢!連總部自己都搞唔掂,搞到成班大帝屌鬼,第三世界同事幾平都係無用,火咪始終都係要靠香港人救!靠嘅咪又係魔術師與及一班同事嘅幫忙!

 

初來部門埗到之時,美顏上司成日都將「大把人叻過你」呢句話掛在口邊,魔術師一向都對自己各方面的「武功」都有返咁上下信心,所以成日都幾想見識吓係咪真係呢度係咪真係咁「叻人雲集」,但最後結果見到的都係成班第三世界的「廠仔」(林亞珍時代拎飯壺返工,謂之工廠妹;「廠仔」就是雄性版),睇死都係上司以為可以用來施下馬威的話語而已。如果「廠仔」都可以叫做「叻」的話,那麼終日深受受劉華「今時今日咁嘅服務態度唔得架喇!」這種意識形態影響的港人,又真係唔知算係咩嘢了。

講來講去,究竟「廠仔」衰乜嘢呢?

1. 文盲 - 寫低的資料,永遠唔睇;但係所謂「規矩」,卻又識得死咕咕咁照跟喎。

2. 腦退化 - 或係個腦從未進化過,叫佢做嘢就「哦哦哦」,好似明哂咁,仲可以好機械式咁重覆一線俾你聽;之但係結果呢,俾10樣嘢佢地做隨時就記得出4樣,而最後就只有1樣嘢做得好。

3. 懶於溝通 - 好喇,做完件事,問客戶接唔接 受(人地見件事都做完,自然唔會再理你),客戶無回應,廠仔就唔會跟進,所以件事就變成「未做完」。

4. Common sense is not common ﹣一係唔講,講親都係廢話;例如,魔:「點解個程式可以俾人訂到『負0.5個蛋榚』架?你有無常識架?」廠:「因為我個程式係咁咁咁寫...」。

魔術師又想起,從前老父工作的工場附近,總有一個自稱係「經濟學家」的瘋漢蹓躂,其成名理論就係:「經濟學的真理,就係『平嘢一定無好』嘞!」

信焉!

2012/11/09 00:11:54

2012年11月7日 星期三

尋人(2nd edition)

魔術師一向最樂於助人,深信為善最樂,福有攸歸,錢財只係身外物,見呢何姓港女遭人奚落,心有不甘;現在公開呼籲,如何小姐不嫌鄙人低俗,唔介意魔術師係個三九唔識七的陌生人,便請將請柬電郵至undefeatablemagician@gmail.com,不用怕被人笑話厚顏無恥,魔術師一向逢請必到,逢到必早,一人食量,兩人禮金又點話!

重覆,魔術師的電郵是undefeatablemagician@gmail.com,何小姐一定要將請柬寄來呀!

Picture

 

至於各方貧友亦都要多加諒解,千萬唔好誤解何港女係缺錢之人,又或者係借錢結婚結大咗,所以下下計得咁盡。皆因等錢使之人,不嬲都係多多益善,少少無拘,八百最好,五百都照殺,無理由如此趕客。人以群分,物以類聚,對何港女來說,可能佢嘅生活圈子中的朋友,日常食自助餐的機會真係唔多,現在何港女有機會帶挈眾貧友進出五星級酒店,出入有門僮開門,眾人理應感激才是。貧友們切勿多疑,何港女絕對不是貪錢或睇唔起人,況且香港地,應該唔會有後生仔因為俾幾百蚊禮金出去就會造成經濟困難,相信何港女都係只係想個婚禮可以搞得體面啲而已;所以記住記住記住,粗粗地男嘅都要著返套D&G,女嘅起碼都要agnès b.囉!

Picture

魔術師好明白嘅。貧友們,說到底,有個童話式婚禮係所有港女的願望,俾你面請得你嚟,當然唔係食餐飯,敬個假酒,影張相就完事。你要記住,你依家有得睇人地嘅成長過程、浪漫相識拍拖、接新娘等喜慶事,又有真人騷睇、甚至係走音星光大道之類的環節,仲有唔見咗隻豬的乳豬食,最最最後仲有新娘子親手選擇的騎呢回禮,試問你又點好意思只係俾五百呢?

即係好似人地江湖賣藝咁,耍完功夫打個賞,買樽藥,當然你可以話「多少都係心意啫」,無問題嘅,過到自己嗰關咪得囉!

 

2012/11/07 00:10:07 

2012年11月6日 星期二

魔術師狗股基金-思捷環球(330)

思捷係狗股基金中的一員,根據規則,一定要供(無論是匯控(0005)也好,思捷也好,一於照供如儀),咁即係要點入帳呢?

思捷於2012年10月29日除權。除權前收市價為$10.48,2供1,即除權前2股共$20.96,再加上新股供股價$8,共$28.96就等於3股新股,每股新股股價為$28.96/3=$9.653,為10月30日除權後股價,每股調整為$0.827。2股舊股得1新股,每股權的價值就是$1.654。現假設持有10,000股思捷,供股需要再投入$40,000,入帳如下:

Picture

以今日(2012年11月5日)為例,除權後股價為$10.88,已升穿除權前收市價,減去供股價$8,供股權合理價值為$10.88-$8=$2.88,大升74%。

2012/11/06 00:50:40 

搞乜鬼辣椒雜作

早前政府為「冷卻樓市」,加強額外印花稅,又大搞閉關鎖港的「海外買家印花稅(BSD)」,把加重交易成本,減低交投量當成是「壓抑樓市」措施,以減低成交量「變相」壓抑價格,實在難以令人理解。觀乎股票市場,成交低會拉闊買賣差價,有價無市之下多會呈乾升乾跌,升跌因素除大圍經濟情況外,就要數到該股票本身的實力,實力股進可攻退可守,老千股波動自然較大,

Picture

正如眾多評論所說,政府的所謂「辣招」,其實只係壓抑投資需求,最急切的用家,例如成家立室(又或者係離婚),生兒育女令本身間屋「唔夠住」,呢啲需求係阻截唔到嘅。要限制的是投資需要,例如買樓收租(租約通常係兩年期,依家額外印花稅延長至三年,已經大大增加了風險,加上非自住樓宇最高只可做5成按揭,亦大大加重了買樓收租的成本)、或者得閒無聊換吓樓的優皮人士,當然短線炒家(仲有幾多?)先係主要打擊對象。呢類人多數唔需要為自住樓煩惱,唔買樓投資或者換樓唔會死,壓抑到幾多需求就真係天曉得。

以供應面來說,現在持貨的二手樓業主,心理上會覺得自己現有層不受額外印花稅影響的物業隨時「賣咗就買唔返」,變得更加惜售,貨源減少之下,最大的出貨者反而變成是「非散貨不可」的發展商和實力不足需要套現周轉(因50%按揭關係,投資者要將售轉租會得較難)的投資者了。

 Picture

***

講來講去,似乎真無乜人會睇好政府呢啲所謂「辣招」:

Picture

估唔到竟然有個叫「兒童區議員」的組織!樓市呢個題目,對佢地來說會唔會太過深呀?

 Picture

明明台上講者已經講咗佢問嘅問題,呢位謝小燕同學(舊時王謝堂前燕,飛入尋常百姓家?)又依書讀一次,搞到主持人都忍唔住話佢。以前劉金龍都算係屯門元朗區的「名校」,估唔到依家搞成咁。

 Picture

呢位青年人,又係「反思一族」,反來反去都唔知思咗啲乜出來,反思完又得出個甚麼結論來呢?佢地除咗要求其他人做嘢之外,佢地自己又會點做呢?只係叫人買樓自己想要住咩嘢樓,而唔係以投資角度去睇嗎?人地點解要聽佢地講?

對於佢嘅問題,答案其實好簡單,完全無需要去「反思」:香港人要住咩嘢樓,就係人愈(偽)豪愈好,因為香港人其實係一個非常之重視階級觀念的「民族」,而最容易分辨一個人的社會階層的方法,就係睇佢住咩嘢區咩嘢樓,例如港島半山就係藍血族,天水圍將軍澳就係次等人之類。

***

有線電視 周日不講理(4 Nov 2012) 樓市辣招治標不治本 (一)

 Picture

 

有線電視 周日不講理(4 Nov 2012) 樓市辣招治標不治本 (二)

 Picture

至於呢個慢必在節目中的發言,真係令人懷疑佢究竟係讀咩嘢書嘅!竟然會話:

1. 「買咗樓之後唔只做樓奴,仲要做『老闆奴』,因為老闆會睇死你會俾層樓牽制住,所以減你人工你都無得反抗」

係咩?你係叻仔嘅,愈轉工只會愈加人工,老闆只會驚留唔住你。講到自己好似毫無競爭力,只可能得一個老闆聘用自己,一轉工就少咗一半人工,唔話佢係同樓上城市論壇的反思青年(aka 廢青)思想一樣都唔得。

2. 「買咗樓三年之後先準賣,後生仔唔容易確保個位可以坐三年」

係三年之內賣要交稅,唔係唔準賣,仲要係只要持有超過一年,在第二至第三年賣出稅率已降至10%,而且係買賣方共同承擔,除非慢必口中的「年青人」自願食哂,否則最多都係50/50吧?又,如果工作如此不穩定,三年嘅事都講唔埋的話,呢個人又是否是一個「適合」供樓的人呢?抑或依家的所謂「後生仔」都係搵朝唔得晚,一失業就永遠搵唔返另一份工嘅廢青呢?如果係的話,政府又是否需要廢青們的「置業需求」呢?

3. 「唔使供樓真係好輕鬆,可以唔使俾份工綁住,隨時做乜都得,掉低辭職信走去出家又得,去修行又得」

佢呢種「財務自由」的思想真係非常前衛,不過魔術師就唔知佢唔供樓而去租樓住,點都要交租架?咁「唔俾份工綁住」又點會有收入交租呢?魔術師同意「唔使供樓真係好輕鬆」,不過係「供完層樓所以唔使供」囉!同埋,魔術師亦唔知道有幾多年青人真係咁嚮往走去出家修行咁超塵脫俗嘞!

睇見呢個慢必講埋啲咁反智嘅論點仲要理直氣壯,魔術師俾佢嘅評語就只有「不學無術」四個字,難為仲有咁多選民buy佢!相反,施老闆講嘅嘢就有point好多嘞!

***

伸延閱讀:

政府打擊樓市炒風對7類人的影響

***

參考資料:

信報 2012年10月27日

政府重手遏炒風 樓市成交料急凍

政府連番施壓,樓價升勢未見有放緩迹象,加上美國量寬措施(QE3)來勢洶洶,政府決定在未有顯著資金流入前先行進行需求管理,宣布延長額外印花稅(SSD)至三年,並將稅率增至最高二成,以及針對公司名義和非本港永久居民以個人名義的住宅物業交易,徵收額外一成半買家印花稅(BSD)。業界指出,新措施力度屬近期最大,預計成交量將即時急凍。

新政府上場後樓價升勢不止,中原地產最新公布的中原城市領先指數(CCL)顯示,樓價指數連續五周創歷史新高,自七月初升近百分之八。分區樓價四區大型屋苑樓價全面上升,其中九龍及新界東逐漸逼近一九九七年高位,兩者較當年高峰僅分別低零點四二點及一點五三。

徵收外地買家印花稅

有見樓價升勢與經濟狀況背道而馳,財政司司長曾俊華在昨午六時許公布推出兩項樓市措施,包括推出SSD加強版,將其適用期由二年延長至三年,並將稅率由百分之五至十五,增加至一成至二成,其中半年內轉手稅率為二成,半年至一年為成半,一年至三年則為一成。

政府同時宣布實施買家印花稅,除本地永久性居民外,境外人士以個人名義,或任何人士以公司名義購買物業均須繳交,且買家繳交BSD後,仍會受SSD規範。政府表示,措施由今日凌晨起實施,故昨日或以前簽訂買賣合約的成交,只受舊的SSD規管。

買家印花稅將設豁免條款,如因強拍而需要成交的單位可獲豁免,至於本港永久居民與非本港永久居民的近親聯名購入物業,也可豁免繳交BSD。

曾俊華指出,政府沒有一顆子彈處理所有問題,強調兩年前推出的SSD,有效遏抑短期炒賣活動,相信將SSD適用期延長等屬有效。政府強調,兩項新措施令一年內獲利的成本大幅增加,政府在落實措施前並已考慮海外推出的BSD等措施,相信做法合適和合理,當局並計劃明年初提交立法會修例時,以附屬法例形式引入調節機制,令稅項的稅率和年期等較有彈性,加快對市場的反應。

過往部分投資者為避免支付SSD,以更換公司股份轉讓的形式成交物業,曾俊華強調,政府知悉此類情況,認為只佔少數,已要求稅局留意這類操作,有需要時會加強這類措施。發展局局長陳茂波指出,倘買家未來以公司名義購買物業,最少須支付買家印花稅,某程度可針對情況。

政府發言人補充,此類個案每年只佔總樓市成交約百分之零點一,並指出買家由於需要承受公司全部債項等,有一定的風險。

政府指出,今年購買一手樓花的買家中,百分之十九點五屬非本港身份證持有人,市場相信新措施會令未來一手市場受影響。地產建設商會執委會主席梁志堅擔心,是次政府落藥太重,認為長遠對樓市有影響。

近日有新盤推出的華懋售樓部經理吳崇武則認為,政府出招毋須過急,出招太頻對於發展商而言可謂無所適從。正推售愉景灣新盤的香港興業(480)香港業務總監陳子明則認為,新招對一手及二手市場均有影響,買家短期內將持觀望態度,惟相信發展商未來可透過付款辦法及優惠以吸引一手買家,故相信新招對買家心理影響較大。

有業內人士表示,本港五千萬元以上交投,佔大部分買家為內地客,政府加入成半BSD,令「八算」人民幣「折扣優勢」完全盡失,相信將嚴重打擊此類大碼樓成交。

對於是次政府推出二招,城市大學建築科技學部高級講師潘永祥認為,措施短期內對買家有心理影響,料樓價有機會跌一成,至於外地買家在雙重打擊下,將對本港物業市場卻步。

不過,經濟學家關焯照則指出,政府出招壓抑需求,但也間接令供應減少,料未來一至兩周市場氣氛將轉淡,惟市場消化消息後,買家仍會繼續入市,惟未來二至三年市場上單位流轉量將進一步減少。他認為,在供應量減低下樓價將被推高,當中中小型單位影響較大,他認為政府應針對供應出招,同時不應再延長額外印花稅安排。

2012/11/05 20:21:12 

2012年11月5日 星期一

《活埋(Buried)》:「我係美國人」的噩夢

跟《127小時(127 Hours)》一樣,本片都只是主角一人的獨腳戲,但本片去得更徹底,因為《127小時》還有其他演員和大陝谷的風光,而本片的背景卻只是一具由幾塊木板搭成,伸手不見五指的棺材,連燈光都可以慳返!其他跟主角亙動的角色,絕大部份也只是聲演,只有女同事一角是以短片形式呈現,成本低到無朋友。不過成本低還低,劇情推進還是很緊湊,也不乏一些「警世」畫面,雖然DVD封面「嚇得連希治閣也跳出棺材」未免失實(本片是緊湊張力夠,而並非驚嚇片),但瑕不掩瑜,論劇情則是遠勝《127小時》了。

Picture

話又說回來,本片本來是2010年的「舊片」,在香港卻是在本年年頭才上畫,發行商如此「糟蹋」好片,真真奇怪。

 

(以下內容包含本片劇情,敬請留意。)

本片一開首,就是被綁起來的主角從昏迷中醒來的混亂狀況(片頭黑色一分鐘只聞呼吸聲的「劇情」,很有《標殺令2(Kill Bill 2)》的意味)。好容易給自己鬆了綁,發現竟然還有打火機、黑莓手機、和鉛筆「傍身」:

Picture

編劇和導演很有講故事的技巧,觀眾只消一看手機畫面,便大概可以猜到主角身在何方了:

Picture

會用長途電話打911的,主角當然就是「美國人」了:

Picture

911的接線生跟全世界所有的接線生一樣,都是「你急佢唔急」,IQ接近「+01」。問致電人姓名、所在位置等還情有可原,但主角已話自已被困在棺材內,接線生卻假設主角是「自行爬進棺材內」,而不是問「你為什麼會被困在棺材內」,那不是廢話麼?

Picture

從對話中,知道主角不是甚麼超級英雄或特務007,而只是一名在伊拉克上班的貨車司機,是個合約員工,被恐怖份子襲擊後,就被活埋了。最「自豪」的,恐怕就是「我係美國人」呢個身份吧(不知道某些自稱自己「唔係中國人」的「中國人」,在外國遇到意外時會向誰求助?):

Picture

轉去找FBI吧?接線生又要求主角「明確指出」哪一個城市的FBI辦公室才可以接駁。這樣的不肯變通的官僚白痴,各位都很感同身受吧?

Picture

講來講去不得要領,只好找老婆,但又打來打去接不上,通通去了留言信箱:

Picture

打了N通電話,終於找到了公司人事部負責人和美方拯救專員,結果都是給忽悠了。。主角想想這時不如先找朋友,看看她知不知道老婆在哪裡,誰知卻又遇到個「美藉港女」;按道理聽主角的語氣和說話內容就知他是處於生死一線的緊急狀態,但「美藉港女」卻依然堅持對方要好聲好氣的去求她。在生死關頭,還有這些渾人給你夾纏不清,真係EQ低啲都會爆血管:

Picture

美方當然不想事情鬧大,也不會跟恐怖份子談判,一介平民的生命又算是甚麼呢?

Picture

這時「恐怖份子」打來了,在他們眼中「美國人」跟「士兵」是可以劃上等號的(這時候就算主角自稱自己係拿「中國護照」的「中藉美佬」都沒有用吧?),要命的就用錢來換。不過「恐怖份子」還是頗有性格的,他們絕不承認自己是「恐怖份子」,只是美帝為了報復「911事件」瘋狂轟炸伊拉克,導致他家破人亡,走投無路罷了:

Picture

諷刺的是,「恐怖份子」也是很「與時並進」的,要威脅美國政府,最好就是將事情鬧大,方法是主角拍好綁架短片,再上載到Youtube,連講稿都給他寫好了:

Picture

拯救專員為了阻止主角拍片,只好安撫主角,救援就快來了,還舉出「成功」案例:

Picture

主角不是甚麼英雄人物,在「恐怖份子」的要脅下,還是拍了綁架短片。事情演變成國際性事件,公司人事部急急打來,聲明一早就炒了主角魷魚,甚麼退休金、保險全都不用上身。原來民主美國並非天堂,也有無良雇主的:

Picture

時間愈來愈緊逼,主角心想獲救無望,只好打給患了腦退化,在護老院中養病的母親告別,可以見得他也是孝順仔一名。這時主角老婆打來了,原來是忘了帶手機出街,又是港女式懶可愛的大頭蝦作風,跟主角完全是兩個世界的人吧?

Picture

更頂癮的是,主角老婆明知丈夫時間無多,還要不停的「我愛你」的說個不停,講足成分鐘(這些應該留返拜山先講喇!),不停地浪費他的手機電源,也真的只有「美國人」才做得出:

Picture

整個故事中,最奇蹟的是應該就是黑莓手機的電池竟然出乎意料地耐用,應該算是罝入式廣告吧;反而是「我係美國人」呢個身份,也不見得很韾香,也不知算不算是「反美」了。至於結局,魔術師就不說了,只能說是反映了美國佬做事一貫烏龍、「拿西」、「烏Sir Sir」、唔認真的作風吧!

***

伸延閱讀:

127小時:為自己的愚蠢付出代價

2012/11/04 16:24:06 

2012年11月3日 星期六

Как сердится молодежь была смягчена


《憤青是怎樣煉成的》(俄文:Как сердится молодежь была смягчена)是康港作家丹尼·陳所著的一部長篇小說,於2015年寫成。
作者丹尼·陳是一個康港藍軍中的掌旗使,在2012年秋在獨立戰爭中的一場戰鬥中負重傷,33歲時全身癱瘓,34歲時雙目失明、下體硬化。但他的毅力驚人,憑着口述請人紀錄寫成這部基於本人故事的小說。
小說寫成後被出版社多次退稿,後經朋友們的努力在《龍獅自治軍》雜誌上從2024年到2025年分11期連載發表。小說受到評論界的冷遇,但得到了廣大讀者的追捧。2026年馬田·黃在康港《真理報》上發表介紹丹尼的報道,造成全國轟動。同年10月,丹尼被授予國家級最高榮譽肥佬勳章。在之後的兩年中小說被用各種語言重印重版了五十次。

2012年11月1日 星期四

城市論壇論港獨(2012年10月28日)(2nd edition)

嘩,真係前所未有嘅大混戰!

Picture

魔術師唔認同陳先生。因為以字面上嚟講,「我係香港人,唔係中國人」呢句,唔同一般人話「我係北京人」、「我係上海人」、又或者「我係香港人,又係巴基斯坦人」,前兩者並無「唔係中國人」接尾,而後者則是在說自己對社區的歸屬感和本來的種族血緣。起碼表面上,陳先生擁有中華血統,講呢句「我係香港人,唔係中國人」,令人理解成香港與中國是在同一層次的對立面毫不希奇;而且中國係國家,以「蘋果對蘋果」的對比法,呢句嘅句式就應該解讀成「我係B國人,唔係C國人」,只有將香港當成係國家先可以講得通,將其理解為「捍衛一國兩制」未免太牽強了。

仲有就係,陳梓進持有特區護照,其實即係承認咗自己係中國人,去到外國有事可要求中國領事館提供「保護」,有法理依據,就算係劉夢熊都唔會有權取消陳梓進國籍,要取消的話,就請陳先生自行取消,都唔知係度叫陣懶叻做乜。(2nd edition) 

如果只要捍衛一國兩制,咁就要定義吓點樣先至係「高度自治」了,CEPA和其他惠港措施算唔算係干預呢?其實香港人都可以say no,反正資本主義的精髓就是business is business,所以自由行就應當是普通他國人旅行入境,東江水依需求買,上市費依行規收,甚至係解放軍,都可以將其當成是「僱傭兵」,俾返中央軍費咪得囉。總之樣樣數還數路還路,均均真真,就無問題。

諗諗下,呢種所謂「城邦自治」,香港是中國附庸但又有自治權,跟周天子分封諸侯有什麼分別呢?

Picture

但係魔術師亦唔認同熊人大哥之言,港獨並唔係咩嘢喪心病狂之事。無論係老共、老孫、多爾袞、定係朱元璋成吉思汗趙匡胤李淵父子等,江山都係打返來,搞革命不嬲都會被當權者定性為「喪心病狂」,但係只要打贏咗,天下就係革命者的了,到時成王敗寇,吊民伐罪,解民倒懸的正義之師就是自己了。

要香港人搞武裝革命並不可能,但係搞「軟性革命」,即係在不犯法的情況下,圍堵政府,用各種手段癱瘓政府運作,逼使政府讓步,還是做得到的。情況有點像黑社會要收保護費,卻不是用恐嚇縱火來要脅,而係坐滿茶餐廳座位,總之就係霸住個位唔走等你做唔到生意一樣。而事實上,咁樣做,係有一定成效嘅。最終目的就係搞到香港在中央眼中成為「難治之地」,乞人憎到逼中央放棄香港(有如新加坡獨立),咁就求仁得仁了,呢一點魔術師早有論述。

Picture 

熊人大哥又話「港英龍獅旗」、「中國人滾回中國去」、「南京條約萬歲」等等係港獨,魔術師覺得係有呢個暗示(當然政治暗示呢樣嘢,非常主觀)。不過即使善意地想,都係班細路仔反叛,明知老共唔鍾意,偏就係拎出嚟激下佢地。係就係可以咁諗,但其實佢地係玩緊火,一步一步推進,潛移默化(即係「洗腦」)之下,港獨思想就會開始萌芽,而佢地其實係咪真係為搞港獨有心理準備呢?相當存疑。

Picture

史文鴻的論調其實都係一貫的理性務實口吻,以和為貴,本來就應該係咁做;之但係,依家香港人都係感性情緒行先,佢自己都有講,傳媒梗係要挑撥離間先有新聞好睇,理性思考、講道理就沒有市場了。

Picture 

所以魔術師係同樣唔認同劉夫子,現在傳媒(例如毒果)以借監察政府為名,卻是濫用第四權為實,煽風點火,小事化大,唯恐天下不亂。劉銳紹又認為香港無獨立的客觀條件,但係唔好唔記得,依家反中的大部份都係年輕人,而佢地係唔介意搵唔到錢的,甚至乎做返農民都無所謂,將來香港係會由這一班人帶領的;呢一種浪漫思想,正正就是「明知不可為而為之」的基礎,客觀條件係點差都唔係要點,而且正如魔術師之前所說,香港人無可能搞武裝革命,反而搞「軟性革命」卻有可能成功。

 Picture

最後另外還有一位嘉賓,不過魔術師就不予作任何評論了。

***

話時話,年前魔術師跟眾同事到偏遠地區食飯,迎面有一約三、四歲的小女孩行過,只聽見佢忽然間大叫:「我唔係中國人!」嚇得旁邊的老人(應是爺爺吧?)慌了手腳,唔知點解個孫忽然會咁叫法。魔術師與眾同事相視而嘻,個細路得嗰三、四歲,究竟係邊個教佢講啲咁嘢架?

***

伸延閱讀:

神喻(一)

2012/11/01 00:53:56