爽歪歪摩洛哥（一）之準備篇

本來幾個月前問過靚姐姐，佢話年尾唔得閒唔會去旅去，於是魔術師便同公司預咗年尾清假；點知上個月靚姐姐就問魔術師仲有幾多日大假，夾定年尾去旅行，睇嚟我城的經濟活動真係死水一潭，生意淡薄（其時尚未發生大火，火災之後，節日慶祝更為低調，生意更難做）。

本來靚姐姐諗住話去土耳其，同魔術師一齊報團懶得諗（魔術師有啲驚旅行社安排的酒店食宿未必啱佢口味），但去到旅行社，卻發現去摩洛哥好似更吸引（當然團費都貴一截）：

（摩洛哥團費2025年12月底出發約HKD37,000）

由於公司啲 IT project 趕年尾定 scope，旅行社於常日下午開的茶會魔術師就無法出席了，由靚姐姐做代表去聽 talk：帶返來的重點就係要提供旅遊保險資料，沙漠夜間溫度可可達0-10度，所以要帶冷帽頸巾羽絨，仲要帶鞋套以免對鞋入沙。

旅行社真係幾細心，要魔術師提供埋旅遊保險資料：

於是魔術師就簡簡單單經維基TV Mall 買旅遊保，只要幫襯買100蚊嘢，仲有半價優惠添。

雖然旅行社有提供10G電話卡，魔術師都自備咗 AirSim 卡，只備不時之需：

對魔術師來說最大的「挑戰」就係帶11日衣服，真係非常重。魔術師問阿領隊姐姐（唔知傻笑劍后會唔會考導遊牌）當地酒店有無提供洗衫服務，如果有得洗衫就可以帶少幾件；領隊姐姐話中途有酒店是住兩晚的，可以洗衫，其餘都是住一晚（其實魔術師睇章程都知，係唔肯定酒店收衫洗衫的 cutoff time）。魔術師係最唔鍾意呢類每間酒店住一晚，趕頭趕命的行程，儘量避得就避。

點都好，結果魔術師都帶咗11日衫（雖然「落地」只有10日，都要帶啲 spare 衣物），又買埋羽絨（魔術師平時唔着羽絨的，返工都係 Mark 哥大褸，靚姐姐就介紹魔術師去 AIGLE 買，咁就幾千，原來羽絨咁貴的），總之就係勁重。

12月22日凌晨機，21日晚上9點半就要集合了。希望今次旅程順利，團友們唔好古古怪怪喇！

(上機前食啲嘢先啦)

＊＊＊

伸延閱讀：

（土耳其團費2025年12月底出發約HKD27,000）