正所謂「怕老婆會發達」，今次案例老公豬將間屋嘅 design 就哂老婆大人，所以老婆亦唔介意搵個嬌嬌切雞C來整色整水（00：12 - 9：46）？
家家有求｜幾十萬輕奢弧線燈光 才貌雙全變形傢俬 結構天然雲石 2024年10月14日
28Hse 特約：家家有求 - 2024年第41集
以金屬配搭弧線建構出設計感，營造簡約輕奢奶油風。日系變形傢俬耐用也耐看，適合窩居多功能運用。認識天然雲石，分辨質素高低。
880萬將軍澳中心三房單位，戶主夫婦兩人住。女戶主喜歡「奶油風」，於是嬌嬌切雞C就「打造」了「輕奢奶油風」設計：
嬌嬌切雞C解釋話「奶油風」係以淺色為主（左上），為了唔好太單一，就加返啲金屬同埋弧形線條（右上、左中），加埋特色牆、燈槽、仲有特別挑選嘅壁燈同埋氛圍燈(魔術師分唔到邊盞燈打邊盞燈)等懶有型設計（右中、左下）。嬌嬌切雞C亦唔放過個廳嘅窗台，加多個坐墊（右下），但坐得多爛咗就唔知點配返：
單位原則三房，嬌嬌切雞C將主人房同客房打通，造咗一個附設玻璃趟門的大衣櫃（左上、右上），衣櫃有一無遮無掩的「懶人空格」俾戶主掛常用衣物（左中），衣櫃旁又有展示櫃（右中）。床尾矮櫃係飾物櫃（左下），而睡床就放在地台上，另一幅牆身亦有儲物櫃，增加收納空間（右下）：
嬌嬌切雞C將全屋唯一的次所改成套次（左上，好在無話戶主喜歡招呼朋友，否則去個次所都麻鬼煩）。次所用深色系，但又用雲石，唔怕抗污力低（右上）。次所內有唔夠位企喺度扑嘢嘅迷你企缸（左下），同埋可以玩「鴛鴦汽水」的「鄉下式」浸缸（右下）。
書房位於客廳隱藏門後（左上），附有窗台書枱、展示櫃、和衣櫃等（右上、左中）。廚房用玻璃趟門（右中，唔知合唔合防火規格？），除了上下廚櫃之外，工作枱面有大 sink 盤，仲有疑似係外置洗碗碟機（左下），空間唔多。最後就係無講到、只有一個 shot 的玄關和飯廳（右下）。
＊＊＊
精華版如下：
完全版如下：
//「奶油風」係以淺色為主
回覆刪除硬喺覺得呢啲色同診所老人院差唔多
//燈槽、仲有特別挑選嘅壁燈同埋氛圍燈
少咗亂打牆，就唯有搞呢啲燈嚟賺嗰八萬
//嘅窗台，加多個坐墊（右下）
潮濕時啲水氣就索晒入去，好快就霉, 自己是但買啲咕𠱸起碼可以洗
//嬌嬌切雞C將主人房同客房打通，造咗一個附設玻璃趟門的大衣櫃
唔明點解要打牆，原本嘅房擺衫都得啦。真喺為咗慳個牆位去整嗰矮櫃？而家攪到早起身嗰個想搵下啲嘢就會整醒仲喺瞓緊覺嗰個。
//而睡床就放在地台上
上上落落，喺一個PK嘅陷阱
//呢啲色同診所老人院差唔多
刪除太白又唔好，好似去咗醫院咁。
//潮濕時啲水氣就索晒入去，好快就霉, 自己是但買啲咕𠱸起碼可以洗
成個窗台咁大好難 fit 啱位。
//慳個牆位去整嗰矮櫃
傷巷啲設計，慳位變成賣點
//上上落落，喺一個PK嘅陷阱
除非開床頭燈可以順便開埋地台滲燈喇！