2017年5月17日 星期三

親子大哂屋

住得駿景園,搞裝潢搞成咁,都咪話港豬跟蝗民都係一擔擔:人傻錢又多(35:18-45:52)!
樓盤傳真 2017/04/29 2017/04/29 23:09

連沙頭角開價都過萬蚊呎,遠展推出又密又細的尚澄,生活配套及交通並不完善。 
相比之下,市區豪宅區開價一萬三千元呎更合理。九龍城格蘭大廈一千二百呎單位,業主開價一千七百萬元,每呎一萬三千元。
元朗 GRAND YOHO 一期入伙,部份單位有噪音問題,靠活動窗柄應對梗窗要求,但較易失寧,成為最易失分項目。
駿景園單位,拉直鑽石廳形成長走廊,設計以黑板作為走廊門、又將長走廊一邊改為攀石牆,為半歲嬰兒做足親子活動準備。
毆景園低層,馬場景剛巧被前方建築物檔住,僅僅望到少少馬場,風水差一截(左上、右上)。單位有971呎,只有屋主夫婦、半歲BB、和工人姐姐住,應該甚為寬敞,但鑽石型廳三尖八角,反而造成浪費(左中)。兩公婆當正粒港孩係金叵籮,成個世界都圍住粒豆釘住,要搞到間屋變冒險樂團,又係極度令魔術師頂唔順的慣常要求;更離奇的是裝潢要求係要帶來「溫暖的家」的感覺...大佬,你唔係裝潢酒店房,係裝潢緊屋企,梗係會有「家的感覺」喇(右中、左下、右下)!

原則廳、工人房、廚房都係鑽石型(左上),設計師例牌以三角型電視櫃拉真客廳,同時又拆去工人房牆壁,以櫃分隔,作為電視櫃的伸延(右上)。實景睇返,工人房相當寬敞(左下),希望屋主唔好好似鎢絲 sir 咁要工人姐姐訓太空艙就好(見《人均百呎擠迫戶》),而電視櫃背空間大到好似間儲物房咁(右下);

鑽石型廚房變開放式,廚櫃係由扶桑訂製(度尺度得咁準?),內藏大量精密機關可供禁室培慾增加收納空間。不過此廚櫃話哂都整咗成29萬,作為「鎮屋之寶」唔係咁易俾電視台拍攝到:

露台用趟摺門,可以推埋一邊,可以不阻視線觀賞小量馬場景致,不過開關時就要小心夾親手(左上、右上)。電視櫃及其延伸都係好鬼老土的抽屜,同埋一格格好似格仔鋪咁用來放唔等使嘢,打開露台門特別惹塵,抹到抹餐死(左中、右中)。廳同房之間的走廊以趟門分隔,趟門可以遮一遮個格仔鋪,同時又係黑板可以為怪獸嘉獎跟六個月BB一早預備操練BCA(左下);不過粉筆同粉刷可以擺係邊呢?電視櫃的櫃桶內?擦黑板又會唔會好大塵?阿B係黑板前畫緊公仔,如果走廊後有人出入,一拉門,阿B豈非即時PK?點都好,都唔夠行入走廊呢幅攀石牆咁驚嚇(右下)。呢啲人工石凹凸不平,赤腳踩上去會「朗親」,着住鞋踩上去咩?成幅牆都係腳印都似。而且阿B得六個月大,幾時得到可以同爸爸一齊攀石?抑或呢幅牆只係無嗰樣整嗰樣,假借親子名義,實質標奇立異?

記者話為咗阿B,客廳電視三角櫃甚至工人房都可以用來放玩具;既然如此,屋主夫的主人房又做滿櫃去裝自己嘢(左上)。最令魔術師估唔到的是,毆景園差唔多一千呎的偽豪宅,主人房竟然係近望樓景,要「三點不動一點動」地「做運動」都一樣要落簾(右上);咁講游小三都唔使咁唔開心。主人廁又係玩日式浴室,個浴缸鬼死咁高要「大步檻過」先行到入去;但比攀石牆更頂癮的是牆壁係由「突點階磚」鋪成,可以用來擦背云云...(左中)點擦?成個人將背脊貼埋牆,上下上下挨身挨勢咁磨?個動作都幾核突...仲有兩間客房,一間係BB房(右中),一間係書房(左下),仲裝潢緊;而客廁就鋪上花紋陶瓷,做為阿B的專用浴室...唉,親子,真係大哂架!

18 則留言:

  1. 睇完呢D單位真係只可以講一句,凡事太盡都會變得on9...

    回覆刪除
    回覆
    1. 除咗個廚櫃,其實成個裝潢「只係」用咗71萬, 如果肯落重啲本, 肯定會仲ON9.

      刪除
  2. 個浴江好有風味....
    好似番番60年代....

    回覆刪除
    回覆
    1. 我得似古裝片(紅樓夢?)用個木桶沖涼咁.

      刪除
  3. 正宗攀石牆通常都系用毛胚水泥牆,就系為咗俾你亂咁踩,油到咁白做乜?

    反而個浴缸用料就似毛胚水泥...

    回覆刪除
    回覆
    1. //正宗攀石牆

      正乜鬼宗吖!呢幅牆只能好似隻觸咁打橫爬...

      //反而個浴缸用料就似毛胚水泥...

      係啲瓦仔似水泥啫.

      刪除
  4. 咁多凹凹凸凸嘅嘢,真喺洗死嗰工人姐姐。

    //同時又拆去工人房牆壁,以櫃分隔
    其實可唔可以唔拆牆,喺前面做返嗰櫃呢。當然就冇得收多啲拆牆費。

    最頂唔順又喺啲figure,唔夠空間就丟咗佢啦。

    //鑽石型廚房變開放式,
    細路咁細小心爬/走入廚房。。

    回覆刪除
    回覆
    1. //咁多凹凹凸凸嘅嘢,真喺洗死嗰工人姐姐。

      基本上係用啲凹凸嘢加大房間面積。

      //其實可唔可以唔拆牆,喺前面做返嗰櫃呢。當然就冇得收多啲拆牆費。

      藉口係以櫃代牆,可以節省空間。

      //最頂唔順又喺啲figure,唔夠空間就丟咗佢啦。

      我真係唔知道點解咁多kidult會咁鐘意玩 figure

      //細路咁細小心爬/走入廚房。。

      收漏咗玻璃趟門錢!

      刪除
    2. //基本上係用啲凹凸嘢加大房間面積。

      heat sink咩?! XD

      刪除
    3. //最頂唔順又喺啲figure,唔夠空間就丟咗佢啦。
      //我真係唔知道點解咁多kidult會咁鐘意玩 figure

      我明,心理補償。
      細個冇乜機會玩靚玩具,大個有能力咪買返夠本。重點仲要唔係攞嚟玩,係「我要有」

      我第一份糧俾咗家用後都衝去買PS4,真失禮。

      刪除
    4. //heat sink咩?! XD

      依家 head sink 好失禮你咩? 大腦皮層同大腸都係一樣咋!

      //細個冇乜機會玩靚玩具,大個有能力咪買返夠本。重點仲要唔係攞嚟玩,係「我要有」

      係扮哂自己有luxury去做kidult.

      //我第一份糧俾咗家用後都衝去買PS4,真失禮。

      第一份糧,我好似只係俾多一份父母, 其餘拎去儲.

      刪除
    5. //我真係唔知道點解咁多kidult會咁鐘意玩 figure
      //我明,心理補償。細個冇乜機會玩靚玩具,大個有能力咪買返夠本。重點仲要唔係攞嚟玩,係「我要有」

      我都係figure (同模型)迷. 細個冇銭買可能係部分原因,但最主要係覺得靚,同想搵個睇書寫野以外又叫做玩得起嘅Hobby比自己.其實figures冇乜得點玩,擺設而已(模型就多野攪好多). 另,屋主呢類figures我就唔太識欣賞,我玩日糸機械人的.

      //第一份糧,我好似只係俾多一份父母, 其餘拎去儲.

      哈,我都係.不過其實扣埋洗費都冇乜得儲了.

      刪除
    6. //但最主要係覺得靚
      //其實figures冇乜得點玩,擺設而已(模型就多野攪好多). 另,屋主呢類figures我就唔太識欣賞,我玩日糸機械人的.

      我好怕擺設擺出嚟會封哂塵, 成日抹又玩死自己...

      刪除
  5. // 點都好,都唔夠行入走廊呢幅攀石牆咁驚嚇

    近年台灣興起形家風水, 其中一樣要避開既煞就係生物格. 即係一舊舊凸出黎既野對住自己. 剋應就係生 cancer.

    一般都係外巒影響, 只可擋. 呢幅攀石牆就係等如自制生物格, 仲要嚮走廊行出行入, 日日對住......

    回覆刪除
    回覆
    1. 我就唔係咁識呆胞的時興玩意,亦唔知形家風水、生物格等論斷法的依據。
      就咁以五行睇,「石粒」都唔算尖銳,我就唔當佢係金同火,只當係土,咁就視乎佢間屋的飛星中宮是否欠土了;不過驟眼望去,一粒粒「石」放在走廊側,我覺得似入咗墓塚多啲囉。

      刪除
    2. 走廊整到咁, 一個唔覺意大小細路撞埋去都幾係野

      刪除
  6. 風水我唔識睇, 但走廊咁多突出物, 一個唔覺意大小細路撞埋去都幾係野

    回覆刪除
    回覆
    1. 何只細路?大人唔小心挨埋牆一定會「朗」親!

      刪除