可能由於魔術師係獨子的關係，從細到大都無人同自己搶嘢食、搶嘢玩，所以慣性都係會「將好嘢留到最後」：食嘢最好味的一定留到最美，好嘢一定留在最後用。所以呢，上次去搵靚仔栽縫做套 Zegna 西裝（見《The Lancelot》）真係少着，變咗之前在大班廊做嘅西裝用嚟粗着（見《再三消費，帶動經濟》）。早前 8 月時見靚仔栽縫賣廣告話10年祭（魔術師心中吃了一驚，在呢個時興快餐時裝就連 Zara 都俾 Shein 打殘的時代，做 bespoke 仲要係主打愈來愈少人着的西裝，可以做到 10 年真係唔簡單），Ermenegildo Zegna 布料有 8 折優惠，魔術師當然都唔放過，做多一套「傍身」。
約定靚仔栽縫等魔術師放工唔加班拿拿臨趕去佢鋪頭，寒喧幾句後便進入正題，先揀布料為先：
揀好面子、裡子、和鈕扣之後，由於靚仔裁縫已有魔術師身材資料，便只需簡易度身，覆檢好肩、背、胸、腰、褲腳，其餘 detail 由靚仔裁縫幫手話事。
度完身之後，靚仔裁縫問魔術師：「唔知你有無諗過...」
魔術師想起早前靚仔裁縫寫過有關意佬着三件頭的文章，話音未落就知佢想點：「做返件三件頭吖嘛！」
其實魔術師以前都做過些三件頭西裝，不過已經有相當日子，做套新嘅都不錯。一於就俾靚仔栽縫成功 sell 到喇！
盛惠一套三件頭，加多一條褲（魔術師偏愛一衫兩褲），總計＄43,040:
魔術師笑言：「我要着到好似張晉喺《殺破狼2》度咁型㗎！」
由於魔術師唔趕住着，便由得靚仔裁縫慢工出細貨。過咗個半月，第一次度身，衫褲都幾乎攞得，只需較吓鈕門位；但件背心就只係「半生熟」，再較好貼身度（畢竟魔術師唔識武功唔係張晉要打打打），咁魔術師就等不如一次過攞喇！
再過三至四個星期，成套衫攞得：
當然仲有例牌由靚仔裁縫設計的西裝袋，靚仔裁縫仲送多個靚衣架：
|
| (圖片來源：The Lancelot > ZEGNA Traveller 值得入手嗎？Travel Suit 4 大重點到打包技巧，一次看懂, Aug 08,2025） |
魔術師拎完衫臨走時，靚仔裁縫補多句：「依家有多一套（衫），咁你之前做嗰套就唔做就住着喇！」
哈！醒目！
＊＊＊
伸延閱讀：
沒有留言:
張貼留言