《天水圍的日與夜（The Way We Are）》：This is the way I was

在睇任達華之前，魔術師先睇咗呢套貌似平淡，但卻能勾起魔術師不少回憶的「紀錄片」：


張家安（梁進龍飾）是個疑似住在天水圍公屋裡的有青一名，會考完咗放暑假，終日無所事事，訓到日上三竿，連落街買報紙都懶。家安父親早死，與母親貴姐（鮑起靜飾）相依為命；雖然一間屋得兩個人住，但母子之間卻沒有什麼交流：

貴姐有個住匡湖居的蝗國廠佬弟弟（高志森飾），竟然叫安仔放假到匡湖居去玩。嘩，由天水圍去西貢，重唔重皮啲？家姐只係在超市疏果部做嘢搵兩餐架咋！就連同阿媽擺壽酒，貴姐就連麻將都唔打，打都只係免為其難戥下腳不賭是贏錢。那些姨媽姑姐的仔女都係細細個就去外國讀書，得閒就返下傷港，家安同佢地完全係無計傾：

梁歡（陳麉雲飾）是個新搬來的獨居老人，用的砧板倒也新潮，不過鏡頭一轉，婆婆用的生鐵鑊、揸的鑊鏟、用的雙頭石油氣爐，都十分「公屋格」，活脫就像是當年魔術師住公屋時，老父老媽煮飯時的模樣，簡直係當年的記憶都返哂嚟。婆婆都超市找工作，遇上了貴姐；超市經理也很好人，沒有年齡歧視，反而很用心地教婆婆如何賣菜（要知道現在的賣菜員，月入有＄２３,０００！）：

公屋生活很簡單，你幫下我，我幫下你。超市三枝一 pack 嘅油婆婆一個人有排都用唔哂，買一皮又要貴幾蚊；貴姐見之，便幫佢「拆散來買」，仲借啲易唔使婆婆俾錢。屋邨樓下商場仲未被領展（00823.HK）收購，仲有家庭式電器鋪賣平價電視。婆婆想買電視覺得七十元搬運費太貴了，剛好貴姐行過，便叫安仔落嚟幫手搬機兼安裝；又幫婆婆換埋燈膽。婆婆感激不已，便找出一包陳年冬菇，撕去了價錢牌，訛稱是在南北行買來的，送給貴姐作回禮：

原來貴姐係個傳統婦女，細細個就出來做嘢供兩個細佬讀書，所以依家就算發咗，都會飲水思源，月餅劵就話小數目一家人無謂計較咁 cheap，但送安仔出國讀書，呢個 committment 就認真唔嘢少：

婆婆也有個外孫，但唯一的女兒死後，女婿另娶繼室，一家住在沙田，婆婆想錫下個孫都唔得。婆婆趁外孫放榜在即，便疑似用了唔少棺材本打了金鍊和戒指想送俾女婿同外孫一家，但女婿卻推掉唔要。對買油差幾蚊都要諗，買電視七十元運費都要左慳右慳的婆婆來說，打擊甚深。於是婆婆在歸家的路上，將金器都送給了陪佢一同來沙田的貴姐。貴姐為免婆婆難堪，只好收下，「代為保管」：

睇返，安仔雖然甚宅，但其實都好乖：阿媽叫佢做乜就做乜，幫阿婆就幫阿婆唔在講；安仔去同學屋企玩，只係打機而唔係睇ＡＶ打ＪＪ，又會摺衫（魔術師一向都懶得摺）；外婆入了醫院又會照料；長輩去世又會幫手接金銀衣紙（魔術師細個時都試過！）；在學校裡成績雖然唔突出，但亦深受老師（陳玉蓮飾）器重...足見起初的有青形象只係誤導，安仔與現在的一袋年青人相去甚遠：

最後，本片以安仔一家與婆婆共渡中秋作結，安仔仲識切碌柚，絕對唔係港孩（魔術師老父老媽一樣係鋪報紙墊枱食嘢，而唔係用膠枱布的，呢一幕又係好有共鳴！）：

＊＊＊
本片雖然無「劇情」無高潮位無笑位，但其實講的都是一般的公屋生活，也不限定是要在天水圍發生的，淡淡的人情世故中，另有一番感人之處。在屋邨裡，大家街坊街里，守望相助，你請下我，我請下你，送一些冬菇乾貨等，就是邨民間日常的生活，也沒有甚麼特別的悲情事件發生的。尤其是係那些公屋單位內的家品擺設，爐呀、鑊呀、飯壺呀、枱頭上的玻璃呀、「攝」在玻璃下的照片呀、電話簿仔呀、食飯時要用報紙鋪枱之類，都係魔術師經歷過的兒時生活瑣事，睇返真係好親切。對魔術師來說，呢一種平淡的生活，竟然比依家一眾港豬日唸夜唸的「財務自由」更有吸引力。
又，買報紙送紙巾就真係不敢恭維，一日用一包係唔會用得哂嘅；反而當年仲有膠袋送，可以用來做垃圾袋仔。

又又，話說先父都曾有幫襯呢類街邊剪髮。其實老人家唔會去新式髮型屋，咁究竟佢地平時去邊度剪髮嘅呢？唔通係日式１０分鐘快速單剪？

＊＊＊
伸延閱讀：
賣菜員月薪$23000，讀咁多書嚟做咩