消失的差餉

當年浩劫灣，家長買俾仔女係「真・父幹助入市」；依家呢，只怕名面係幫助子女置對入市，實質「父幹」只係企圖以子女人頭避稅而已。在這些「偽首置」買家力托之下，一般針對個人買家投資者的辣招起不了作用，樓價依然係會係如火箭般上升...
不過所謂「如火箭般上升」，其實係由新樓盤的劏房則及細單位主導：當港豬的人工無長足的升幅，能負擔的供樓借貸額無甚改變，故此能負擔的樓價亦大致上不變（說來好笑，如果加辣加首期減按揭比率，以相同的樓價來說，供樓的負擔反而輕鬆咗）；地產霸要加價，便唯有將樓盤劏成納米樓減呎數加呎價以營造「lump sum 無變，層樓人人買得起」的假象了。
其實，當肥仔金都有能力射火箭的話，我地係會話「朝鮮科技（大西北樓價）一日千里」，定係「火箭科技（金錢的購買力）隨通脹貶值」呢？
＊＊＊
話說回來，本文在月前已經諗好想寫，不過由於一直以來公私兩忙，資料準備好放在枱頭卻忘了跟進...是咁的，話說魔術師早前收到了以下一份差餉及地租通知書：

咦，點解好似被上期交少咗咁嘅！

睇返兩份差餉地租通知書，魔術師屋企的「租值」竟然由去年的＄１８９,９６０（月租１５,８３０）跌到今年的＄１８０,４８０（月租１５,０４０），即係話如果有收租仔買咗魔術師屋企租返俾魔術師，一年下來要減租差唔多＄９,５００一年，即係約＄８００一個月？想食咗收租仔隻車咩？

差估署係在每年１０月估價，但魔術師從中原城市分區領先指數（新界西）拎資料 plot 圖，好似由２０１５年１０月（差餉地租期為２０１６年４月至２０１７年３月）到２０１６年１０月（差餉地租期為２０１７年４月至２０１８年３月）成年都係升勢喎！

魔術師再睇返自己屋苑的租盤，面積類似魔術師屋企呢類唔夠１０７６平方呎的「中小型單位」近月都無成交，坐擁類似開揚景觀的就做緊實呎＄２５至＄３０，點睇差估署都估低咗一大截；以庫房角度嚟睇，工作質素認真麻麻，但就係一眾小業主既得利益者的「福音」...畢竟差估署的職員都好可能係小業主，唔知又使唔使用特權法查下佢地有無利益衝突，俾唔到中立持評的估價呢？。
＊＊＊
又，魔術師成日見好些傷民不論是上咗年紀、貌似基層、抑或是年輕潮人，好似都幾鍾意到郵局或便利店交（公屋）屋租、水電煤之類的費用，而唔用自動轉賬（魔術師班同事亦係咁）。喂，呢啲錢慳又慳唔到，一時唔記得交又容易被罰，交款呢啲嘢對於依家銀行啲電腦系統也只屬基本功能，魔術師就真係唔明呢啲傷民點解唔 set up autopay 來個一了百了，反而下下要靠人手完成了。
＊＊＊
資料來源：
中原城市指數
＊＊＊
伸延閱讀：
北韓測試新型火箭引擎挑釁中美（蘋果日報　2017年03月20日）
新聞雜評（一百五十二）