一切由糧單開始

如果有留意乜 sir 網誌的讀者，都會知道乜 sir 教學員買樓的其中之一項必殺技就係「煲大借貸力」，例如學員妻子係家庭主婦，無收入，於是就由其他家庭成員成立公司，並聘請學員妻子作為員工，做好糧單、報稅、供強積金等基本文件，等半年至一年後，「證據充足」之後妻子便可以問銀行借錢買錢，跟學員兩公婆一人一間，向一生三宅的「人生目標」又邁進了一步。
本來魔術師對呢種財技向來都嗤之以鼻，不過自從早前跟舊公司分手後，就發現到要倚靠僱主才有「糧單」是一件非常危險的事情：無論大至借按揭買樓，小至申請信用卡，在在都需要一份「糧單」作為收入證明（至少都要用每月銀行的自動過數紀錄）。《孫子兵法》有云：「致人而不致於人（虛實第六）」，糧單呢一類文件，都係由自己掌控為妙。睇嚟開立一間有限或無限公司，「自己請自己」，似乎又真係生活上值得考慮的「安全措施」。
當然，成立公司係要有成本的，除了政府商業登記、公司註冊費用等，如果係開有限公司的話，仲要做好會計、審計同埋報利得稅；如果係獨資或合夥形式營運，也可以選擇以「個人入息課稅」，只要自己做好會計賬目和保存好營運，甚至乎是可以用來扣減正職的 taxable income（個人入息課稅）。
所以話，除咗糧單方便借錢之外，成立公司的另一好處就係用來避稅，不過有好處都唔一定要做，當然要同成本比較，係唔係有着數就好睇個人了。就咁睇，例如魔術師要開一間獨資無限公司用來處理自己的投資事宜，公司即等於個人，故此公司的非消費性開支例如出糧俾自己，就會反映返在個人的收入上，結果打個和；只係公司的收入（股息、買賣賺價等）又會變成個人收入，要交返薪俸稅了。當然，有唔少人要將自己的衣食住行都打埋入「公司」數，用來「煲大」個開支，不過除非係「大數」，否則下下 keep 單就真係煩上加煩而已。
如果係開有限公司，用乜 sir 條橋以糧單來做收入證明問銀行借錢買樓，就要真真正正咁計利得稅，除咗要交正式 audited 的賬目之外，仲要租公司註冊地址，秘書服務等，好鬼多嘢搞。如果間公司真係無業務的的空殼公司，咁公司支出永遠大過收入，要間公司 sustainable 就只能不停發股本，將出咗俾自己份糧打回頭再注資返入去；一係就做交易單據，當「賣咗」某啲服務俾某啲人，收返一筆錢咁。
點都好，乜 sir 提議呢隻為咗問銀行借錢而開的空殼公司，除了那些開公司的大小使費，無生意營運之餘又要「責住」一舊錢出糧俾自己（為了「谷大」借貸力，「人工」一定唔可以少，仲有強積金一去無回頭），借大咗自已又要還，為的就是一張糧單；而且依家去銀行開公司戶口亦唔容易，直程當你賊咁辦。值唔值得搞咁多嘢、搏到咁盡，真係要計過先知了。

＊＊＊
伸延閱讀：
香港特別行政區政府　稅務局 > 稅務資料 - 個別人士 / 公司業務 > 填寫利得稅報稅表填寫利得稅報稅表
香港政府一站通：薪俸稅及個人入息課稅
香港創業在銀行難開戶？過來人教你兩大「必勝」法