跟領嘢大西人抬槓

從Ｃ嬸的ＦＢ看見呢篇文章，實在忍唔住要評論一下，希望唔好俾網友以為魔術師大蝦細！

【來稿】新界西大學生的苦衷：朋友間都會Long-d，嚴重起來會分手
撰文： 來稿文章 發佈日期： 2017-01-17 20:40 最後更新日期： 2017-01-19 12:37
作為一個土生土長的九龍人，朋友圈子的核心範圍基本上都在九龍。直到我study abroad，移民左新界⋯⋯西大學，一夜之間，我好似冇哂朋友咁。
撰文：新界最西人

小學：隔籬村的同學
那些年，仍未有「贏在起跑線」此等高階哲理，阿媽說最重要是起跑線和終點近。於是，我們三姊弟都讀屋邨小學。因為學校在家對面，由出門至達陣只不過是3分鐘。作為一個小學生，冬天與床纏綿至7點55分才起身，5分鐘梳洗，8時05分，宣佈勝利。3分鐘的距離，我覺得我已經是人生贏家。
當時世界還是很公平，人生贏家不只我一個。我住在小學的對面，阿A住在小學左邊，阿B住斜對面。阿C住我樓下，阿D住同一幢樓的二樓，反正，那個時候，去最遠那個朋友家，不過是隔壁邨，10分鐘。小學時代，我們記住的是朋友住咩樓咩室。
中學：隔籬站的朋友
後來升讀地區中學，朋友圈子由一條邨擴展至同一條地鐵線距離，隔籬邨變隔籬站。那時，多了一個樂趣，與同站的朋友孖公仔般返學放學。我們記住的是朋友咩站等車，咩站落車。當時，聽說有個同學住東涌，我們每天都為他哀悼。直到大學，我先知什麼是「天外有天」，因為我入咗最西的大學讀書，係呀，近期好Hit個新界西呀，想知新界西民族，每天如何在屯門公路與西鐵之間的掙扎，詳情請看「新界西人絕對係一群堅毅嘅物種​」。
大學：隔.離
而我要說的是朋友之間Long-D的故事。對，朋友也有Long-D，嚴重起來也可「分手」。開展三年新界西大學住宿生活後，舊朋友說了一句：「你好似消失咗。」
幾年後，我回想，什麼時候有些老友愈走愈遠，有些老死即使半年不見，一見面送你一句「喂，你又肥咗。」就知他們如最初，幾遠都係一世。我發現，入讀新界西大學，其一好處係，你知道邊啲係forever friends。

放低嘅唔係一餐飯時間，係一晚。

下次下次⋯⋯大概可以⋯⋯
做了半個新界西人，不用戴錶，忽然，做人很有時間觀念。每次約朋友，你都會計一計－－朋友約七時九龍吃飯，你開始運算：要七時達陣，必須5時30分出發，哎呀，中間撞正放工浪潮，要再早一點出門，要5點落堂才可以⋯⋯今堂好像有幾組同學要Present、又或者今堂是長氣老師、個課室又冇人用，一定會不停「講埋兩句」，一定遲到啦！又或者你會話：「今晚好趕呀，下次啦！」
下次下次，朋友會說做人不要輕易放棄，那我們約八點就可以啦。你唔明新西界人來回的陣痛。屯門出嚟唔算長佂，而我說的是「來回」，來回才是長征。
朋友慣常一句「忙，都要食飯㗎！」第一次聽到這話，我深感認同，欣然赴約，「朋友是要見的。」試過一次，內心小劇場便出現：「係呀，忙都要放低個Project，食個飯。」但你很快便會做「灰姑娘」－－「心灰」的姑娘：來回三小時多，坐下傾兩句才只有一小時，於是你只好黯然道：「我放低嘅唔係一餐飯時間，係一晚。」
周末好友見面要排期
新界人永遠參與不了一場遊戲叫「即興」，一個星期一次的「周末檔期」要一早度好。平日返學，星期六就會「思鄉」－－九龍，對於平日買$28.9有9包出前一丁做午餐的新界西大學生，會產生對住家飯的殷切渴望，所以星期六必定留給家人。於是，只剩下一個星期日，朋友圈ABCD都想約。為了信義，唯有實行「先得先得，派完即止」的原則，只見最先約好的老友。有時，周末忙莊務忙Project留在宿舍，又要再等五日才可出城。14日不見即隔半月，老友覺得「約你都要排期咁」。

問我有沒有 確實也沒有一直躲避的藉口 非甚麼大仇 為何舊知己在最後變不到老友
《最佳損友》歌詞

《秒速5厘米》現實版
「不如你入嚟屯門食個飯？」老友說「好遠呀！」。我想起《秒速5厘米》，男女主角本是鄰居，搬家後相距2小時車程，再後來搬至相距1600公里，共24小時車程，相隔十三年偶遇，已各有各生活。那時我想不透，究竟是距離遠，還是時間遠，所以他們才愈走愈遠？
即使由天水圍至柴灣的距離不過是50公里，我依然想不透，是屯門和九龍港島之間遠，還是那來回三小時遠？後來，我學懂一個詞語「生活距離」。老友大多從未踏足過屯門，包括我自己，可能他們實際連屯門喺邊都唔知，我只好答：「比天水圍再入啲呀，可能我畢業禮你先會入嚟。」當初一句戲言，最終成真。

１. 作為一個土生土長的九龍人，朋友圈子的核心範圍基本上都在九龍。直到我study abroad，移民左新界⋯⋯西大學，一夜之間，我好似冇哂朋友咁。
領嘢大之馬！有本事使乜希罕去讀呢個學位？朋友梗係「重要」過呢間「野Ｘ（為免與今年生肖相沖，避諱）」喇！
２. 我們三姊弟都讀屋邨小學。因為學校在家對面，由出門至達陣只不過是3分鐘。...後來升讀地區中學，朋友圈子由一條邨擴展至同一條地鐵線距離，隔籬邨變隔籬站。
魔術師小學和中學時都係讀屋邨學校。當年屋邨又點會有怪獸家長？好多同學都係自行返學放學。記得魔術師直到小三，有時老父或者老媽都會湊返學放學，結果就俾同學仔笑。以前的小孩鬥獨立，依家的小孩卻鬥「港孩」，時代果然係「進步」的。
３. 開展三年新界西大學住宿生活後，舊朋友說了一句：「你好似消失咗。」
物以類聚，人以群分。唔知呢位「新界最西人」有無朋友讀到鄉大？如果有，都一樣可以「好似消失咗」，毌需大驚小怪。
４. 做了半個新界西人，不用戴錶，忽然，做人很有時間觀念。
有時間觀念，究竟係一件好事定係壞事？
５. 今堂好像有幾組同學要Present、又或者今堂是長氣老師、個課室又冇人用，一定會不停「講埋兩句」，一定遲到啦！
對現在的「大學生」來說，有乜嘢堂係唔可以走？
６. 屯門出嚟唔算長佂，而我說的是「來回」，來回才是長征。
大把人都係咁樣返工放工，慣咗就唔辛苦，端看你懂不懂得利用時間 — 魔術師的那些學位和專業資格，就係在巴士旅程上讀回來的。住得「遠」最好就係搭公共交通工具：如果你揸車，一塞車你就要「陪塞」，無聊但又要打醒精神，不如巴士乘客一樣可以大覺訓；就算交通暢順，你揸車早返到屋企，多出來的時間很可能便用來看電視、上網、打機等，反而沒有「有公交車上溫習」那麼有效率。
７. 來回三小時多，坐下傾兩句才只有一小時，於是你只好黯然道：「我放低嘅唔係一餐飯時間，係一晚。」
屯門去邊度要「來回三小時多」？魔術師返中環上班都只係一個鐘而已。就算真係要三個小時，但你會對珍惜時間有更深刻的體會，跟豬朋狗友吹水真係咁重要咩？哎，差啲唔記得，識得衡量「豬朋狗友」的重要性的話，就不會「淪落」到去讀領嘢大了。
８. 新界人永遠參與不了一場遊戲叫「即興」，一個星期一次的「周末檔期」要一早度好。
有 planning 係一件好事。有機會俾你住屯門，可以訓練到你做人 well organised 一啲，你應該感恩。
９. 有時，周末忙莊務忙Project留在宿舍，又要再等五日才可出城。14日不見即隔半月，老友覺得「約你都要排期咁」。
除非你係讀食屎大或者保你大，讀其他大學住宿舍唔多唔少都會「與世隔絕」：乜唔係話宿堂生活先係大學生活中最精彩的部份咩？
１０. 「不如你入嚟屯門食個飯？」老友說「好遠呀！」
如果班豬朋狗友係「真朋友」的話，點解唔拉大隊入嚟屯門玩？就算去領嘢大，屯門有港鐵（00066.HK）站可轉接駁巴士，屯門公路又有九巴轉車站，交通點算唔方便？
１１. 「比天水圍再入啲呀，可能我畢業禮你先會入嚟。」
領嘢大幾時係「比天水圍再入啲」？又，就算係天水圍，又好失禮你咩？即係咁，如果住新界係咁難為班有為青年的話，特衰正苦再「開發ＸＸＸ」覓地建居屋都唔能夠解決到住屋問題；有青為了「豬朋狗友」，唯一的出路，就係 deemed to be 住劏房了！

（圖片來源：中原地產，retrived on 8 Feb 2017）

＊＊＊
本來諗住將嗰篇《新界西人絕對係一群堅毅嘅物種​》放做伸延閱讀就算；不過睇咗一陣，又忍唔住要繼續抬槓，留待明日再續！