收租仔之屋

記者妹一嚟就道出咗起碼一生兩宅收租仔的心聲：買磚頭可以保值，個個月又有穩定收入，係唔少人的退休大計，不過最緊要的就係要掌握到入市時機云云（３５：４０ — ４６：３０）：

樓盤傳真 2017/02/11 2017/02/11 22:54

嘉華啟德區嘉匯一房五百八十五萬元入場，長實牛潭尾意花園以稅項回贈迎戰，並提供五年期過渡性貸款，但對紓緩首期壓力作用有限。
轉投二手樓，準買家也不容易上車。即使堅尼地城嘉輝花園二百八十呎單位，業主也索價四百六十八萬元。
鴨脷洲南區左岸有三成半成交，業主購入相連單位，但如計劃打通未必可行。關鍵是露台是否用盡豁免面積，花近億元置業卻有可能失預算。
家有三位活寶貝，家居設計以小童為先，容許四圍走動和大量玩具櫃，還有捉迷藏小機關。

業主有幾個單位收租的收租仔，自住樓都成１５００萬，有三隻年紀好細的「小朋友」（由幾個月大到６歲不等），當然係金叵籮，設計又係要以討小魔怪歡心為重點；另外呂字型廳，廳與廳之間通道較窄，裡面個飯廳比較暗，亦需要改善：

設計師先將原客牆拆去，變成書房，用玻璃間牆，據稱可以「引入光線」（左上、右上）；但都經過咗成間房咁深，啲光線唔知仲剩返幾多，可能結果都係要靠開燈（左中）。電視牆與書房之間有轉角櫃，用來擺親子玩具（右中）同埋魔術師最睇唔順眼的影樓超作狀家庭照（左下，紅圈）。廚房同樣用玻璃間牆，油煙多肯定抹餐死；優點又係透光同埋女戶主（定工人姐姐？）煮飯時可以見到小魔怪的一舉一動；餐椅花過心思，墊高咗變成兒童關愛座（右下，紅圈）：

原來主人房同客房都有個疑似衣帽間或衣櫃位，無端端有幾道牆阻住哂（左上），設計師將呢啲牆都拆了，移正主人房門，調整好套廁馬桶位（右上，紅圈）；客房就拆牆變成仔房同埋造衣櫃（右上）；主人房連按書房的轉角位又做櫃用來擺玩具，真係玩少一陣都好似會死咁（左中）。廚房原本有工人房同工人廁（右中），但工人姐姐的私淫空間略嫌過大，便再重新佈局，將工人姐姐張床架到工人廁的馬桶上（真係良心雇主，三隻小魔怪一定會備受工人姐姐的愛護，「快高長大」），以便留出空間給廚房用（左下、右下）：

書房非常大，一條大直路，拉開玻璃門就可以同囝囝一齊跑來跑去（左上）。書房有一半係造花呢綠的櫃放玩具（真係放極都放唔完，右上）。出奇地，收租仔戶主都睇唔少書，於是便以白板來做書櫃門，又可以供小魔怪塗鴉（左中）。設計師仲玩埋小明小明小小明，整咗個暗格棺材房由書房通到客廳，應該係學西人那些 private space 的概念（右中，左下）。不過又唔係以為戶主好西，原來玄關位有換鞋位置，學埋日本仔咁要囝囝在門口換好拖鞋先入屋，夠哂有家教：

其實呢位設計師走平實路線係 okay 的，好似主人房（左上）、套廁（右上）等，grand grand 地又唔使太花巧（比鎢絲 sir 嗰啲水泥牆同監倉式馬桶正常得多了)；就算係仔房都只係少許童真設計，波浪型樓梯和書架仔等，算是不太浮誇，小魔怪大啲就會拆咗佢再裝潢（左下、右下）。由此路進，究竟個廳同書房嗰啲白痴設計係咪用來滿足收租仔戶主的 kidult 心態呢？